मनोज न्यौपाने/काठमाडौं- उनी कक्षा ४ मा पढ्थिन्। त्यही बेला गुरूकूलमा ‘मधुमालती’को कथामा आधारित नाटकमा अभिनय गर्नु पर्ने भयो। नाटक करिब १७ दिन चल्यो। त्यहीँबाट सुरु भयो मलिका महतको अभिनय यात्रा। बालापनमै भएपनि ऊ बेला दर्शकको रोजाई र नाटकपछिको स्यावासीले उनलाई पुलकित बनायो। त्यो बेलाको झ-झल्को उनको दिमागमा अझै ताजै छन्।
त्यही समयबाट नै मलिकामा अभिनयको रस पसेको थियो। एक प्रकारको लक्ष्य स्थापित भएको थियो। भविष्यमा के गर्ने? आफन्त र साथीभाइका प्रश्नमा एउटै जवाफ फर्काउथिन्, ‘मलाई अभिनय मन पर्छ,’ उनी थप्छिन् ‘विद्यालयमा रामबाबु रेग्मी सरले नाटक पढाउनु हुन्थ्यो। कारणबस विद्यालयबाट बाहिरिनु भयो त्यसपछि नाटकको माहोल रोकियो। तर म कक्षा ८ मा पढ्दै गर्दा रेग्मी सरको विद्यालयमा पुनः आगनमा भयो। अनि फेरी म नाटकमा जोडिन पाँए।’
उनले कक्षा ११ मा पढ्दा पनि नाटक गर्ने अवसर पाइन्। सँगै दुइवटा म्युजिक भिडियोमा पनि मलिकाले आफ्नो अभिनय देखाउने अवसर पाइन्। गायक स्वप्न सुमनको ‘म तिम्रो’ र उमंगराज श्रेष्ठको ‘फ्लोजन गाइज’ बोलका गीतमा मलिकाले मोडलिङको अवसर पाइन्।
पेसाले व्यापारमा संलग्न बुबा र ज्योतिष आमाकी छोरी मलिका व्यवस्थापन संकायकी विद्यार्थी। उनलाई घरबाट भविष्यमा यो वा ऊ बन्नुपर्छ भन्ने प्रेसर कहिल्यै आएन। तरपनि भविष्य अन्यौल बनेको महसुस गरिरहन्थिन्। पढाइ, थोरै-थोरै मोडलिङ, घरका सामान्य काम र सामाजिक सञ्जाल ‘इन्स्टाग्राम’मा फोटो राख्ने मलिकाको दैनिकीको एक भाग जस्तै थियो।
तर उनलाई के थाहा, इन्स्टाग्राममा राखिएका फोटोले करियरमा छलाङ मार्न सकिन्छ भनेर। उनले अभिनय गरेका दुई म्युजिक भिडियो तिनै इन्स्टाको तस्बिर हेरेर आएका अफर थिए। सुनाउछिन्, ‘जतिपनि मलाई अभिनयको अफर आए। सबै इन्स्टाको फोटोबाटै आएका छन्। बेलाबेला त निकै ‘लक्की’ फिल हुन्छ।’
मलिकाको जीवनमा इन्स्टाको फोटोको कथा दुई म्युजिक भिडियोमा मात्र सिमित छैन। यही चैत २९ गतेबाट प्रदर्शनमा आउन लागेको फिल्म ‘यात्राः अ म्युजिकल भ्लग’ फिल्ममा मलिका मुख्य भुमिकामा देखिँदै छिन्। उनको यो ठूलो पर्दाको डेब्यु अभिनय हो। फिल्म ‘यात्रा’का लागि पनि मलिकालाई इन्स्टाको फोटोले नै जोडेको हो।
मन्द मुस्कानमा सुनाउँछिन्,‘इन्स्टामा मैले इ-मेल एड्रेस राखेकी थिएँ। एउटा मेल आयो। निर्देशक सम्राट शाक्यको मेल रहेछ। पछि थाहा भयो फिल्मको स्क्रिप्ट अनुसारको क्यारेक्टर खोजेको लामो समयपछि मेरो इन्ष्टाको फोटो हेरेर मेल गर्नु भएको रहेछ।’
मेलमा के लेखिएको थियो? केही समयको मौनतालाई चिर्दै भनिन्,‘सबैकुरा त याद छैन, फिल्मका लागि लामो समयदेखि कथाअनुसारको पात्र खोजिएको रहेछ तर नभेटिएकाले अडिसन चलिरहको छ। इच्छुक हुनुहुन्छ भने अडिसन दिन सक्नुहुन्छ यस्तै-यस्तै थियो।’
त्यसपछि उनले फिल्म युनिटलाई भेटिन्। वान लाइन स्टोरी सुनिन्। कथा मन पर्यो। अभिनयका लागि राजी भइन्। फिल्मको क्यरेक्टरका बारेमा केही रोमन्टिक हुँदै सुनाइन्,‘सोचेकै थिइनँ, यस्तो क्यारेक्टरमा अभिनय गर्नुपर्छ भनेर। अलिअलि डर अनि अलिअलि उत्साह मनमा बढ्दै गयो। एक अन्धी ‘ब्लाइन्ड लेडी’ जो संगीतको सामिप्यतामा हराएकी छन्।
सहरको भिडभन्दा धेरै टाढा गाँउमा एउटा टुंगनाका साथमा आफ्नै पिडा बोकेर गुञ्जनु पर्ने। कथाले मागेका दृष्यमा न्याय गर्नुपर्ने। प्रेसर भारी पर्दै गएको थियो।’ बोल्दाबोल्दै मलिकाको बोली अड्कियो, लामो सास फेरिन् र भनिन्, ‘तर जति सोचेको थिँए उति धेरै गाह्रो भएन। सायद टिम वर्क बलियो भएर होला।’
शारीरिक अशक्तता, सांगीतिक रस, टुंगनाको धुन अनि मौलिक र यथार्थपरक अभिनय मलिकाका लागि उति सहज पक्कै थिएन। यसका लागि उनले ३ महिनासम्म निरन्तर मेहनत गरेकी छन्। ‘एकातिर कलेजको पढाइ, अर्कातिर फिल्मका लागि वर्कसप। मलाई निकै गाह्रो भएको थियो।
तर मैले आफ्नो भूमिकालाई फिट बनाउन मेहनतको पनि उतिकै खाँचो थियो। अझ क्यारेक्टरका हिसाबले धेरै चुनौती पनि थियो। मैले आँखा नदेख्नेहरुसँग संगत गरे, उनीहरूसँगै खाने हिड्ने। उनीहरूकै नक्कल गर्न थालें।’ मलिका अझ खुल्न थालिन्,‘उनीहरूसँगको संगत पछि घरमा पनि अभ्यास जारी राखें। कहिले पट्टी बाँधेर, त कहिले साथीहरूको साहारामा आँखा नदेख्नेसरह अभिनयमा म तयार भएछु।’ यति भनिसकेर उनी खिस्स हासिन्।
अनि टुंगना? हत्त न पत्त जवाफ फार्काइन्,‘उम टुंगना पनि मैले त्यही बेला सिकेको हो। वर्कसपकै बेला टुंगना पनि बजाउन सिके। यो मेरो अभियन यात्रामा जोडिएको नयाँ अनुवभ हो। यसबाट फिल्म युनिट प्रति आभारी छु।’
फिल्ममा मलिकाले भने जस्तै ‘ब्लाइन्ड लेडी’ तपस्याको भूमिकामा छिन्। उनी काठमाडौंबाट भ्लग (भिडियो) बनाउँदै यात्रामा निस्किएका युवा समिप पुग्छिन्। त्यसपछि शीर्ष पात्र तपस्याको कथावस्तुमा अन्य पात्रहरू रुमलिइरहेको यसअघि सार्वजनिक ट्रेलरमा देख्न सकिन्छ। मलिकाका साथमा छन् अभिनेता सलिनमान बनिया, सलोन बस्नेत, जान्हवी बस्नेत, प्रेक्षा ब्रजाचार्य, रेयर राईलगायतका साथीहरू।
मलिकाको फिल्म ‘यात्रा’को सुटिङ यात्रा समापन भएको छ। फिल्मका केही प्रचारात्मक विषयवस्तु गीत तथा ट्रेलरसमेत सार्वजनिक भइसकेका छन्। दर्शक प्रतिक्रिया पनि सकारात्मक नै रहेको सुनाउँछिन् मलिका। भन्छिन्,‘म र परिवार त फिल्मको ब्यग्र प्रतीक्षामा छौं। मेरा साथीहरू झनै प्रतीक्षामा छन्। सबैजना फिल्म आउने दिन पर्खन गाह्रो भयो भन्दै सुनाउछन्।’
पहिलो फिल्मका लागि प्रतिक्षा ब्यग्र भएपनि त्यस पछिको फिल्मी यात्राका बारेमाभने मलिका दिशाविहीन छिन्। फिल्म ‘यात्रा’को दर्शक प्रतिकृया र सफलतासँग जोडिएको छ उनको बाँकी जिन्दगीको यात्रा। भन्छिन्,‘फिल्म ‘यात्रामा जोडिएपछि केही अफर आए तर चैत २९ अर्थात् फिल्म प्रदर्शनपछिको प्रतिक्रिया पर्खिरहेकी छु। आशा छ, दर्शकले फिल्म मन पराउनु हुनेछ। र बाँकी अभिनय यात्रा पनि सहज हुनेछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
