दुई छोरी गुमाएकी रोजिया खातुन भत्किएको घरमा। हुरीका कारण उनले गुमाएकी छोरी सबनमको मंगलबार टिकाटालो गर्ने टुंगो लागेको थियो। उनका अन्य दुई छाेरीको उपचार भइरहेको छ। तस्बिरः निमेषजंग राई
फेटा, बारा- ‘आजका दिनगला स-समान, कपडास किन्के...’ यति भनिसकेपछि रोजिया खातुन बोल्न सकिनन्। हावाहुरीले भत्काएको घरको छेउमा उभिएकी रोजियाका आँखा ओसिला देखिन्थे। उनले आफ्नै भाषामा आफ्नो पीडा पोखिन्।
केहीबेर गफ गरिसकेपछि भने उनी भावुक भइन् र आफ्नै भाषामा भनिन्, ‘कपडा समेत छेकिसकेका थियौं। तर..’
बाराको फेटा गाउँपालिकाको पुरैनियाकी रोजिया अहिले शोकमा छिन्। आइतबार साँझपख आएको हावाहुरीले उनको घरमा पनि ठूलै क्षति पुर्यायो। जसको पीडा सुनाउदा सुनाउँदै उनी रुन थालिन्।
रोजिया खातुन।
हावाहुरीले घर भत्काएपछि उनका दुई छोरी पुरिए। उक्त घटनाबारे उनका छिमेकी अस्मुदिन अन्सारीले हामीलाई सोमबार नै सुनाएका थिए। त्यसको उद्धारकर्तामध्येका उनी पनि एक थिए। हामी भोलिपल्ट यसबारे थप बुझ्न रोजिया खातुनको घर पुगेका थियौं।
कलैयाबाट झन्डै ५ किलोमिटर कच्चीबाटोको यात्रा गरेपछि रोजियाको घरमा पुगियो। भत्किएका भग्नावशेषले रोजियाको घर एल आकारको भएको अनुमान लगाउन सकिन्थ्यो। इँटा र माटोको गाह्रो लगाएको एकतले रोजियाको घर पूर्णरुपमा भत्किएको थियो।
घरकै आडमा रहेको अर्को पिल्लर बिनाको पक्की घर भने सद्दे थियो। अगाडिका आँपका बोटहरु ठुटोमा परिणत भएका थिए। त्यही भग्नावशेषमा भेटिइन् रोजिया, उनका श्रीमान मन्जुर आलम मिया र छोरा रिजवानुल्ला अन्सारी।
भत्किएको घर हेर्दै रोजिया खातुन।
छिमेकी अस्मुदिनले सुनाएका थिए, ‘सबनमको त्यहीँ मृत्यु भएको थियो। रुबीलाई अस्पताल लैजाँदै गर्दा बाटोमै मृत्यु भयो।’
यी मृतक सबनम र रुबी रोजियाका छोरी हुन्। हावाहुरीकै कारण घर भत्किएर उनीहरुको मृत्यु भएको थियो।
१८ वर्षीया सबनम खातुन रोजियाकी छैंटौ छोरी हुन्। उनीभन्दा माथिका ५ दिदीको विवाह भइसकेको थियो। उनको विवाह बाराकै एक युवासँग हुने टुंगो भइसकेको थियो।
मंगलबार सबनमको विवाहका लागि टिकाटालो गर्ने निधो भएको थियो। तर दुर्भाग्य! सबनमको विवाह परिवारले गर्न पाएनन्। छोरीको ज्यान गएको ठाउँ नजिकै बसेर रोजियाले आफ्नो पीडा सुनाइन्, ‘चौकीको मुनि लुकेर बसेको थियो। पर्खाल गिरेछ। चौकी भाँचियो। अनि च्यापिएर..।' यसपछि उनी बोल्न सकिन्न। आँखामा आँशु छल्काइन्। खनि शिरमा राखेको मजेत्रो निकालेर अनुहार छोपिन्। विरह र दुःखको शब्द सुन्न सकिन्थ्यो।
खाटलाई उनीहरू चौकी भन्ने रहेछन्। हुरी आएपछि खाटमुनि लुकेका रोजिया र रुबी दुबैले ज्यान गुमाए।
खाटमुनि रोजिया, रुबी र उनीहरूको भिनाजु बसेका रहेछन्। रोजियाको घरमै ज्यान गयो। रुबी सख्त घाइते भएकी थिइन्। उपचारका लागि अस्पताल लैजाँदै गर्दा बाटोमै मृत्यु भयो। भिनाजूको उपचार भइरहेको छ।
उनीहरुका दुई बहिनी अर्थात् रोजियाका अन्य दुई छोरी नसिमा र जसिमा खातुन घाइते छन्। उनीहरुको उपचार भइरहेको छ।
त्यसदिन रोजियाका छोरा रिजवानुल्ला भने ससुराली घोडसरा भन्ने ठाउँ गएका रहेछन्।
‘म ससुराली गएको थियो। त्यहाँ पुग्नेबित्तिकै हावाहुरी आयो। पछि घरबाट फोन आएपछि दुर्गदै आएँ। तर बहिनीलाई बचाउन सकिनँ।'
मृतक रुबी भने स्थानीय विद्यालयमा कक्षा ३ मा पढ्थिन्। सबनम भने मदरसामा पढ्थिन्। उनीहरु दुबैको सोमबार नै परिवारले दाहसंस्कार गरे।
रोजियाका ९ दिदी बहिनीमध्ये ५ जनाको विवाह भइसकेको थियो। २ छोरी हावाहुरीमा गुमे। घाइते दुई छोरीको उपचार भइरहेको छ।
रोजियाका छोरा रिजवानुल्ला। ससुराली गएकाले उनी भाग्यले बाँचे तर दुई बहिनी बचाउन सकेनन्। राहत सामग्री लिएर फर्कँदै।
मजदुरी र खेतिपाती गरेर पेट पाल्दै आएको रोजियाको परिवार अहिले छिमेकीको घरमा शरण लिएको छ। दुई बहिनी गुमाएका रिजवानुल्ला भने राहत बोकर भत्किएको घरतर्फ लाग्दै थिए हामीले भेट गरेको समयमा।
सबै तस्बिर : निमेषजंग राई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
