काठमाडौं- गुल्मीमा माइक्रोबस दुर्घटना हुँदा ७ जनाको मृत्यु भएको छ।
बुटवलबाट गुल्मीको सदरमुकाम तम्घास आउँदै गरेको बा४ख ५५०१ नम्बरको माइक्रो गुल्मीदरबार गाउँपालिका वडा नं ४ मा दुर्घटना भएको हो।
दुर्घटनामा ६ जना घाइते भएको जिल्ला प्रहरी कार्यालयका प्रहरी उपरीक्षक अनुरागकुमार द्विवेदीले जानकारी दिए। बुटवलबाट १३ जना यात्रु लिएर उक्त माइक्रोबस तम्घास आएको थियो।
दुर्घटनमा मृत्यु हुनेहरुको सनाखत हुन सकेको छैन। प्रहरी र स्थानीयवासी उद्धार कार्यमा जुटिरहेको प्रमुख जिल्ला अधिकारी गोपाल आर्यालले जानकारी दिए। 'घाइतेको अवस्था हेरेर प्रहरीलाई पाल्पा पठाउन भनिएको छ,' उनले भने।
दुर्घटनाको कारण खुल्न सकेको छैन। गाडीमा चालकसहित १५ जना रहेकामा अन्य दुई जना बेपत्ता छन्।
यसैगरी, उदयपुरको कटारीबाट ओखलढुंगा जाँदै गरेको ना१ज ३४०४ नंको सुमो जिप दुर्घटना हुँदा ८ जनाको घटनास्थलमै मृत्यु भएको छ। मृत्यु हुनेहरुमा एक महिला र ७ पुरुष रहेका छन्। उनीहरुको सनाखत हुन बाँकी रहेको जिल्ला प्रहरी कार्यालय उदयपुरले जनाएको छ। ८ जना घाइतेको उपचारका लागि कटारी पठाइएको छ। दुर्घटनामा एक बालक भने सकुशल भेटिएको इलाका प्रहरी कार्यालयका प्रमुख महेन्द्रकुमार श्रेष्ठले बताए।
दिउँसो २ बजे कटारी नगरपालिका–११ मा सो दुर्घटना भएको हो। जिप कटारी–११को खाँडी भन्ने ठाउँमा सडकबाट ४०० मिटर तल खसेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
