बिहीबारदेखि सुरु हुने एसिसी युथ–१९ एसिया कपमा सहभागी हुन नेपाली युवा क्रिकेट टोली मंगलबार मलेसिया पुगेको छ। मलेसिया जानुअघि नेपालले एक साता बंगालदेशमा तयारी गरेको थियो। बंगलादेशमा रहँदा नेपालले बंगलादेशको युवा टिमसँग ३ वटा अभ्यास खेलेको थियो। सुरुवाती २ खेलमा पराजय बेहोरेको नेपालले अन्तिम खेलमा बंगलादेशलाई ६ विकेटले पराजित गरेको थियो।
एसिया कपको समूह ’ए’ मा नेपालसहित भारत, बंगलादेश र मलेसिया सहभागी छन्। नेपालले पहिलो खेल कात्तिक २५ मा बंगलादेशसँग, दोस्रो खेल कात्तिक २६ मा भारतसँग र तेस्रो खेल कात्तिक २८ मा मलेसियासँग खेल्ने छ। समूहमा बलिया प्रतिद्वन्द्वी भए पनि नेपाली टिमका प्रशिक्षक विनोद दासले सेमिफाइनल पुग्ने अवसर भएको बताएका छन्।
मलेसिया उड्नुअघि दाससँग नेपाल लाइभका सीताराम कोइरालाले गरेको कुराकानीः
युथ–१९ एसिया कपको तयारीका लागि नेपालले एक साता छोटो बंगलादेश भ्रमणबाट के सिक्यो?
बंगलादेशमा खेलिएका ३ खेलमध्ये २खेलमा हामीले राम्रो प्रदर्शन गर्यौं। तेस्रो खेलमा ब्याटिङ राम्रो हुँदा जित पनि हात पर्यो। बंगलादेशी युवा टिमविरुद्ध पहिलो खेलमा पनि १०–१५ रन बढी बनाउन सकेको भए परिस्थिति बेग्लै हुन्थ्यो। दोस्रो खेलमा उनीहरुलाई २ सय २७ रनमा रोकेका थियौं। सुरुमै २ विकेट गुमाउँदा राम्रो खेल्न सकेनौं। बंगलादेश भ्रमणबाट टिममा सकारात्मक प्रभाव परेको छ। यसको मतलब सबै समस्या समाधान भएको भने होइन।
बंगलादेश भ्रमणमा नयाँ ओपनिङ जोडीले शतकीय साझेदारी गरे। नेपालको ओपनिङमा सुधार आउने संकेत देखिएको हो?
युवा टिम सम्हालेदेखि मैले केही खेलाडीलाई प्राथमिकता दिँदै आएको छु। टिममा परेका सबै खेलाडीले राम्रो खेल्छन् भन्ने हुँदैन। खुसीको कुरा केही नयाँ तथा पुराना ब्याट्सम्यानले राम्रो खेलेका छन्। एक खेलमा राम्रो खेल्दैमा ब्याटिङ सुधार भयो भन्न मिल्दैन। हामीले नयाँ खेलाडीलाई मौका दिएर बाटो बनाइरहेको साँचो हो। आशावादी छौं, हौसिएका छैनौं। जुन टिममा पनि समस्या हुन्छ। जति धेरै खेल खेलिन्छ, त्यति समस्या समाधान हुँदै जान्छ।
युथ–१९ एसिया कपमा नेपालको लक्ष्य के हो?
हाम्रो लक्ष्य क्षमता अनुसार शतप्रतिशत खेल्ने हो। आफ्नो क्षमताअनुसार नखेल्दा अर्को टिमले नराम्रो खेलेर पनि जित्छ भने त्यो दुःखको कुरा हो। बंगलादेशमा भएका ३ वटै अभ्यास खेल हाम्रो लागि एसिया कपजतिकै महत्वपूर्ण थिए। अन्तिम खेलमा हामीले आफ्नो क्षमता अनुसार खेल्यौ। यसको निरन्तरता एसिया कपमा भयो भने सेमिफाइनल पुग्ने अवसर छ। तर हामीले आफ्नो क्षमता देखाउन चुक्यौं भने २ टेस्ट टिमसँग खेल्न गाह्रो हुनेछ।
बलिङमा अब्बल भए पनि युवा टिममा ब्याटिङमा समस्या देखिँदै आएको छ। ब्याटिङ सुधारका लागि कस्तो योजना छ?
हाम्रो मुख्य समस्या भनेको घरेलु क्रिकेट हो। हामी उसै त कम प्रतियोगिता खेल्दै गइरहेका छौं। यसमा पनि विकेट राम्रो हुँदैन। घरेलु प्रतियोगितामा प्रत्येक टिममा राम्रा बलर पनि हुँदैनन्। जब अन्तर्राष्ट्रिय क्रिकेट खेल्न जान्छौं, त्यहाँ राम्रो विकेट हुन्छ। ५–६ जना उत्कृष्ट बलरको सामना गर्नुपर्छ। यसले गर्दा हाम्रो ब्याटिङमा समस्या देखिएको हो।
हामीले पछिल्लो २ वर्षमा विभिन्न खेल खेलेका छौं। श्रीलंकाविरुद्ध १ रनले पराजित भएका छौं। अफगानिस्तानसँग धेरै रन बनाउन सकेनौं। तर, हामीले उनीहरुलाई पनि रन बनाउन दिएका थिएनौं। सिंगापुरको विकेटमा रन बनाउन गाह्रो भएको यसबाट पनि पुष्टि हुन्छ। तर हामी र अन्य टिमबीच रन अन्तर छ। यो अन्तर कम गर्न सुरुवाती ४ ब्याट्सम्यान चल्न एकदम जरुरी हुन्छ। एसिया कपमा हाम्रो उद्देश्य राम्रो ब्याटिङ गर्ने नै हुनेछ। हामीले पछिल्लो एक महिना ब्याट्सम्यानलाई विशेष प्रशिक्षण गराएका छौं।
नेपालको समूहमा बंगलादेश र भारत जस्ता बलिया टिम छन्। उनीहरु विरुद्ध हाम्रो रणनीति कस्तो हुन्छ?
भारत र बंगलादेश टिममा अनुभवी खेलाडी छन्। उनीहरुमा अभ्यासको पनि कमी छैन। यो अवस्थामा हाम्रो बारे उनीहरुलाई थाहा नहुनु बलियो पक्ष हो। हामीले आफ्नो क्षमताअनुसार खेलेर उनीहरुलाई आश्चर्यचकित पार्न सक्छौं। हाम्राबारे धेरै जानकारी नहुँदा उनीहरु सतर्क भएर खेल्छन्। हामीले बंगलादेशसँग ३ खेलको शृंखला खेल्यौं। भारतसँग पनि खेलिसकेका छौें। दुवै टिमविरुद्ध नराम्रो खेलेको भन्न मिल्दैन। उनीहरुको ५–६ विकेट झारेका छौं। हामीले पराजित गर्न सक्नेमा उनीहरु पनि सचेत छन्।
युवा टिममा तीव्र बलरले अवसर पाइरहेका छैनन्। किन होला?
युवा टिमका बलरले लगातार राम्रो प्रदर्शन गरिरहेका छन्। मलेसियाको कन्डिसन हेरेर हामी नयाँ बलरलाई मौका दिन्छौं। यसअघि हामीले एक मात्र तीव्र गतिको बलर लिएर खेलिरहेका थियौं। २–३ जना तीव्र बलर लिएर खेल्ने परिस्थिति बनेको छैन। जसले खेल्ने अवसर पाए उनीहरुले शतप्रतिशत प्रदर्शन गरेका छन्। त्यसैले बलिङमा गुनासो गर्ने ठाउँ छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
