काठमाडौं– नेपाल सन् २०२० मा जापानमा हुने ओलम्पिक खेलकुदअन्तर्गत महिला फुटबल छनोटको दोस्रो चरणबाटै बाहिरिएको छ।
म्यानमारमा भइरहेको प्रतियोगितामा लगातार दोस्रो खेलमा पराजित भएसँगै नेपाल बाहिरिएको हो। शनिबार भएको खेलमा नेपाललाई भारतले ३–१ गोलले हरायो। हारसँगै नेपालले यहि महिना विराटनगरमा भएको साफ च्याम्पियनसिपको उपाधि भिडन्तमा भारतसँग हारेको बदला लिन पनि चुक्यो।
भारतले खेलको छैटौं मिनेटमा अग्रता लियो। नेपालकी पुनम जर्घामगरले बल क्लियर गर्ने क्रममा आफ्नै पोस्टमा गोल गरेकी थिइन्। नेपालले लगत्तै गोल फर्काएर खेललाई १–१ को स्थितिमा ल्यायो। सातौं मिनेटमा सावित्रा भण्डारीको पासमा कप्तान निरु थापाले नेपालका लागि गोल गरेकी थिइन्।
पहिलो हाफ १–१ को बराबरीमा सकिएको खेलमा भारतले ६० मिनेटमा दोस्रो पटक अग्रता लियो। कर्नरमा बलमा सन्ध्याले भारतका लागि गोल गरेकी थिइन्। ७९ मिनेटमा भारतले पेनाल्टी पायो। पेनाल्टीमा असलाता देवीले गोल गरेर भारतलाई ३–१ ले अघि बढाइन्।
यसअघि बुधबार नेपाललाई घरेलु टिम म्यानमारले ३–१ गोलले नै पराजित गरेको थियो।
छनोटमा नेपाल, भारत, म्यानमार र इन्डोनेसिया समूह ‘ए’ मा छन् । प्रतियोगिताबाट १ टिममात्र तेस्रो चरणमा पुग्ने भएकाले नेपाल लगतार दोस्रो हारसँगै बाहिरिएको हो। अब नेपालले मंगलबार इन्डोनेसियासँग खेल्नेछ। सो खेलमा जित हात पारे पनि नेपाललाई तेस्रो चरणमा पुग्न पर्याप्त हुनेछैन।
यसअघि म्यानमारमै गत नोभेम्बरमा भएको पहिलो चरणको छनोटमा पनि म्यानमार, नेपाल, भारत र बंगलादेश एउटै समूहमा थिए । तीनै खेल नेपालले १–१ को बराबरी खेलेको थियो। अंक तालिकामा भने नेपाल म्यानमार र भारतभन्दा पछाडि परेको थियो। यद्यपी नेपाल उत्कृष्ट तेस्रो टिमका रूपमा छनोटको दोस्रो चरणमा अवसर पाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
