काठमाडौँ- नेपालमा इ–लाइब्रेरीको विकास भए पनि सार्वजनिक पुस्तकालयमा आएर अध्ययन गर्ने पाठकको सङ्ख्यामा कुनै कमी आइहालेको छैन।
समाजका हरेक वर्ग, समुदाय, जातजाति, अपाङ्गता भएका, बालबालिका, वृद्घलगायतलाई विनाभेदभाव सेवा दिने उद्देश्यले २०६० सालमा स्थापित काठमाडौँ उपत्यका सार्वजनिक पुस्तकालयमा दैनिक १०० भन्दा बढी पाठक आउने गरेको जनाइएको छ।
दशैँ तथा तिहारजस्ता केही पर्वमा पाठकको सङ्ख्या अलि घट्ने गरे पनि अरू बेला पाठकको सङ्ख्या मासिक तीन हजारभन्दा बढी नाघ्ने गरेको सो पुस्तकालयले जनाएको छ। पुस्तकालयका ऋतेश नेवाका अनुसार सो पुस्तकालयमा बौद्ध धर्मसम्बन्धी पुस्तक धेरै तथा हिन्दू धर्मसम्बन्धी पुस्तकलगायत इसाई धर्मसम्बन्धी बाइबलजस्ता पुस्तक पनि केही छन्। विद्यालय तथा कलेजका पुस्तकबाहेक अन्य अधिकांश पुस्तक उपलब्ध गराई पाठकको सेवा गरिएको नेवाले जानकारी दिए।
डा नारायण खड्का नेतृत्वमा रहेको सो पुस्तकालयमा ५० हजारभन्दा बढी पुस्तक, प्रतिवेदन, पुस्तिका तथा पत्रपत्रिका छन्। पुस्तकालयलाई विस्तार गर्न नेपाल लाइब्रेरी फाउण्डेशन, क्यानडाले इ–लाइब्रेरी सञ्चालन गर्न सात कम्प्युटर र एक प्रिन्टर तथा ७३२ थान पुस्तक खरिद गर्न आर्थिक सहयोग गरेको थियो। सो पुस्तकालयले २०६७ सालदेखि इ–लाइब्रेरी सेवा पनि सञ्चालन गर्दै आएको छ।
त्यस्तै ब्रिटिस काउन्सिलसँगको साझेदारीस्वरुप काउन्सिलले आठ हजार थान पुस्तक उपलब्ध गराएको थियो। पुस्तक अध्ययन कक्ष, बाल पुस्तकालय र विद्युतीय पुस्तकालय रहेको सो पुस्तकालयमा संस्कृत भाषा, नेपाल भाषा तथा हिन्दी भाषाका ५० हजार थान पुस्तक तथा शैक्षिक सामग्री त्यहाँ बसी पाठकले अध्ययन गर्न पाउनेछन्।
पुस्तकालयमा अध्ययन गर्न आएका गुल्मीका पाठक रामबहादुर भण्डारीले कम्प्युटर तथा ल्यापटपको जमाना सुरु भए पनि त्यसबाट पाठकको पढ्ने तिर्खा नमेटिने भएकाले सार्वजनिक पुस्तकालयको महत्वमा कुनै कमी नभएको बताए।
नेवाका अनुसार भर्खरका केटाकेटीले साहित्यको पुस्तक तथा पत्रपत्रिका अध्ययन गर्न रुचाउने तथा वृद्धवृद्धाले धार्मिक पुस्तक खोज्ने गरेको पाइन्छ। २०६५ मा पुस्तक लेनदेन सेवा सुरु गरिएको थियो। हाल सो पुस्तकालयमा एक हजार ६०० सदस्य छन्। वार्षिक रु ३०० तथा धरौटी शुल्क रु एक हजार तिरेर सदस्य बन्न सकिन्छ। सरकारको प्रत्यक्ष अनुदानबाट सञ्चालन भएको सो पुस्तकालयका लागि वार्षिक रु २० लाखको बजेट छ। पुस्तकालयको विकासका लागि एशिया फाउण्डेशनको सहयोग तथा लेखक स्वयंबाट पाठकका लागि पुस्तक उपलब्ध हुने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
