इजादर मिया : जसले श्रीमती, बुहारी र २ नातिनी एकसाथ गुमाए

फिचर

इजादर मिया : जसले श्रीमती, बुहारी र २ नातिनी एकसाथ गुमाए भन्छन्- मेरो परिवार त्यहीँ छ, इटा पन्छाएर छिटो निकाल

नारायण अधिकारी मंगलबार, चैत १९, २०७५ २१:०७

श्रीमती, बुहारी, र २ नातिनी गरी ४ जना गुमाएका इजदार मियाँ। उनको होस गुमेको छ। तस्बिर : निमेषजंग राई

नारायण अधिकारी/पुरनिया, फेटा- 'छोरो घाइते भएर निकालिएको ठाउँमा मेरा बाँकी परिवार त्यहीँ छ। छिटो इँटा पन्छाएर निकाल,' उमेरले ७० को दशक पार गरिसकेका इजादर मिया खातुन परिवार गुमाउनुको पीडामा अहिले यसरी बर्बराउन थालेका छन्।

लामो सेत्तै फुलेको कपाल। खपटे परेका गाला। शोकमा डुबेकाले चिउँडोतिर फर्किएको नाक। रसिला आँखा। रिपोर्टिङका क्रममा बिहान ११ बजेतिर हामीले उनलाई देख्दा यस्तै देखिन्थे, उनी।

गत आइतबार बारामा आएको हावाहुरीका कारण कसैको सबैभन्दा बढी क्षति भएको छ भने त्यो उनै इजादर मिया हुन्। दिउँसो ११ बजे छिमेकीको पक्का घरको मूल ढोकाबाट एकोहोर हेर्दै उनी टोलाइरेहका थिए।

छिमेकीको घरमा आश्रय लिएका मिया।

हामीले उनीसँग कुरा गर्ने आँट समेत गर्न सकेनौं। श्रीमती, बुहारी र २ नातीनी गरी चार जना बित्दाको पीडा कस्तो हुन्छ, साउद उनैलाई मात्र थाहा हालो। झन्डै १० मिनेट हामीले उनको गतिविधि नियालेका थियौं। उनले एकै शब्द पटकपटक दोहोर्‍याएका थिए, ‘छोरो घाइते भएजस्तै मेरी श्रीमती, बुहारी, दुई नातिनी पनि घाइते भएर त्यहीँ घरमा पुरिएका छन्। छिटो इँटा पन्छाएर उनीहरुलाई उपचार गराउन पठाओ।’

उनी यसैगरी एकोहोरो बर्बराइरहन्थे। इँटा र माटोको गाह्रो र कस्याङले छाएको घर हुरीले तहसनहस भएपछि उनलाई छिमेकीका घरमा ल्याएर राखिएको थियो। उनी पटकपटक आफ्नो भत्किएको घर जाने र परिवारका सदस्यको उद्धार गर्ने भन्दै जान खोज्थे। तर आफन्तले उनलाई रोके।

हामीलाई रिर्पोटिङको लागि अन्त पनि जानु थियो। धर्मनगरमा इँटा भट्टामा पुरिएर ५ जनाको मृत्यु भएको सुनेपछि हामी त्यसतर्फ लाग्यौं। धर्मनगर पुगेर फर्किएपछि उनको जिद्धीलाई कसैले नकार्न सकेनछन्। आफन्तले दुबै हात च्याप्दै त्यही उराठलाग्दो घर पुर्याएका थिए।

अचेत अवस्थामा रहेका मिया। घटनास्थलतर्फ हात समातेर लैजाँदै छिमेकी। उनलाई अझै सोही स्थानमा परिवारका सदस्य जीवितै छन् जस्तो लागिरहन्छ। र भन्छन्-चाँडै उद्धार गरिदेओ।

४ सदस्य गुमाएका इजादर भाग्यले बाँचे
इजादर बाँच्नुमा भाग्य नै मान्छन् उनका आफन्त। इजादरका सम्धी अर्थात् एनके मोहम्मद अन्सारीका अनुसार उनी मुस्लिम धर्मअनुसार गरिने एक पवित्र पूजा जमातको निम्तो भन्न त्यसदिन अन्य गाउँ पुगेका थिए उनी। रात परेपछि उनी उतै बसे र भाग्यले बाँचे।

इजादरको घरमा त्यसदिन उनकी श्रीमती, अमिना खातुन, बुहारी, सकिमा खातुन, छोरा साहबुद्धिन र २ जना छोरीका एकएक जना छोरी गरी ५ जना थिए। राति खाना खाएर सुत्ने बेला भइसकेको थियो। त्यति नै बेला पश्चिमबाट पूर्णतर्फ जोडले हुरी चल्यो। सुरुमा हवाइजहाज उडेको जस्तो आवाज लागेको थियो। पछि घर नै उडाउन थालेपछि हावाहुरी आएको थाहा पाएको उनीहरुका आफन्तले बताए।

इजादरका घरमा भएका ५ जनामध्ये चार जनाको इहलिला त्यही घरमै सकियो। उनीहरुलाई आफन्तले अस्पतालसम्म पुर्याउनसम्म सकेनन्।

इजादरको घरमा २ जनाको पश्चिम दक्षिणतर्फको कोठामा च्यापिएर मृत्यु भयो। १ जनाको दक्षिणतर्फको कोठामा च्यापिएर घटनास्थलमै ज्यान गयो। अर्का एक जना सदस्य भने पूर्वी दक्षिणको कोठामा च्यापिएर मृत्यु भएको थियो। घटनास्थलमा भएको रगतको टाटा देखाउँदै उनका आफन्त महुन अन्सारीले देखाए।

भाग्यले बाँचे इजादरका एक नाती
इजादरका घाइते छोरा साहबुद्धिन अन्सारीका छोरा तथा इजादरका नाती साहेब अन्सारी भने त्यस दिन भाग्यले बाँचे। अन्दाजी १३ वर्ष जतिका साहेब अन्सारीलाई हामीले उनका हजुरबुबा इजादरसँगै छिमेकीको घरमा शरण लिएको अवस्थामा भेटेका थियौं।

मियाको छोराको छोरा सहायद अन्सारी। हुरी चलेका दिन उनी मामाघर भएकाले भाग्यले बाँचेका थिए।

सेतो वस्त्रमा भेटिएका उनीसँग आफ्नो आमा, हजुरआमा र दुई बहिनीहरु गुमाउनुको पीडा झल्कन्थ्यो। उनीसँग पनि हामीले कुरा गर्न सक्ने अवस्था थिएन।

एकछिनमा उनी दौडिएर राहत लिन लाइनमा लागे।

अहिले हजुरबुबाको हेरचाह गर्दै आएका यी साहेब पनि भाग्यले नै बाँच्न सफल भएका थिए। उनी त्यसदिन झन्डै एक घन्टा टाढा रहेको मामाघरमा शनिबारमात्र गएका थिए।

मामाघर बसेका दुई नातिनीलाई बाँकी राखेन हुरीले
इजादरका दुई छोरीका एकएक जना छोरी अर्थात् नातिनी इजादरसँगै बस्थे। नजिकैको मदरसामा पढाउने भन्दै उनले नातिनीलाई आफूसँगै ल्याएका थिए। नातिनीहरुको मदरसा पढाई पनि राम्रै थियो।

तर बिडम्बना बितन्डा मच्चाउने गरी आएको हुरीले १०/१२ वर्षका दुई नातिनी पनि निल्यो।

आफ्नी छोरी गुमाएपछि इजादरकी छोरी घटनास्थलमै गएर आँसुमा नुहाउँदै थिइन्।

मियाकी छोरी। हुरीका कारण उनकी एक छोरी, आमा, भाउजु र दिदीकी छोरीको मृत्यु भएको छ।

उनका ससुरा नेक मोहम्मद नाती बाकेर घटनास्थल अवलोकन गर्दै भन्दै थिए, 'उमेर यति भइसक्यो, अहिलेसम्म यस्तो हावाहुरी देखेको थिएन।' घटनास्थलमा उनी आफ्नो नाती अर्थात् मृतक बालिकाको भाइ लिएर पुगेका थिए।

मियाका सम्धी मोहम्मद अन्सारी। उनकी एक नातिनीको हुरीका कारण मृत्यु भएको छ।

चारैजनाको शव एकै ठाउँमा गाडियो
मुस्लिम पराम्पराअनुसार मृतकको शव गाड्ने चलन छ। परिवारमा विपत्ति आइपरेको खबर पुगेपछि इजादर सोमबार बिहानै आफ्नो घर फर्किएका थिए। उनीसँग अल्लाहलाई पुकार्नुको विकल्प थिएन।

अहिले पनि बेलाबेलामा पुकारिरहन्छन्। मृतक श्रीमती, बुहारी र दुई नातिनीको शव उनले मुस्लिम परम्पराअनुसार नजिकैको शव गाड्ने ठाउँमा गाडे।

तर उनलाई यसको कुनै होस नै छैन। विश्वास लागेको छैन, आफ्नै परिवारका चार जनाको मृत्यु भएको र बेलाबेला भनिरहन्छन्, 'उनीहरुको चाँडो उद्धार गरिदेओ।' आफैं पनि उद्धारका लागि जान खोज्छन्।

घाइते छोराको अवस्था सुधारोन्मुख
साहबुद्धिन अन्सारी मात्रै बाँचेका उनको घरमा त्यसदिन। त्यही पनि उनी सद्धे रहन सकेनन्। टाउको, पेट र खुट्टामा चोट लागेको छ। उनलाई उपचारका लागि वीरगंजको नेशनल मेडिकल कलेजमा भर्ना गरिएको छ। उनको अवस्था सुधारोउन्मुख भएको जानकारी डाक्टरले दिएको उनका आफन्तले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।