गाईघाट- डेढ वर्षदेखि सिमेन्ट उत्पादनमा फड्को मार्दै आएको देशकै सबैभन्दा ठूलो सरकारी स्वामित्वमा रहेको उदयपुर सिमेन्ट उद्योगले सिमेन्ट उत्पादनको क्षमता वृद्धि गर्दै लगेकाे छ। तर, विद्युत आपूर्तिका कारण समय–समयमा सिमेन्ट उत्पादनमा भने उद्याेगले समस्या झेल्दै आएको छ।
एक महिनासम्म धनुषा-ढल्केबर क्षेत्रबाट सिमेन्ट उद्योगमा आएने विद्युतकाे आपूर्तिमा समस्या आएको कारण सिमेन्ट उत्पादनमा ह्रास आउन थालेको हाे। गएकाे एक सातादेखि विद्युत आपूर्तिकाे समस्या हल भएपछि भने उद्योगले दैनिक १८ हजार बोरा सिमेन्ट उत्पादन गर्न थालेको छ।
सिमेन्ट उद्योगका निमित्त महाप्रबन्धक नवलकिशोर साहका अनुसार तीव्र गतिमा उद्योगले सिमेन्ट उत्पादन गरिरहेको बेला गत माघको पहिलो हप्तादेखि फागुनभर धनुषा-ढल्केबर विद्युत आपूर्ति केन्द्रबाट नियमित विद्युत आपूर्ति नहुँदा उद्योगमा सिमेन्ट उत्पादन कार्यमा ह्रास आएकाे थियो। तर, अहिले सम्बन्धित निकायमा ध्यानाकर्षण गराएर विद्युत आपूर्ति सहज भएपछि एक हप्तादेखि उद्योगले दैनिक १८ हजार बोरासम्म अर्थात् ८ सय मेट्रिक टनभन्दा बढी गैँडा छाप सिमेन्ट उत्पादन गर्न थालेको छ।
उद्योगको सिमेन्ट उत्पादन गर्ने पूर्ण क्षमता दैनिक ८ सय मेट्रिक टन हो। डेढ वर्ष अघिसम्म विद्युत आपूर्तिकै कारण घाटामा रहेको उदयपुर सिमेन्ट उद्योगले याे समस्याकाे समाधान भएपछि वार्षिक अर्बौं रुपैयाँको आम्दानी गर्न थालेको छ। तर, पटक–पटक हुने विद्युत अवरोधको कारण उद्योगले सोचेजस्तो सिमेन्ट उत्पादन गर्न नसक्दा घाटा व्यहोर्नुपरेको उद्योग प्रशासन बताउँछ।
अहिले विद्युत् आपूर्ति सहज भएपछि सिमेन्ट उद्योगले प्रत्येक दिन ३ करोड रुपैयाँ मूल्य बराबरको सिमेन्ट उत्पादन गर्न सुरु गरेको उद्योग प्रशासनले बताएको छ। उद्योगमा अहिले ४ सय ३९ मजदूर तथा कर्मचारी रहेका छन्। कर्मचारीका लागि मासिक १ करोड ३२ लाख रुपैयाँ र विद्युतमा अढाइ करोड रुपैयाँ खर्च हुने गरेको बताइएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
