काठमाडौं– मंसिर २१ मा हुने प्रतिनिधिसभा निर्वाचनका लागि पूर्व प्रधानमन्त्री सूर्यबहादुर थापाको प्रभाव क्षेत्र मानिएको धनकुटामा ‘वाम गठबन्धन’का तर्फबाट नेकपा एमालेका राजेन्द्र राईले उम्मेदवारी दिएका छन्। स्वर्गीय थापाकै छोरा सुनीलबहादुर थापा यसपालि पनि उनका प्रमुख प्रतिद्वन्द्वी हुन्। थापासँग २०७० सालमा ४ सय ५४ मतले पराजित राई यसपालि त्यो नतिजा उल्ट्याउने दाबी गर्छन्।
धनकुटामा राई र थापाको प्रतिस्पर्धालाई रोचक साथ हेरिएको छ। धनकुटा एमालेका जिल्ला अध्यक्ष समेत रहेका राईले प्रजातन्त्रको पक्षमा विभिन्न सयमा भएका आन्दोलनमा भाग लिँदा २४ महिना जेल सजाय भोगेका छन्। २०७० सालमा भएको दोस्रो संविधानसभा निर्वाचनमा धनकुटा– २ बाट उठेका राईले ९ हजार ६ सय ३६ मत ल्याए। थापा १० हजार ९३ मत ल्याएर विजयी भएका थिए।
अहिले थापा कांग्रेससँग गठबन्धनमा राप्रपा (प्रजातान्त्रिक) बाट चुनावी मैदानमा उत्रिएका छन्। धनकुटाको प्रतिनिधिसभा चुनावका सन्दर्भमा एमालेका उम्मेदवार राईसँग नेपाल लाइभले कुराकानी गरेको छः
वाम गठबन्धनबाट चुनाव लड्दै हुनुहुन्छ, आफ्नो पकड कत्तिको बलियो ठान्नुभएको छ?
धनकुटामा नेकपा एमाले तीन वटा नगरपालिका र चार वटा गाउँपालिका गरी सात वटै स्थानीय तहमा विजयी भएको छ। त्यसमा पनि हामीले ४० देखि ४५ हजार मत ल्याएका थियौं। लोकतान्त्रिक गठबन्धनका कांग्रेस, राप्रपा र संघीय समाजवादीको मतभन्दा हामी अहिले करिब १५ हजार मतले अगाडि छौं। पार्टी प्रवेश गर्ने साथीहरुको लहर बढेकाले झन् उत्साह थपिएको छ। त्यसैले म धनकुटामा लोकतान्त्रिक गठबन्धनलाई १५ हजारभन्दा बढी मतले हराउने कुरामा ढुक्क छु।
जनताले तपाईंलाई किन भोट दिने?
धनकुटाको सवालमा जनताका काम गर्ने भनेको राजेन्द्र राईले मात्र हो। आर्थिक समृद्धिका निम्ति, यहाँको विकास गर्न। म स्पष्ट विचार भएको व्यक्ति भएकाले जनताले भोट हाल्छन् भन्ने मेरो विश्वास छ। धनकुटाको विकास निर्माणको सम्बन्धमा लोकतान्त्रिक गठबन्धनमा रहेको पार्टीले अहिलेसम्म केही गरेका छैनन्। उनीहरुले नक्कली र बनावटी कुरा गरेर अहिलेसम्म चुनाव जितिरहेका छन्। तर, यसपालि त्यस्तो हुँदैन।
लोकतान्त्रिक गठबन्धनभन्दा तपाईंको फरक एजेन्डा के-के छन्?
लोकतान्त्रिक गठबन्धनमा आबद्ध दलले अहिलेसम्म धनकुटामा जनताको जीवनस्तरमा प्रभाव पर्ने केही काम गरेका छैनन्। हामीले जनतासँग दैनिक जोडिएर काम गरिरहेका छौं। जस्तो कि, यहाँको बाटोघाटो, शिक्षा, स्वास्थ्य, खेलकुद, जेष्ठ नागरिक, महिलाको हक–अधिकारका निम्ति काम गरिरहेका छौं। लोकतान्त्रिक गठबन्धनका साथीहरु निर्वाचनमा ‘टुरिस्ट’ भएर आउँछन्। निर्वाचन सकिएपछि उनीहरुको अनुहार हेर्न काठमाडौं धाउनुपर्ने अवस्था छ।
तपाईंप्रति जनताको प्रतिक्रिया कस्तो छ?
उत्साहजनक छ। यसपालि वाम–गठबन्धनका राजेन्द्र राईलाई भोट हाल्ने भनेर चर्चा छ। पार्टी प्रवेश गर्नेको लर्को छ। पाख्रिबास नगरपालिका वडा नम्बर–५ का सबै कांग्रेस र राप्रपाका कार्यकर्ता हाम्रो पार्टीमा प्रवेश गरिसकेका छन्। प्रवेशको लहर नै चलेको छ।
धनकुटामा पूर्वप्रधानमन्त्री सूर्यबहादुर थापाको ठूलो प्रभाव छ। उहाँकै छोरासँग प्रतिस्पर्धा हुँदैछ, अघिल्लो चुनावमा उहाँसँगै हार्नुभयो।
संविधानसभा निर्वाचनमा सबै पार्टी एकातिर भएकाले उनले जिते। उनी नक्कली कुरा गर्न माहिर छन्। त्यसैले चुनाव जितेका हुन्। अहिले पनि नक्कली कुरा गरेर हिँडिरहेका छन्।
प्रदेश–१ को प्रादेशिक राजधानी धनकुटा भयो’ भनेर हिजोअस्ति मैनबत्ती बालेर धनकुटामा दिपावली मनाए। यस्ता नक्कली कुरा अब जनताले पत्याउँदैनन्। महत्वपूर्ण कुरा अहिले क्षेत्र ठूलो भएको छ। खोकु–छिन्ताङमा त उनलाई प्रवेशमा रोक लगाएका छन्, सहिद परिवारले। उनीसँग पैसा छ, गाडी छ, धनकुटा बजारमा बाटो छ, दुई–चार जनाले मानेका छन्। अलिकति कुद्न, हल्लाखल्ला गर्न त सजिलै छ नि।
उनले ४ वर्षमा चुनाव चिन्ह नै दुईवटा फेरिसके। अब भन्नुहोस्, उनलाई जनताले कसरी विश्वास गर्ने? गाउँमा जाँदा कार्यकर्ता नभएर पहिले नै फूलको माला गाँस्न लाएर घाँटीभरि माला लगाएर हिँडेका छन्। यसले मलाई केही फरक पर्दैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
