काठमाडौं (एजेन्सी)– इटालीका पूर्व मिडफिल्डर आन्द्रेइ पिर्लोले फुटबलबाट सन्यास लिएका छन्। उनले अन्तिम खेल न्युयोर्क सिटीबाट खेल्दै सोमबार फुटबलबाट सन्यासको घोषणा गरेका हुन्।
३८ वर्षीय पिर्लोले इटालीबाट १ सय १६ अन्तर्राष्ट्रिय खेल खेलेका थिए। उनी २००६ मा इटालीले विश्वकप जितेको टिमको महत्वपूर्ण सदस्य थिए।
पिर्लोले आफ्नो करिअर ब्रेसिया क्लबबाट सुरु गरेका हुन्। उनी इन्टर र एसी मिलान हुँदै युभेन्ट्समा आवद्ध थिए। पछिल्लो २ वर्षयता अमेरिकामा बसेर मेजर लिग फुटबल खेलिरहेका पिर्लोले भने, ‘न्युयोर्कको मेरो यात्रा मात्र होइन, फुटबल खेलाडीको रुपमा मेरो यात्रालाई पनि विश्राम दिने निर्णय गरेको छु।’
उनले आफ्नो व्यवसायिक करिअरमा साथ दिने सबै खेलाडी र क्लबलाई ट्विटरमार्फत धन्यवाद दिए। पूर्व क्लब युभेन्ट्सले उनलाई वास्तविक हिरो भनेको छ। न्युयोर्क सिटीका व्यवस्थापक प्याट्रिक भियराले पनि पिर्लोले फुटबलमा परिवर्तन ल्याएको प्रतिक्रिया दिएका छन्।
अजुरीका लागि विश्वकप मात्र होइन, २२ वर्ष लामो फुटबल करिअरमा उनले घरेलु उपाधि थुप्रै जितेका थिए। एसी मिलानबाट खेल्दा २ वटा सिरिया ए र २ वटा च्याम्पियन्स लिग तथा एक पल्ट क्लब विश्वकप जित्ने भाग्यमानी खेलाडी उनी बनेका थिए। युभेन्ट्सबाट पनि उनले ४ पल्ट स्कुडेटोस जितेका थिए। उनी २०१५ मा इंग्ल्यान्डका पूर्व मिडफिल्डर फ्रान्क लाम्पार्ड, स्पेनका डेभिड भियासँगै फुटबल खेल्न न्युयोर्क लागेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
