पत्नि र बुहारी गुमाएका रामसुरत दास मलीन मुद्रामा, नातिनीका साथमा। तस्बिर: निमेषजंग राई।
नारायण अधिकारी/फेटा,बारा- बाराको फेटा। बीचमा तन्नाले ओढाएर छोपिएको शव छ। वरपर मान्छेको भीड। कोही पर्पुरोमामा हात राखेका छन् त बाँकीको रुवावासी छ। कोही कराउँछन्।
राहतका लागि दिन लागिएको एक पोको चाउचाउ र बिस्कुट लिनका लागि पनि तँछाडमछाड छ।कसैलाई भने तीनै दृश्य क्यामेरामा कैद गर्न भ्याइनभ्याइ छ। यो दृश्य हो, बाराको फेटा गाउँपालिका-१ का भलुवहीको।
वरपका सबै घर हुरीका कारणा तहसनहस बनेका छन्। उखरमाउलो गर्मी छ। कोही कम्मरभन्दा माथि नांगै छन्। सेन्डो गन्जीमात्रै धेरै पुरुषका उपल्लो शरीर ढाक्ने वस्त्रका नाममा। बाँसको झाँडको जरै उखलिएको छ। फेटाको भलुवही उराठलाग्दो छ।
आइतबार साँझ आएको हावाहुरीले सखाप पारेको बाराको फेटा।
यसै त गाँउ सबै उजाड बनाएको छ, आइतबार साँझ आएको हावाहुरीले। त्यहीबीचको एक घरमा भने पीडाको सीमा छैन परिवारका जीवित सदस्यमा। एकै परिवारका सासु र बुहारीले ज्यान गुमाए हिजोकै हावाहुरीका कारण।
५५ वर्षीया सासु मोतिसरा देवीको हावाहुरीका कारण घटनास्थलमै ज्यान गयो। उनको कम्मरमा रड पसेको थियो। आमा बितेको पीडा मोतिसराको छोरा ३२ वर्षीय भीम दासमा छँदै थियो।
उक्त समयमा उनले रुन समेत पाएनन्। आँसुलाई लुकाउँदै गोरखामा भएका बुबा तथा मृतक मोतिसराका श्रीमान् रामसुरत दासलाई राती नै फोन लगाए। आत्तिदै आमा बितेको खबर गर्दै घर बोलाए।
आफ्नी श्रीमतीको मृत्यूको खबर। त्यो पनि फोनमार्फत्। छोराले जानकारी गराएपछि रामसुरत दासका नौनाडी गले। 'यस्तो पनि भयो होला र जस्तो लाग्थ्यो। होइन होला जस्तो लाग्थ्यो। छोराले भनेपनि विश्वास गर्न सकेको थिइनँ,' नेपाल लाइभ टोलीसँग उनले भने। उनको घर पुग्दा उनका अति मलीन देखिन्थे।
मोतिसरा देवीको मृत्युपछि आफन्तको विरह।
विश्वास नगर्नुको विकल्प पनि थिएन। रामसुरत दास सुनाउँछन्। उज्यालो भएपछि गाउँ जाने गाडी चढे।
हामीले रामसुरत दासको घरमा पुग्दा उनी आइसकेका रहेछन् गोरखाबाट। उनी गोरखामा बिजुलीका काम गर्छन्। आफ्नी श्रीमती मोतिसराको लास घरको भग्नावेशमा पुगेको पिँढीमा राखिएको थियो। वरपर झिँगा समेत भन्किन थालिसकेका थिए।
मोतिसरा देवीको शव रुग्दै आफन्त तथा छिमेकी।
तर त्यसको झण्डै १० मिटर पर उनका श्रीमान् रामसुरत दास २ वर्षीया नातिनीलाई काखी च्याप्दै मलिन अनुहार लिएर बसेका थिए। सायद रातभर र बिहानभर रुँदारूँदा उनका आँखाका आसुका सकिएका होलान्। त्यही भएर उनी मलिन मात्रै देखिन्थे। 
पत्नि र बुहारी गुमाएका रामसुरत दास मलीन मुद्रामा, नातिनीका साथमा।
घटना कसरी भयो भन्नेसम्म आफूले केही जानकारी नपाएको फोनमा छोराले हावाहुरीका कारण यस्तो भएको बताएपछि मात्रै थाहा पाएको उनले बताए।
गोरखाबाट २ बजे आफ्नो गाउँ ओर्लिएपछि पनि उनले आफ्नी मृतक श्रीमतीको लास हेर्न सकेका रहेनछन्। काखीमा च्यापेकी नातीनी रुँदै थिइन्। उनले मलीन स्वरमा नेपाल लाइभसँग श्रीमतीको शव हेर्न आफूले नसकेको बताए।
उता रामसुरतलाई श्रीमतीको मरेको खबर गर्ने छोरा भीम दासकी श्रीमती पनि गम्भीर घाइते भएकी थिइन्। उनलाई पर्साको नारायणी अस्पतालमा छोरा भीम दासले लगे। यता आमाको पीडामा रहेका भीमलाई अर्को बज्रपात परको थियो। आमा पनि गुमाउनु, श्रीमती पनि गम्भीर घाइते हुनु। पर्नु बज्रपात परेको थियो। तर परिस्थिति सामना गर्नुको विकल्प थिएन।
आमा गुमाएको सबै पीडालाई बिर्सेर उनी श्रीमतीको उपचारमा खटिए। उनलाई लागेको थियो, आमा बिते पनि श्रीमती रेणुले साथ नछोड्लिन्। तर दैवको लीला कस्ले टार्न सक्थ्यो र? दैवले उनलाई झन् ठुलो दशामा हुत्यायो।
सोमबार बिहानीपख अस्पतालका डाक्टरले रेणुलाई मृत घोषणा गरे।
भीम उता एक वर्षीय छोरालाई काखी च्यापेर वीरगञ्जमा श्रीमतीको शव कुरेका कुर्यै छन्। उनका बाबु यता २ वर्षीया नातीनी काखी च्यापेर आफ्नी श्रीमतीको लास रुँघेका छन्।
छिमेकी हरिशंकर दास भन्छन्,' सबैभन्दा पीडामा या परिवार छ सर। यस्तो पीडिा कसैलाई नहोस्। बिचरा! गरिब मान्छे ज्यामी र खेतीपाती गरेर खाने मान्छे। उसैलाई यस्तो परो,' नेपाल लाइभसँग यति भनेका छिमेकी हरिशंकर थप कुरा बोल्न खोज्दै थिए तर उनको गला अवरुद्ध भयो।
मोतिसराको घर पूर्ण रुपमा भत्किएपछि तत्कालै उद्दारमा स्थानीयबासी खटिएका थिए। तर मोतिसरालाई बचाउन सकेनन्। उनको कम्मरमा रड पसिसकेको थियो।
टाउको कम्मर र खुट्टामा चोट लागेकी मोतिसराले पीडा सहन सकिनन्। बरु त्यही पीडाकै साथमा परलोक भइन्।
उनी त गइन्। तर परिवारमा झन् पीडादायी अवस्था सिर्जना भयो। परिवारकी अर्की सदस्य उनकै बुहारीको पनि अन्तत मृत्यु भयो।
अब रामसुरत दाससँग छोरा भीम, एक वर्षीय नाती र २ वर्षीया नातिनी मात्रै छन्। अबको भविष्य के हुने हो उनी आफैंलाई थाहा छैन। उनले कुनै प्रतिक्रिया जनाउन सकेका छैनन्।
सबै तस्बिरः निमेषजंग राई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
