गोरखा- उत्तरी गोरखाको धार्चे गाउँपालिकामा व्यावसायिकरूपमा स्याउ खेतीको विकासका लागि परीक्षण सुरु भएको छ। गाउँपालिकाले आफ्नाे क्षेत्राधिकारभित्रका ७ वटै वडामा सामूहिकरूपमा व्यावसायिक स्याउ खेती विकास गर्न पहिलो चरणमा एक हजार ४ सय उन्नत जातका स्याउका बेर्ना वितरण गरेको गाउँपालिका अध्यक्ष सन्तोष गुुरुङले जानकारी दिए।
गण्डकी प्रदेशअन्तर्गतको भौतिक पूर्वाधार तथा विकास मन्त्रालयको सहयोगमा गाउँपालिकाभित्रका भूकम्पपीडितको जीविकोपाजर्नमा टेवा पुर्याउने उद्देश्यले स्याउ खेतीको विकासलाई अघि बढाउन लागिएको उनले बताए। 'अहिले सबै वडामा दुई–दुई सयका दरले स्याउको बेर्ना वितरण गरेका छाैं', अध्यक्ष गुरुङले भने, 'वितरण गरिएका बेर्ना रोप्ने काम सुरु भएको छ।’
गाउँपालिकाले सवै वडामा सामूहिकरूपमा खेती गर्ने गरी स्याउको बेर्ना वितरण गरेको वडाध्यक्ष गुरुङको भनाइ छ। 'दर्ता भएका सबै समूहलाई गाउँपालिकाले सूचीकृत गर्नेछ', उनले भने, 'पाएसम्म सार्वजनिक जग्गामा सामूहिक खेती सुरु गर्नेे र सार्वजनिक जग्गा नभएमा भाडामा समूहले जग्गा लिएर भए पनि सामूहिकरुपमै खेती गर्नुपर्ने गरी गाउँपालिकाले कार्यविधि बनाएको छ।'
प्रत्येक घरमा एउटा–एउटा स्याउका बेर्ना लगाउँदा त्यसको व्यावसायिक प्रवर्द्धन गर्न समस्या हुने भएकाले गाउँपालिकाले सामूहिक खेतीमा जोड दिएको उनको भनाइ छ। 'वितरण गरिएका स्याउको एउटा बेर्नाको नर्सरीमै १ हजार ५ सय रुपैयाँ परेको छ', गुरुङले भने, 'यहाँ गाउँसम्म ल्याइपुर्याउँदा २ हजार ५ सय रुपैयाँसम्म पुग्नसक्छ।' वितरण गरिएका स्याउ रोप्नका लागि एक महिनादेखि नै खाल्डो खन्ने, मल राख्ने काम भइरहेको अध्यक्ष गुरुङले जानकारी दिए।
एग्रो मनाङ नर्सरीमार्फत डाला, फुजी र गोल्डन जातका इटालीबाट झिकाएर वितरण गरिएको उक्त उन्नत जातको स्याउ एक वर्षभित्रमा फल दिनसक्ने खालको रहेको उनले बताए। करीब २ हजार मिटर उचाईको भू-भागमा राम्रो खेती हुनसक्ने भएकाले वितरित उन्नत जातको स्याउ धार्चेका सबै वडामा राम्रो उत्पादनको सम्भावना रहेको गाउँपालिकाले जनाएकाे छ।
वितरण गरिएको स्याउको बेर्नाले उत्पादन दिने भएकाले भूकम्पपीडितले छिटो आम्दानी गर्नसक्ने गुरुङले दाबी गरे। एक वर्षभित्रमा हुने उत्पादनलाई आधार मानेर धार्चे गाउँपालिकालाई स्याउको पकेट क्षेत्रको रूपमा विकास गरेर लैजाने योजना गाउँपालिकाले बनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
