काठमाडौं– नेपाली कांग्रेस ललितपुरका जिल्ला सभापति मदनबहादुर अमात्य मंसिर २१ गत हुने प्रतिनिधिसभा निर्वाचनमा ललितपुर क्षेत्र नम्बर ३ का उम्मेदवार हुन्। उनको यो पुरानो संसदीय सिट हो।
यसपालि उनीसँग नेकपा माओवादी केन्द्रकी चर्चित नेत्री पम्फा भुसालले प्रतिस्पर्धा गर्दैछिन्। २०६४ सालको पहिलो संविधानसभा निर्वाचन जितेकी पम्फाले २०७० सालको दोस्रो संविधानसभा बहिस्कार गरेकी थिइन्। यतिबेला अमात्यले पहिलो पल्ट निर्वाचनमा उत्रिँदै आफ्ना प्रतिद्वन्दीभन्दा दोब्बर मतले हराएका थिए।
भुसाल पुनः आफ्नो पुरानो संसदीय क्षेत्रमा फर्किएको र अमात्य स्थानीय लोकप्रिय नेता भएका कारण यसपालि राजधानी काठमाडौंसँग जोडिएको ललितपुर–३ को निर्वाचन रोचक बनेको छ।
यहाँ कूल ८५ हजार मतदाता छन्। जसमा ६५ हजार मत खस्ने अनुमान गरिएको छ।
वाम गठबन्धनका कारण भुसाल यति बेला उत्साही छिन्। तर, अमात्य त्यो उत्साह निर्वाचन सम्पन्न नहुँदासम्मका लागि मात्र भएको दाबी गर्छन्।
ललितपुर–३ को निर्वाचनबारे अमात्यसँग नेपाल लाइभका नवीन अर्यालले गरेको कुराकानीः
ललितपुर–३ को चुनावी सरगर्मी कस्तो छ?
माहौल मेरो अनुकूल छ। म प्रतिपक्षी नै देख्दिन। चुनाव लड्न आएपछि कसै न कसैलाई प्रतिपक्षी बनाउनुपर्ने रहेछ। त्यस आधारमा त होला तर, अरुसँग मेरो प्रतिस्पर्धा छैन।
उसो भए वाम गठबन्धनकी उम्मेदवार पम्फा भुसाल तपाईंको प्रतिस्पर्धामा आउन सक्नु हुन्न?
खोइ, कहाँ हुनुहुन्थ्यो, हिजो उहाँ। उहाँको राजनीति यहाँ धेरै ग्याप भइसक्यो। पहिलो संविधानसभामा यहाँबाट जितेर गए पनि उहाँले केही काम गर्नु भएन। अहिले फेरि टुरिस्ट उम्मेदवारका रुपमा फर्किनु भएको छ।
आफूले जित्नेमा ढुक्क हुनुहुन्छ?
मलाई लाग्छ, दोब्बर मतले जित्छु। २०७० सालमा चुनाव जितेयता नियमित म यहाँका जनतामाझ छु। सबैले मलाई बुझेका छन्। मैले राजनीतिलाई व्यवसाय बनाएको छैन। मेरो एउटै लक्ष्य, ललितपुरको विकाश हो।
सम्भव छ त?
किन नहुनु। २०७० मा एमालेका रघु पन्त र माओवादी केन्द्रका साथीहरुले ल्याएको मत जोड्दा पनि २ हजारले म माथि थिएँ। अहिले उहाँहरुबीच गठबन्धन भए पनि अन्यौलकै स्थिति छ। स्थानीय तवरमा राजनीति गरिरहेका माओवादीकै साथीहरु पार्टी छोडेर हिँडेको व्यक्तिलाई टिकट दियो भनेर असन्तुष्टि पोख्न आउनुहुन्छ। एमालेका साथीहरु माओवादीसँग सहकार्य गर्यो भनेर असन्तुष्ट छन्। केही समयअगाडिको स्थानीय निकायको चुनावले पनि सबै कुरा झर्लङ्ग पारिसकेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
