काठमाडौं- मापदण्ड विपरीत भर्ना लिएर विद्यार्थीलाई परीक्षाबाट बञ्चित बनाउने कार्यमा लागेका कलेज र विश्वविद्यालका पदाधिकारीलाई कारबाही गर्न नेपाल विद्यार्थी संघले माग गरेको छ।
पोखरा विश्वविद्यालय अन्तर्गत सम्बन्धन लिएका ४२ कलेजमा भर्ना भएका ३ सय ९१ विद्यार्थी परिक्षाबाट वञ्चित भएका छन्।
कलेजहरुले विश्व विद्यालयको प्राज्ञिक परिषदले गरेको प्रावधान विपरित विद्यार्थी भर्ना गरेका थिए।
परिषदले ‘सि’ग्रेड भन्दा कम ल्याएकालाई भर्ना नलिने मापदण्ड बनाएको थियो। तर, कलेजहरुले विद्यार्थी संख्या बढाउनका लागि ‘डि’ प्लस ल्याएका विद्यार्थीलाई पनि भर्ना गरेका थिए । मापदण्ड विपरित भर्ना भएका विद्यार्थीहरु परिक्षामा सहभागी हुन नसक्ने अडान राखेपछि भर्ना भएका विद्यार्थी अलपत्र परेका छन्।
विद्यार्थीहरुको संख्या बढाउन विधि विपरीत कार्य गरेका कलेजलाई कारबाही गर्न माग गर्दै नविसंघका कार्यकर्ता आन्दोलनमा उत्रेका थिए।
आन्दोलनरत विद्यार्थीहरुलाई प्रहरीले आइतबार विहान पक्राउ गरेको थियो।
संघले पत्रकार सम्मेलन गरि विद्यार्थीको समस्या समाधान गर्न विश्वविद्यालयले अग्रसरता लिनुपर्ने संघका निर्वतमान महासचिव कुन्दनराज काफ्लेले बताए । उनले भने ‘मापदण्ड विपरित भर्ना लिने कलेज र त्यस कार्यमा सहयोग गर्ने विश्वविद्यालयका पदाधिकारीलाई कारबाही हुनुपर्छ।’
कलेजको मनपरी विरुद्ध आन्दोलनमा उत्रेका १२ विद्यार्थीलाई प्रहरीले पक्राउ गरेको थियो।
पक्राउ पर्नेहरूमा नवराज त्रिपाठी,मनिष सिम्खडा,चेत राज कँडेल(सुजन),पौल बज्राचार्य,अर्बत खड्का,केयुर न्यौपाने,कृष्ण पुडासैनी,सरोज थापा,प्रशान्त थापा,दिपेश ओलि,निराज घिमिरे र सुरज ऐर छन्। उनीहरुलाई महेन्द्र पुलिसमा राखिएको संघले जनाएको छ।
पक्राउ परेकालाई निसर्त रिहा गर्न संघले माग गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
