काठमाडौं– आइसिसी यु–१९ विश्वकप एसिया छनोटको तयारीका लागि भारतमा रहेको नेपाली यु–१९ टिमले अभ्यास खेलमा जित चौथो हात पारेको छ। पहिलो अभ्यास खेलमा पराजित नेपाली युवा टिमले बिहीबार भएको पाँचौ अभ्यास खेलमा आन्द्रा यु–१९ टिमलाई ५ विकेटले पराजित गर्दै लगातार चौथो जित हात पारेको हो।
पहिले ब्याटिङ गरेको आन्द्राले ५० ओभरमा ८ विकेटको क्षतिमा २ सय २० रन जोड्यो। नेपालले २ सय २१ रनको लक्ष्य ४८.२ ओभरमा ५ विकेटको क्षतिमा पार गर्यो।
नेपालको जितमा तेस्रो नम्बरमा ब्याटिङ गरेका मोहमद आसिफ शेखले ६५ रन जोडे। उनले ९७ बलमा ४ चौका र १ छक्का हिर्काए। ओपनरद्वय अभिषेक बस्नेतले ७ रनर पवन सर्राफले ३ रन भन्दा बढी जोड्न सकेनन्। रविकुमार साहले ३७ जोडे भने रोहिकुमार पौडेलले ४५ रनको योगदान दिए। कप्तान रोहितले ५१ बलमा ३ चौका र १ छक्का हिर्काए। भीम सार्कीले नटआउट ४५ रन जोडे। उनले ३३ बलमा ३ चौका र २ छक्का प्रहार गरे। कुलश मल्ल ६ रनमा नटआउट रहे।
त्यसअघि आन्द्राका लागि रवि किरणले ४५ रन, सुब्रमन्यमले ३८ रन र धरनी कुमारले ३७ रनको योगदान दिए। बलिङमा नेपालका सूर्य तामाङ र पवन सराफले २–२ विकेट लिए। कमलसिंह ऐरी, प्रतिश जिसी र भीम सार्कीले १–१ विकेट लिए।
नेपालले यहि महिना मलेसियामा हुने आइसिसी विश्वकप छनोटमा भाग लिँदैछ। विश्वकप छनोटको तयारी गर्न नेपाली टिम अहिले भारतको आन्द्रा प्रदेशमा छ। आन्द्रामा तयारीपछि नेपाल मलेसिया प्रस्थान गर्नेछ। जहाँ नेपालसहित आयोजक मलेसिया, कुवेत, ओमान, सिंगापुर र युएईले भाग लिँदैछन्। शीर्ष एक टिम युवा विश्वकपमा छनोट हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
