काठमाडौं– एएफसी यु–२३ च्याम्पियनसिप छनोट फुटबल प्रतियोगिताअन्तर्गत नेपालले तीनै खेल गुमाएको छ।
नेपाल मंगलबार राति भएको तेस्रो खेलमा अफगानिस्तानसँग पराजित भएको हो। कतारको दोहास्थित स्पोर्ट्स सिटी सेन्टरमा भएको खेलमा नेपाललाई अफगानिस्तानले २–० ले हरायो। उसका लागि दुवै गोल सुलिमान साहले गरे। उनले खेलको २४ र ३४ मिनेटमा गोल गरेका थिए।
यसअघि लगातार दुई खेलमा पराजयसँगै नेपालका प्रतियोगिताबाट बाहिरिएको थियो। शुक्रबार भएको पहिलो खेलमा नेपाल ओमनसँग १–० गोलअन्तरले पराजित भएको थियो भने आइतबार भएको समूह चरणको दोस्रो खेलमा नेपाल कतारसँग ५–० गोलअन्तरले पराजित भयो। यता अफगानिस्तान कतारसँग २–० को हार बेहोर्यो भने दोस्रो खेल ओमनसँग २–१ गोलले पराजित भयो।
अफगानिस्तानले नेपालविरुद्ध सान्त्वना जित हात पार्न सफल भयो। नेपालको यात्रा भने सुखद रहन सकेन। तीनै खेलमा पराजित भएको नेपालले कुनै गोल गर्न सकेन भने ८ गोल खायो।
सन् २०२० को जनवरी ८ देखि २६ सम्म थाइल्याण्डमा हुने एएफसी यू–२३ च्याम्पियनसिपका लागि छनोट चरणमा विभिन्न ११ समूह थिए। नेपाल समूह ‘ए’ मा परेको थियो। नेपालको समूहबाट कतार छनोट भयो। अन्तिम खेलमा ओमानसँग २–२ को बराबरी खेलेको कतार गोलअन्तरमा अघि रहदै छनोट भएको हो।
प्रत्येक समूहको विजेता टोली, उपविजेतामध्ये उत्कृष्ट चार टोली र आयोजक थाइल्याण्ड गरी १६ टोलीले फाइनल चरणमा स्थान बनाएका छन्।
यसैबीच नेपाली टिम मंगलबार राति नै स्वदेश फर्किएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771592819.png)
