इटाली– ५१ जना स्कुले विद्यार्थी सवार बसलाई अपहरण गरी चालकले आगो लगाइदिएका छन्। इटालीको मिलान नजिकै स्कुले बसका चालकले विद्यार्थीलाई बसभभित्रै राखी आगो लगाइदिएका हुन्।
घटनामा कोही पनि विद्यार्थी गम्भीर घाइते नभएको मिलान प्रहरीले जनाएको छ। बसमा आगो लागिरहँदा विद्यार्थीलाई पछाडिको ढोका तथा झ्यालबाट बाहिर निकालिएको थियो। आगो लागेपछि बसभित्रै केहीबेर निसास्सिएका कारण १४ जना विद्यार्थीमा श्वासप्रश्वासको समस्या देखिएको बताइएको छ।
आगो लगाउने ४७ वर्षीय चालक ओसिनौ साईलाई भने पक्राउ गरिएको छ। उनी सेनेगलबाट आएको भएपनि इटालीको नागरिकता लिएको बताइएको छ। पक्राउ परेपछि घटनाको जिम्मेवारी लिँदै उनले सबै विद्यार्थीलाई मार्न चाहेको बयान दिएका छन्।
मिलानका मुख्य अभियोजनकर्ता फ्रान्सिस्को ग्रेसोले भने, ‘यो एक अचम्मको घटना हो, यसबाट कुनै नरसंहार हुनसक्थ्यो।’
बसमा सवार शिक्षकले भने चालक साइ इटालीको आप्रवासन नियमसँग रुष्ठ रहेको बताएका छन्। सोही नियमका कारण समुद्रमा धेरै आप्रवासीहरुले अकालमा ज्यान गुमाउनु परिरहेकोप्रति उनले रोश प्रकट गर्दै घटना घटाएको हुनसक्ने शिक्षकहरुले बताएका छन्।
‘उनी चिच्याइरहेका थिए, समुद्रमा मान्छे मर्ने सिलसिला रोकियोस्, नत्र मैले नरसंहार गर्नेछु’, चालक साईको भनाइलाई उद्धृत गर्दै प्रहरी प्रवक्ता माक्रो पालमिरीले बताए।
अभियोजनकर्ता ग्रेसोका अनुसार चालकमाथि अपहरण, हत्या प्रयास, आगलागीबाट क्षति पुर्याउन खोजिएको लगायतमा मुद्दा दायर हुनेछ।
सरकारी पक्षले भने अझैपनि उनीमाथि आतंकवादीको मुद्दा दायर गर्न चाहेको ग्रेसोले बताए। उनले यसअघि पनि दुर्व्यवहार तथा लागुपदार्थ सेवन गरी सवारी चलाएको अभियोग खेपिसकेको प्रहरीले बताएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
