काठमाडौं– गएरातिको हावाहुरी तथा असिनाले बारा र पर्सा जिल्लामा पुर्याएको क्षतिको स्थिति बुझ्न प्रधानमन्त्री त्यसतर्फ जाने भएका छन्। सोमबार झापाको दमकमा आयोजित एक कार्यक्रममा छोटो सम्बोधन गर्दै प्रधानमन्त्रीले आफू वीरगन्ज जान लागेकाले कार्यक्रम आयोजक तथा उपस्थितसँग अनुमति लिन आएको बताए।
'म त्यहाँको स्थिति कस्तो छ, के गर्न सकिन्छ, सरकारले के गर्नुपर्छ भनेर हेर्न म त्यता जाँदैछु', उनले भने, 'त्यसकारण मैले गौरादहको कार्यक्रम स्थगित गरेको छु।'
प्रधानमन्त्री विभिन्न कार्यक्रममा सहभागिताका लागि देशको पूर्वी क्षेत्रमा थिए।
उनले हावाहुरीले पुर्याएको क्षतिप्रति एकदमै दुःखी भएको प्रतिक्रिया दिए। 'हिजो बेलुकादेखि नै म यस कुराले निकै चिन्तित र दुखित छु', उनले भने, 'जसको ज्यान गएको छ, उहाँहरुप्रति श्रद्धासुमन व्यक्त गरेको छु। जुन परिवारमा दु:ख आइपरेको छ, त्यस्ता परिवारमा मैले समवेदना व्यक्त गरेको छु। घाइतेहरुको शीघ्र स्वास्थ्य लाभको कामना गरेको छु। उहाँहरुको उपचारको प्रबन्ध गरेको छु।'
प्रधानमन्त्रीले स्थानीय निकाय, जनप्रतिनिधि, पार्टीका कार्यकर्ताहरु, संघसंस्थाहरु सबैलाई परिचालित हुन आग्रह गरेको जानकारी दिए।
'प्रदेश २ को मन्त्रिपरिषद् बैठक बसेर राहत सहयोगको निर्णय गर्न भनेको छु', प्रधानमन्त्रीले भने, 'उहाँहरुले त्यस अनुसार निर्णय गरिसक्नुभएको छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
