सुर्खेत- शुक्रबार र शनिबार बेलुकाको असिनासहितकाे भारी वर्षापछि आएकाे पहिरोले कर्णाली राजमार्गका विभिन्न खण्ड अवरुद्ध भएको छ।
दैलखको दुल्लु नगरपालिकामा र कालिकोटको शुभकालिका गाउँपालिकाको दहीखोलामा गएको पहिरोले २ दिनदेखि यात्रु आवतजावतमा समस्या आएको हो। दैलेखबाट गएको डाेजरले शनिबार दहीखोलाको पहिरो हटाउन सकेन। पहिरो हटाउन नसक्दा काठमाडौं, नेपालगञ्ज र सुर्खेतबाट कर्णाली जाँदै गरेका यात्रुहरु दुई दिनदेखि अलपत्र परेका छन्।
दहीखोलामा ठूलो पहिरो गएको र दैलेखबाट आएको सानो डाेजरले अवरुद्ध बाटो खुलाउन नसक्दा यात्रुलाई असहज भएको जिल्ला प्रशासन कार्यालय कालिकोटले जानकारी दिएको छ। पानी बेलाबेलामा आइरहने र पहिरो पनि खसिरहने भएकाले बाटो खुलाउन समस्या भएको प्रजिअ चन्द्रबहादुर कार्कीले जानकारी दिए।
'बाटो खुलाउन हामी निरन्तर लागिरहेका छौँ', प्रजिअ कार्कीले भने, 'यद्यपि जनशक्ति र साधनको अभाव छैन।' सो स्थानमा स्काभेटर सञ्चालन गर्न गाह्रो भएको जनाइएको छ। उक्त पहिरोमा हिँडेर भए पनि जोखिमपूर्ण तरिकाले पहिराेग्रस्त क्षेत्र पार गरिएको यात्रु हरिलाल शाहीले बताए।
पहिरो गएको ठाउँमा कुनै पनि घर पसल नहुँदा यात्रुलाई पिउने पानी र खाजा/नास्ता पाउन गाह्रो भएको उनको गुनासो थियो। सडक अवरुद्ध भएको ठाउँमा पसल नभएकाले चाउचाउ बिस्कुट किन्न २ घण्टा हिँड्नुपर्ने बाध्यता रहेको यात्रु दलबहादुर थापाले दुखेसो पाेखे।
सडक डिभिजन कार्यालय जुम्लाले दहीखोला, किट्टुभीर, पादुका खोलाको पहिरो पन्छाएर गगनेखोला पहिरो पन्छाउन डोजरको प्रयोग भइरहेको जनाएको छ। डिभिजन कार्यालय जुम्लाका इञ्जिनियर श्रवणकुमार महताराका अनुसार गगनेखोलाको पहिरोले वर्षेनी दुःख दिने गरेको छ।
अवरुद्ध राजमार्ग खुलाउन आइतबार बिहानदेखि नेपाली सेना, नेपाल प्रहरी, सशस्त्र प्रहरी बल, सडक डिभिजन कार्यालय जुम्ला लागिरहेको जिल्ला प्रशासन कार्यालय कालीकोटले जनाएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
