आठौं राष्ट्रिय खेलकुद प्रतियोगिता महिला क्रिकेट हुने दाङको लमही क्रिकेट मैदान। तस्बिर : प्रदीप मजगैया
दाङ– आठौँ राष्ट्रिय खेलकुद प्रतियोगिता नजिकिँदै गर्दा दाङको बेलझुण्डीमा निर्माणकार्य तीव्ररूपमा अघि बढिरहेको छ। बेलझुण्डी रङ्गशालामा यतिखेर बिहानैदेखि बेलुकासम्म निर्माणको कामलाई तीव्र पारिएको हो।
अहिले त्यहाँ एथलेटिक्स र फुटबल खेलमैदानको निर्माणको काम अन्तिम चरणमा पुगेको जिल्ला खेलकुद विकास समिति दाङका अध्यक्ष डिल्ली डाँगीले जानकारी दिए। उनका अनुसार एथलेटिक्स खेलका लागि त्यहाँ सिन्थेटिक ट्र्याक निर्माण भइरहेको छ। सिन्थेटिक ट्र्याक निर्माणका लागि चीनबाट सामग्रीसहित चिनियाँ प्राविधिकले यहाँ आई निर्माणको कामलाई तीव्र पारेका छन्।
त्यसैगरी फुटबलका लागि आवश्यक खेलमैदान निर्माणकार्य पनि अन्तिम चरणमा पुगेको छ। फुटबल खेलका लागि यतिखेर बेलझुण्डीमा रहेको मैदानमा हरियो दुबो रोपेर सजाइएको छ। रोपिएको दुबो नमरोस् र खेलमैदान हरियो दुबोमा होस् भन्ने उद्देश्यले सिँचाइदेखि त्यहाँ सजिसजावट गर्न शुरु गरिएको छ।
दर्शकलाई बस्नका लागि साधारण प्यारापिट निर्माण सम्पन्न भएको छ। त्यसैगरी रङ्गशाला नजिकै पानीको सुविधाका लागि डिपबोरिङ पनि गरिएको छ। त्यसैगरी भीआइपी प्यारापिट निर्माण, खेलाडीका लागि चेन्जिङरुम, बैठककक्ष, भीआइपीकक्ष र मिडिया घरलगायतका पूर्वाधार निर्माणको काम शुरु भइसकेको अध्यक्ष डाँगीले जानकारी दिए।
उनले भने, “आठौं राष्ट्रिय खेलकूद प्रतियोगितालाई मध्यनजर गरी आवश्यक भौतिक पूर्वाधारका कामलाई पहिलो प्राथमिकतामा राखेर निर्माणलाई तीव्र पारेका छौं”, ती सबै पूर्वाधार निर्माणको जिम्मेवारी दिवाएमए प्रतिष्ठा कन्स्ट्रक्सन जेभी काठमाडौंले पाएको छ। ती सबै पूर्वाधार निर्माणका लागि रु २४ करोड २४ लाख ४५ हजार २९३ मा निर्माण कम्पनीसँग ठेक्का सम्झौता भएको हो।
दाङमा राष्ट्रिय खेलकूद परिषद् तथा युवा खेलकूद मन्त्रालयको आयोजनामा आगामी वैशाखको ४ गतेदेखि ११ गतेसम्म विभिन्न आठ विधाका खेल हुने जिल्ला खेलकूद विकास समिति दाङले जनाएको छ। दाङमा एथलेटिक्स र महिला फुटबल प्रतियोगिताका खेल बेलझुण्डीमा हुने छन् भने तुलसीपुरको मल्टिपप्रोज कभर्डहलमा कराँते प्रतियोगिता, घोराहीको कर्भडहलमा आइटीफ तेक्वान्दो, ब्याटमिन्टन, पुरुष बास्केटबल र महिला बास्केटबल प्रतियोगिता हुनेछन्। त्यसैगरी लमही क्रिकेट मैदानमा महिला क्रिकेट खेल हुने जनाइएको छ।
यसैबीच जिल्लामा पहिलोपटक यति धेरै खेलको प्रतियोगिता आयोजना हुनलागेकामा यहाँका नागरिक तथा खेलप्रेमी निकै खुशी भएका छन् । खेल प्रतियोगिता हुने भएपछि आफूलाई निकै उत्साही बनाएको यहाँका खेलप्रेमी सीताराम शर्माले बताए। त्यसैगरी तुलसीपुरका समाजसेवी तथा नेपाल तेक्वान्दो सङ्घ प्रदेश नं ५ का संयोजक विकल रिजालले पनि दाङमा आठौं राष्ट्रिय खेलकूद प्रतियोगिताको आयोजनाले आफू निकै हर्षित भएको बताए। उनले नेपालभरिबाट राष्ट्रिय खेलाडीसहित अन्तर्राष्ट्रिय खेलाडीलाई दाङमा स्वागत गर्न पाउनु आफूहरुका लागि ठूलो अवसर रहेको बताए। साथै यसले खेलको विकासमा महत्वपूर्ण योगदान दिने उनको भनाइ छ।
दाङमा विसं २०४१ मा राष्ट्रिय महिला फुटबल प्रतियोगिता र गत वर्ष लिग चरणको फुटबल प्रतियोगिता मात्र भएको थियो । आठौं राष्ट्रिय खेलकूद प्रतियोगिता हुने भएपछि घोराही, लमहीमा रहेका कर्भडहल तथा खेलमैदानलाई पनि मर्मतसम्भार गरिनुका साथै सजिसजावट गर्न थालिएको छ।
बिहीबार आठौँ राष्ट्रिय खेलकूद प्रतियोगितालाई भव्य र सभ्यरूपमा सम्पन्न गर्न तुलसीपुर उपमहानगरपालिकामा विभिन्न सरोकारवाला निकायबीच छलफलसमेत भएको छ। छलफलमा खेलकूदलाई मध्यनजर गरी स्वागतद्वारा निर्माण, बृहत् सरसफाइ, खेलाडीका लागि उचित आवासको व्यवस्था, स्वागत तथा सम्मान, प्रचारप्रचारलगायतका काम गर्ने निर्णय गरिएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782043740-1782045652.jpeg)
-1764146706.png)
