नेपाल मजदुर किसान पार्टीका अध्यक्ष नारायणमान बिजुक्छेले आसन्न निर्वाचनका लागि उम्मेदवारी नदिएपछि राजनीतिक वृत्तमा एकखालको तरंग छाएको छ। सधैं भक्तपुरमा उम्मेदवार बन्दै र जित्दै आएका बिजुक्छे यसपटक चुनाव लड्दै छैनन्। किन त? उनीसँग किशोर दहालले गरेको कुराकानी:
यस पटक किन उम्मेदवारी दिनुभएन?
यसपटक पार्टीले नयाँ पुस्तालाई अगाडि बढाउने र स्थान दिने रणनीति बनाएको छ। मैले पार्टीमा लामो समय काम गरेँ। जनताले पनि माया र विश्वास गर्नुभयो। संसदमै २५ वर्षभन्दा बढी काम गरेँ।
अहिले हाम्रो पार्टीका युवा पुस्ताको प्रस्तुति पनि निकै राम्रो छ। त्यसैले पनि नयाँ पुस्तालाई अगाडि ल्याउन चाहेका हौं। मलाई लाग्छ, यसले देश र जनताको सेवाको लागि राम्रै हुनेछ।
संसदमा जाने बाटो नै नरोजेपछि तपाईंको आगामी सक्रियता के हुन्छ?
म पार्टीमा छु नि! अध्यक्ष छु, अहिले पनि। त्यसैमार्फत सक्रिय रहिरहन्छु।
वाम गठबन्धनबाट डराउनुभएको त होइन नि?
होइन। उनीहरुले हामीलाई हराउन सक्दैनन्।
भक्तपुर १ का लागि नयाँ उम्मेदवार बनेका तपाईंका पार्टीका सदस्यले कस्तो मत ल्याउने अपेक्षा गर्नुभएको छ?
राम्रो मत ल्याउनुहुन्छ। चार वर्षदेखि प्रेम सुवालले सदनमै सक्रिय भूमिका खेल्नुभएको छ। उहाँले राम्रो छवि बनाउनुभएको छ। त्यसैले पनि कार्यकर्ता र जनताले राम्रो सहयोग गर्नेछन्। मत दिनेछन्।
मेरो जति सांगठनिक मत आएको थियो, त्यति उहाँले पनि पाउनुहुन्छ। म उठे पनि, साथीहरु उठे पनि मत उस्तै हुन्छ।
तपाईंको आवश्यकता त संसदमै बढी थियो होला नि!
संसदको यो कार्यकालमा मैले राम्रो काम नै गर्न सकिनँ। किनभने, त्यहाँ बोल्नै दिँदैनन्। संसद पहिले जसरी चल्थ्यो, आजकाल त्यसरी चल्दैन। सदन जसरी चल्नुपर्ने हो, त्यसरी चल्न सकेको छैन। यस्तो बेलामा नयाँ पुस्तालाई नै लैजानुपर्ने ठानेर यस्तो निर्णय गरिएको हो।
संसद नै मूल्य मान्यतामा नरहेको महसुस गर्ने तपाईं जस्तो मानिसले छाडिदिँदा अरुलाई झन् सजिलो हुँदैन र?
हाम्रा साथीहरु त संघर्षरत छन् नि। गणपुरक संख्याको बारेमा निरन्तर सचेत बनाउने हामी नै हौं। तर, गणपुरक संख्या नपुगे पनि विधेयक पास गर्न थालेका छन्। यस्तो बेलामा हाम्रो साथीहरुले आवाज उठाएका छन्, विरोध गरेका छन्। उहाँहरुको सक्रियताले धेरै राम्रो काम पनि भएका छन्। त्यसैले पनि उहाँहरुलाई अगाडि बढाउनुपर्छ। त्यसका लागि यो उपयुक्त समय पनि हो।
नयाँ पुस्ता अगाडि बढेपछि वा उनीहरुलाई त्यसका निम्ति सहयोग गरेपछि देश पनि अगाडि बढ्छ नि।
अब तपाईं पार्टीको संगठन विस्तारमा सक्रिय हुने हो?
हो। म त्यतातिर सक्रिय हुन्छु।
के छन् त्यसका लागि योजना?
जनतालाई सैद्धान्तिक कुरा बुझाउनु जरुरी छ। अहिले वाम गठबन्धन गरिरहेका दलहरु खासमा वामपन्थी नै होइनन् भन्ने कति जनतालाई थाहै छैन। जनतालाई झुक्याइरहेका छन्। यस्तै कुरामा मेरो ध्यान जान्छ। गलत कुरालाई भण्डाफोर गर्छु।
हामीले चुप लागेकाले नै नक्कली कम्युनिस्टहरु अगाडि बढ्न थाले। सक्कली कम्युनिस्टहरुलाई अगाडि बढाउन जिम्मेवारी बाँडफाँट गरेको हो।
सांसद नै नभए पनि मेरो जिम्मेवारी कम हुँदैन। मैले पूरा गर्नुपर्ने मेरो दायित्व त्यहाँ नभए पनि पूरा गर्छु नै।
निकै लामो समय संसदमै रहेर राजनीति गर्नुभयो। अहिले त्यहाँबाट बाहिर आउन खोज्दै हुनुहुन्छ। विगतमा सरकारका कुनै पदमा नबसेकोमा पछुतो लाग्दैन?
लाग्दैन। मैले आफ्नो आस्थाको राजनीति गरेँ। अब त मैले त्यहाँको जिम्मेवारी पनि साथीहरुलाई सुम्पेर संगठनको काम गर्न पाएँ, यो निकै राम्रो कुरा हो।
भनेपछि, नयाँ नारायणमान बिजुक्छे जन्माउने अभियानमा हुनुहुन्छ?
हाहाहा। जनताका छोराछोरी राम्रा हुन्छन् नि! हाम्रा नयाँ युवाहरु लेनिनवादी ढंगले नै अगाडि बढ्छन्।
तपाईं संगठनतिर केन्द्रित भएपछि अर्कोपटक आउने संसदीय चुनावमा पार्टीको आकार र गुण कस्तो होला भन्ने अपेक्षा छ?
त्यो बेला आकारप्रकारले भन्दा पनि गुणले अगाडि बढ्छौं। आकार अलिअलि बढ्ला तर गुणचाहिँ निकै बढ्छ। नेपालको कम्युनिस्ट राजनीतिलाई सैद्धान्तिक रुपमा नयाँ दिशामा अगाडि बढाउनेछौं।
अहिले त गुण्डा-डन सबै कम्युनिस्ट भएका छन्। लाजमर्दो भएको छ। त्यसैले पनि हामी खासमै माक्र्सवादी, लेनिनवादी पार्टीका रुपमा नयाँ ढंगले अगाडि बढेर देखाउँछौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
