धरान- सुनसरीको बराहक्षेत्र नगरपालिकास्थित चतरामा चैत २३ देखि शुरु हुन लागेको एकमहिने अर्धकुम्भ मेलाको संयोजन प्रदेश सरकारले गर्ने भएको छ।
मेला आयोजक र प्रदेश १ का मुख्यमन्त्री शेरधन राईको छलफलले आन्तरिक मामिला तथा कानूनमन्त्री हिक्मत कार्कीलाई अर्धकुम्भ मेलाको संयोजनको जिम्मेवारी दिइएको छ।
शुक्रबार चतरामा भएको कुम्भमेला तयारीसम्बन्धी सर्वपक्षीय छलफलमा प्रदेशका आन्तरिक मामिला तथा कानूनमन्त्री हिक्मत कार्कीले कुम्भमेला सफल बनाउन प्रदेश सरकारले आर्थिक, भौतिकदेखि सम्पूर्ण सहयोग गर्ने बताए।
मेलाको सफलताका लागि सबै स्थानीय तह, निजी क्षेत्र र सरकारी क्षेत्रलाई परिचालन गरिनेसमेत जानकारी दिए। चैत २० सम्ममा चतरा पुग्ने चारैतिरका सडक मर्मत गरिसक्ने र विभिन्न नाकादेखि नै प्रवेशद्वारा राखिने, यातायात, स्वास्थ्य, खानेपानीलगायतको सम्पूर्ण पूर्वाधार तयारका लागि सबैलाई निर्देशन दिएको उनले बताए।
भारतमा चार वटा कुम्भ मेला लाग्दै आएको छ। नेपालमा अर्काे कुम्भ मेला गरी विश्वमा पाँच वटा कुम्भ मेला हुने कुरा स्थापित गर्न चतरामा बस्दै आएका कुम्भ मेलाका परिकल्पनाकार नेपालका प्रथम जगतगुरु बालसन्त मोहनशरण देवाचार्यले ठूलो योगदान दिएका छन्।
बराहक्षेत्र नगरपालिकाका प्रमुख निलम खनालले मेलाका लागि आवश्यक खर्च तथा तयारीका बारेमा जानकारी गराएका थिए।
वैशाख २४ सम्म लाग्ने अर्धकुम्भमा चैत २६, वैशाख ६, २१ र २४ गते हुने स्नानमा देशविदेशका एक करोड हिन्दू धर्मावलम्बी सहभागी हुने आयोजकले जनाएको छ।
चतरामा २०५९ सालमा पहिलोपटक कुम्भ मेला लागेको थियो। त्यसपछि २०६३ मा अर्धकुम्भ र २०७० मा पूर्णकुम्भ लागेको थियो।
प्रत्येक १२ वर्षमा कुम्भ र ६ वर्षमा अर्धकुम्भ मेला लाग्ने गरेको छ।
भारतको नासिक, इलाहावाद, उज्जैन र हरिद्वार गरी चार स्थानमा कुम्भ मेला लाग्ने गर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768982215.png)
-1764146706.png)
