सुरुङ्गा (झापा)- झापाको विर्तामोडमा शुक्रबार दिउँसोबाट लगाइएको कर्फ्यु अझै हटाइएको छैन। कर्फ्यु नहट्दा सर्वसाधारणलाई समस्या भएको छ।
अर्जुनधारा नगरपालिका–११ का ११ वर्षीय लक्ष्मण सिवाकोटीको हत्यारालाई कानुनी कारबाहीको माग गर्दै विर्तामोडमा झडप भएपछि शुक्रबार दिउँसो १:३० बजेबाट पूर्वमा नयाँ बसपार्क, पश्चिममा चारपाने, उत्तरमा महानन्द चोक र दक्षिणमा विर्ता बजारसम्मको क्षेत्रमा कर्फ्यु लगाइएको थियो। सो क्रममा प्रहरीले चलाएको गोली लागेर अर्जुनधारा–११ का ३० वर्षीय नरेश थापाको शुक्रबार मृत्यु भएको थियो।
शनिबार प्रमुख जिल्ला अधिकारी ऋषिराम तिवारीको अध्यक्षतामा बसेको सर्वदलीय बैठकले प्रहरीले चलाएको गोली लागेर मृत्यु भएका थापाको परिवारलाई रु १० लाख राहत उपलब्ध गराउन तत्काल गृह मन्त्रालयलाई अनुरोध गर्ने लगायतका आठ बुँदे निर्णय गरे पनि विर्तामोडमा लगाइएको कर्फ्यु भने जारी छ।
कर्फ्युका कारण विर्तामोड क्षेत्र बिहानैबाट सुनसान छ। आज पनि विर्तामोड भई चल्ने लामो तथा छोटो दुरीका सवारीसाधन सञ्चालनमा आउन सकेका छैनन्। विर्तामोड क्षेत्रका विद्यालय, क्याम्पस, उद्योगधन्दा, कलकारखाना बन्द छन्।
यस्तै, झडपमा प्रहरीले चलाएको गोली लागेर गम्भीर घाइते भएका इलामको माई नगरपालिकाका ४० वर्षीय मणिकुमार नेपालीको स्वास्थ्य अवस्थामा सुधार नआएपछि थप उपचारका लागि शनिबार वीर अस्पतालको ट्रमा सेन्टर पुर्यारइएको छ। उनलाई विराटनगरबाट हेलिकप्टरमार्फत काठमाडौँ लगिएको थियो। उनको पेट र हातमा गोली लागेको छ।
यता विर्तामोडस्थित बी एण्ड सी हस्पिटलमा उपचाररत् अन्य पाँच जनाको स्वास्थ्य अवस्थामा सुधार हुँदै गएको जिल्ला प्रहरी कार्यालय झापाका प्रहरी उपरीक्षक विष्णु केसीले जानकारी दिए।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
