काठमाडौं - पूर्वउपप्रधान तथा पूर्व अर्थमन्त्री भरतमोहन अधिकारीको निधन भएको छ। शनिबार राति ९:३५ मा अधिकारीको निधन भएको ह्याम्स अस्पताल डेन्टल विभागका निर्देशक दिलिप थापाले जानकारी दिएका छन्।
गत माघ २४ गते ह्याम्स अस्पताल भर्ना भएका अधिकारीको विगत १६ दिनदेखि भेन्टिलेटरमा राखी उपचार हुँदै आएको थियो।
तीन दिनदेखि अधिकारीले परिवारका सदस्यहरुले बोलाउदा समेत प्रतिक्रिया जनाउन छाडेका थिए।
शनिबार दिउँसो अस्पताल परिसरमा पत्रकार सम्मेलन गरी अस्पतालले अधिकारीलाई बचाउन सक्ने संभावना न्यून रहेको जानकारी दिएको थियो।
शनिबारै अधिकारीको पछिल्लो स्वास्थ्य अवस्थाबारे जानकारी लिन नेकपाका वरिष्ठ नेता माधवकुमार नेपाल, नेता वामदेव र सभामुख कृष्णबहादुर महरालगायत अस्पताल पुगेका छन्।
लामो समयदेखि छातीको संक्रमणबाट पीडित उनलाई अस्पताल भर्ना गर्ने र डिस्चार्ज गर्ने क्रम पटक(पटक दोहोरिएको थियो।
गत पुस २३ देखि अस्वस्थ भएका अधिकारीलाई सुरुमा मेडिसिटी अस्पतालमा भर्ना गरी उपचार गरिएको थियो। त्यसपछि फेरि उनलाई धुम्बाराहीस्थित ह्याम्स अस्पताल भर्ना गरिएको थियो।
दुई पटक उपप्रधानमन्त्री समेत रहिसकेका उनी चारपटक अर्थमन्त्री समेत रहेका अधिकारीले एकपटक यातायात तथा निर्माणमन्त्रीको जिम्मेवारी समेत पूरा गरेका थिए। यसैगरी, चारै पटक सांसद भएका अधिकारी संसदीय दलको उपनेता, प्रमुख सचेतक, पार्टीको आर्थिक, उद्योग, संसदीय, अनुगमनजस्ता विभाग प्रमुख जिम्मेवारी बहन गरेका थिए।
अधिकारी अर्थमन्त्री हुँदा ल्याइएका कार्यक्रम वृद्धभत्ता र ‘आफ्नो गाउँ, आफैँ बनाऔँअभियान निकै लोकप्रिय बनेका कार्यक्रम हुन्।
वि.सं. १९९३ साल बैशाख २२ गते महोत्तरीको भमरपुरामा पिता रामचन्द्र अधिकारी र माता पूर्णकुमारी देवीका कान्छा सुपुत्रका रूपमा जन्मेका उनी सन् १९५२ मा भारतीय कम्युनिष्ट पार्टीमा आबद्ध हुँदै अविभाजित कालदेखि नै नेपाल कम्युनिष्ट पार्टीमा निरन्तर सक्रिय थिए। पूर्व कोशी प्रान्तीय कमिटी, नेकपाको तेस्रो राष्ट्रिय महाधिवेशन, केन्द्रीय न्युक्लियस गठन र नेकपा (मनमोहन समूह) हुँदै उहाँ नेकपा (माक्सबादी) केन्द्रीय नेतृत्वमा रही निर्दलीय पञ्चायती व्यवस्था विरूद्धको आन्दोलनमा क्रियाशील रहे। उनी विराटनगरमा स्थापित कानुन व्यवसायीका रूपमा समेत सक्रिय थिए। अर्थशास्त्रमा स्नातकोत्तर उनी बौद्धिक राजनीतिज्ञमा गनिन्थे। नेपालको संविधान २०४७ को मस्यौदा गर्न र नेकपा (माले) र नेकपा (माक्र्सवादी)बीच पार्टी एकता सम्पन्न गर्न उनको महत्वपूर्ण योगदान रहेको थियो।
उनकी श्रीमती सविता अधिकारी र तीन छोरीहरू लुना, लिमा र लिजा छन्।
८३ वर्षीय अधिकारी विगत एक वर्षयता पटकपटक अस्पताल भर्ना हुने र डिस्चार्ज हुँदै आएका थिए।
अधिकारीको पार्थिव शरीर अन्तिम श्रद्धाञ्जलीका लागि आइतबार बिहान ९:०० बजे देखि १२:०० बजेसम्म पार्टी केन्द्रीय कार्यालयमा राखिने नेकपाका नेता कृष्णगोपाल श्रेष्ठले जानकारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
