काठमाडौं- चैत १५ र १६ गते काठमाडौंमा आयोजना हुन लागेको लगानी सम्मेलन २०७५ को सबै तयारी पूरा भएको छ।
अर्थमन्त्रालयमा आयोजित पत्रकार सम्मेलनमार्फत अर्थमन्त्री डा. युवराज खतिवडाले सम्पूर्ण तयारी पूरा भएको बताएका हुन्।
सम्मेलनको तयारी नीजि क्षेत्र र सरकारको साझा प्रयासबाट भएको हो। सम्मेलन उत्सव मात्रै नभई नेपाललाई विश्वसामु चिनाउँदै सम्भावित आयोजनाहरुको चिनारी गराउने सञ्जाल पनि भएको अर्थमन्त्री खतिवडाको भनाइ छ।
‘सम्मेलन बर्षैपिच्छे हुँर्दैन, २०४७ को परिवर्तनपछि संविधान सभाबाट संविधान जारी भएपछि हामीले २ पटक लगानी सम्मेलन गरिसकेका छौं,’ अर्थमन्त्री खतिवडाले भने, 'यसपटको लगानी सम्मेलन २०७३ को लगानी सम्मेलनको जगमा रहेर उपलब्धलाई समृद्धितर्फ डोर्याउन आयोजनालाई कार्यान्वयनमा लैजान सक्ने गरी सम्मेलन हुँदैछ।’
लगानी सम्मेलनमा ४० मुलुकका उच्चस्तरीय प्रतिनिधिमण्डल लगायत ६ सयभन्दा बढी लगानीकर्ताको उपस्थिति हुनेछ।
सम्मेलनको उद्घाटन प्रधानमन्त्री केपी शर्मा ओलीले गर्नेछन्। सम्मेलनमा लगानी बोर्डले कृषि, जलविद्युत, उद्योग, पर्यटन, यातायात, सहरी पूर्वाधार एवं शिक्षा स्वास्थ्य क्षेत्र सम्बन्धी सार्वजनिक क्षेत्रका ५० र नीजि क्षेत्रका २७ गरी ७७ वटा परियोजना प्रस्तुत गरिनेछ । सम्मेलनमा करिब १ दर्जन विभिन्न समझदारीपत्र तथा सम्झौतामा हस्ताक्षर हुनेछ।
पत्रकार सम्मेलनमा बोल्दै अर्थमन्त्री खतिवडाले लगानी सम्मेलनलाई तथा विदेशी लगानी आकर्षित गर्न एकद्वार सेवा प्रणाली लागू गर्न सरकारले पहल गरिरहेका कारण प्रशासनिक र प्रकृयागत झन्झट नहुने विश्वास व्यक्त गरे।
'अन्तर्राष्ट्रिय मुद्रा कोष, विश्व बैंकलगायतले नेपालमा लगानी गर्ने वातावरण छैन भन्ने रिपोर्ट सार्वजनिक गरेकामा हामीले त्यसलाई आधिकारिक होइन भन्दै आएका छौं। विश्व बैंकले डुईङ बिजनेसको ईन्डेक्सलाई सच्याउने भनिसकेको छ,' मन्त्री खतिवडाले भने, 'जोखिमको प्रिमियममा देखिने समस्या समाधानका लागि क्रेडिट रेटिङ र विनिमय सम्बन्धी प्रिमियमको लागि हेजिङ गर्ने सुविधालाई कार्यान्वयन गर्न लागिएका कारण लगानीको सुरक्षा बढी हुनेछ।'
पूँजी बजारमा नयाँ खालका उपकरण ल्याएर विदेशी ऋण दिनेले ईक्विटीमा पनि सहभागि गराउन सक्ने व्यवस्था लागु गर्न सरकारले पहल गर्ने उनले बताए।
पहिलेको तुलनामा करप्रणालीमा पनि सुधार भएको खतिवडाको भनाई थियो । ‘लगानीकर्ताले करका दर प्रतिस्पर्धी होउन भन्ने चाहान्छन । हामी प्रतिस्पर्धी हुन पनि खोजिरहेका छौं दक्षिण एसियामा हाम्रो कर प्रणाली राम्रो छ, विश्वस्तरीय छ,’ खतिवडाले भने।
नेपालमा लगानीको वातावरण बनिसकेको छ : निजी क्षेत्र
दुई तिहाईको सरकारले आर्थिक समृद्धिलाई नै मूख्य प्राथमिकतामा राखेको र लगानी वातावरण सिर्जना हुन नदिने ऐन/नियम परिमार्जन भईरहेकाले अहिले नेपालमा लगानीको वातावरण बन्दै गएको नीजि क्षेत्रका प्रतिनिधिले धारणा राखेका छन्।
नेपाल उद्योगा वाणिज्य महासंघका अध्यक्ष भवानी राणाले सरकारले गर्न लागेको यो लगानी सम्मेलन नीजि क्षेत्रका लागि पनि सकारात्मक रहेको भन्दै नीजि क्षेत्रले सधै त्यसको स्वागत गर्ने धारणा राखिन्।
‘शक्तिशाली सरकार आएको छ। नेपालमा लगानीको वातावरण बनेको छ। ऐन कानुनहरु संशोधन भईरहेका छन्। निजी क्षेत्रका गुनासा सरकारले सुन्न थालेको छ। वैदेशिक लगानी तथा प्रविधि हस्तान्तरण सम्बन्धी ऐन अहिले संशोधन भएर थप उदार भएर आएको छ,’ राणाले भनिन्।
नेपाल चेम्बर अफ कमर्सका अध्यक्ष राजेशकाजी श्रेष्ठले पहिला ठूला लगानीकर्ताले नेपालमा लगानी वातावरण रहे/नरहेको बारे दूतावासमा सोध्ने गरेकामा अहिले नीजि क्षेत्र सरकार र सम्बन्धित निकायसम्मै जाने गरेको भन्दै बिस्तारै लगानीको वातावरण बन्दै गएको धारणा राखेका थिए।
त्यसैगरी, नेपाल उद्योग परिसंघका अध्यक्ष हरिभक्त शर्माले यो लगानी सम्मेलनमार्फत् लगानीकर्ताको नेपाल प्रतिको संशय हटाउने राम्रो अवसर भएको बताए।
‘विगतमा नेपाल लगानी गर्नका लागि राम्रो गन्तव्य मानिदैन थियो। तर अहिले त्यस्तो छैन,' शर्माले थपे, 'लगानीकर्ताले आज सम्झौता गरेर भोलि नै नेपालमा पैसा नखन्याए पनि उनीहरु कुनै न कुनै हिसाबले चाँसो दिईरहेका छन।’
लगानी सम्मेलनमा विप्लवको सुरक्षा थ्रेट
लगानी सम्मेलनलाई मध्यनजर गर्दै सुरक्षा व्यवस्था पनि चुस्त पारिएको सरकारले जनाएको छ। लगानी सम्मेलनप्रति नकारात्मक धारणा राख्दा र विरोध गर्दा हामी आफैंलाई घाटा हुने भन्दै अर्थमन्त्री खतिवडाले आफैं पराजित हुने बाटोमा कोही लाग्न नहुने बताए।
‘नेपालमा लगानी गर्ने वातावरण बनाउन सकिएन भने भोलि हामी आफैं रोजगारीका लागि विदेशिनुपर्ने अवस्था झन विकराल बन्दै जान्छ। सरकारका तर्फबाट सुरक्षाका सबै तहलाई चुस्त दुरुस्त राखेका छौं। सबैले सहयोग गर्नुहोला,’ खतिवडाले पत्रकार सम्मेलनमा उपस्थित सबैसँग आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
