काठमाडौं– एसिसी यू–१९ एसिया कपको लागि नेपाली युवा क्रिकेट टिम घोषणा गरिएको छ। युवा टिमका प्रशिक्षक विनोदकुमार दास तथा एसिसीका प्रतिनिधि वेन्कापति राजुको छनोट समितिले दीपेन्द्रसिंह ऐरीको कप्तानीमा नेपाली टिम आइतबार घोषणा गरेको हो।
टिममा गत महिना मलेसियामा एसिसी यू–१९ पूर्वी क्षेत्रीय प्रतियोगिता खेलेका अधिकांश खेलाडी छन्। सन्दीप जोरा र विक्रमकुमार भुसाल वैकल्पिकमा झारिएका छन्। नन्दन यादवले चोटका कारण नाम फिर्ता लिएका थिए। भीम सार्की, रसिद खान र जितेन्द्र सिंह टिममा पर्न सफल भएका छन्। जितेन्द्र पहिलो पटक युवा टिममा परेका हुन्।
१५ सदस्यीय नेपाली टिमले मलेसियामा हुने यू–१९ एसिया कपअघि बंगलादेशमा अभ्यास गर्नेछ। नेपाली युवा टिम सोमबार बंगलादेश प्रस्थान गर्ने कार्यक्रम छ।
तयारी क्रममा नेपालले बंगलादेशको यू–१९ टिमसँग ३ वटा अभ्यास खेल खेल्नेछ। नेपालले बंगलादेशको युवा टिमसँग १६, १८ र १९ कात्तिकमा एकदिवसीय अभ्यास खेल खेल्नेछ।
२३ कात्तिकदेखि मलेसियामा हुने यू–१९ एसिया कपमा नेपालसहित ८ टिमको सहभागिता हुनेछ। प्रतियोगितामा नेपालसहित भारत, पाकिस्तान, बंगलादेश, श्रीलंका, अफगानिस्तान र मलेसिया छन्। एसिसी पश्चिम क्षेत्रबाट एक टिम छनोट हुन बाँकी छ। गत महिना मलेसियामा भएको प्रतियोगिताको फाइनलमा हङकङलाई ५ विकेटले पराजित गरेर नेपाली टिम च्याम्पियन बनेको थियो। उपाधिसँगै नेपाल यू–१९ एसिया कपमा छनोट भएको थियो।
नेपाली टोली
दीपेन्द्रसिंह ऐरी (कप्तान), सन्दीप लामिछाने, मोहम्मद आसिफ शेख, सन्दीप सुनार, प्रनित थापामगर, अनिलकुमार साह, पवन सर्राफ, रोहितकुमार पौडेल, सहाब अलाम, किशोर महतो, प्रकाश केसी, कमलसिंह ऐरी, भीम सार्की, रसिद खान, जितेन्द्र सिंह
वैकल्पिक खेलाडी– सन्दीप जोरा, विक्रमकुमार भुसाल, अंकित सुवेदी, विजय चौधरी।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
