७० विद्यालय भवन बनाउन भारतसँग अनुदान सहयोग सम्झौता

कर्पोरेट

नेपाल लाइभ बुधबार, फागुन २२, २०७५ १७:०९

काठमाडौं- भारत सरकारको अनुदान सहयोगमा पुनर्निर्माण हुने विद्यालय सम्बन्धमा दुई अलगअलग समझदारीपत्रमा हस्ताक्षर भएको छ। भूकम्प प्रभावित सात जिल्लाका ७० वटा विद्यालय र काठमाडौं उपत्यकाका दुई ठूला पुस्तकालय पुनर्निर्माणका लागि परामर्श सेवासम्बन्धी समझदारी भएको हो।

यी समझदारीसँगै अब भारत सरकारको अनुदान सहयोगबाट पुनर्निर्माण हुने तय भएका विद्यालयको निर्माण कार्य अघि बढाउने बाटो खुलेको छ।

भूकम्पबाट क्षतिग्रस्त कूल ७२ शैक्षिक संरचनाको पुनर्निर्माणमा प्राविधिक सहयोग पुर्याउन भारत सरकारले भारतको प्रसिद्ध संस्था सेन्ट्रल बिल्डिङ रिसर्च इन्स्टिच्युट (सिबिआरआई) परिचालन गर्ने भएको छ। त्यससम्बन्धमा भारत सरकारको तर्फबाट काठमाडौंस्थित भारतीय राजदूतावासका नियोग उपप्रमुख डा.अजय कुमार र सिबिआरआईका तर्फबाट टिमलिडर डा. पूर्णिमा परिदाले हस्ताक्षर गरेका हुन्।

त्यसलगत्तै, केन्द्रीय आयोजना कार्यान्वयन इकाई (शिक्षा) का आयोजना निर्देशक इमनारायण श्रेष्ठ र भारतीय राजदूतावासको पुनर्निर्माण प्रभागकी प्रमुख सुचिता किशोरले गोरखा र नुवाकोटका आठ विद्यालयको परियोजना विशेष सम्झौता पत्रमा हस्ताक्षर गरेका थिए।

ती हस्ताक्षर कार्यक्रममा राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवाली र नेपालका लागि भारतीय राजदूत मञ्जीव सिंह पुरी उपस्थित थिए।

भारतीय सहयोगमा रामेछाप, दोलखा, सिन्धुपाल्चोक, काभ्रेपलाञ्चोक, गोरखा, नुवाकोट र धादिङ गरी ७ जिल्लाका ७० वटा माध्यमिक विद्यालयहरुको पुनर्निर्माण हुनेछन्।

त्रिभुवन विश्वविद्यालय केन्द्रीय पुस्ताकलय तथा पुल्चोकस्थित राष्ट्रिय पुस्तकालयका भवनहरु बनाइने छ।

सिबिआरआई यी विद्यालय तथा पुस्तकालय पुनर्निर्माणका लागि डिजाइन तथा परियोजना व्यवस्थापन परामर्श सेवा प्रदान गर्नेछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

हङकङका बाबार हायत कर्णाली याक्समा

गुणस्तरीय सेवा दिन टेलिकमलाई प्रधानमन्त्रीको निर्देशन

आरिफको अर्धशतकसँगै स्कट्ल्यान्डमाथि नेपालको शानदार जित