चितवन प्रदर्शनी केन्द्रकाे निर्माण असारभित्रै सकिने, बन्दाबन्दै ६ प्रदर्शनी सम्पन्न

कर्पोरेट

नेपाल लाइभ सोमबार, फागुन १३, २०७५ ०८:४१

चितवन- यहाँ बन्दै गरेकोे चितवन प्रदर्शनी केन्द्रमा निर्माणसँगै अन्तर्राष्ट्रिय र राष्ट्रियस्तरका प्रदर्शनी हुँदै आएका छन्। हालसम्म निर्माणको ७० प्रतिशत काम सम्पन्न भएको छ।

निर्माणकै क्रममा २ वटा अन्तर्राष्ट्रिय र ४ वटा राष्ट्रियस्तरका प्रदर्शनी भइसकेका छन्। चितवन उद्योग सङ्घको नेतृत्वमा २०७४ को असार १० गतेदेखि निर्माण थालिएकामा कात्तिक १७ गते पहिलो प्रदर्शनी भएको थियो। सङ्घका अध्यक्ष भेषराज दुवाडीका अनुसार पहिलो प्रदर्शनी अन्तर्राष्ट्रिय पोल्ट्री एन्ड लाइभस्टकको गरिएको थियो। जहाँ धेरै विदेशी कक्ष रहेका थिए। पछि अन्तर्राष्ट्रियस्तरकै कृषि, पोल्ट्री तथा डेरीसम्बन्धी प्रदर्शनी पनि भएको थियो।

यही फागुन महिनामा अन्तर्राष्ट्रिय फर्मा एक्स्पो हुँदैछ। दुवाडीका अनुसार सन् २०२० मा पोल्ट्रीको अन्तर्राष्ट्रिय एक्पोका लागि छलफल चलिरहेको छ। त्यसका अतिरिक्त अन्य धेरै उत्पादकले राष्ट्रिय र अन्तर्राष्ट्रियस्तरका प्रदर्शनीका लागि कुराकानी गरिरहेको दुवाडीले बताए।

हालसम्म राष्ट्रियस्तरका कम्युटर एसोसिएसन नेपाल चितवन शाखाले दुई वटा, उद्योग सङ्घले एउटा, नेपाल शैक्षिक परामर्श सङ्घले एउटा प्रदर्शनी सोही ठाउँमा गरिसकेका छन्।

सङ्घका उपाध्यक्ष त्रिलोचन कँडेलका अनुसार पहिलोपटक निर्माण सुरु गरेको ३ महिनामा पहिलो अन्तर्राष्ट्रियस्तरको प्रदर्शनी सुरु गरेपछि उत्साह थपिएको हो। प्रदर्शनी केन्द्रका हल छाउने काम सम्पन्न भएपछि प्रदर्शनीसमेत गरिँदै आएकामा हाल हलमा एयरकण्डिसन जडानको काम अन्तिम चरणमा पुगेको छ। यससँगै हलको निर्माणको काम सम्पन्न हुनेछ।

बाँकी ३० प्रतिशत काम आउँदो असारभित्र नै सक्नेगरी काम अघि बढेको छ। निर्माणाधीन फुडकोटको काम अन्तिम चरणमा पुगेको छ। सचिवालयको पहिलो तला निर्माण भई दोस्रो तलाको काम भइरहेको कँडेलले बताए। सचिवालय २ तले बनाइँदैछ।

केन्द्रमा प्रवेश र बाहिरिने दुवै गेट निर्माण भएका छन्। हल बाहिरका शौचालय बन्दै छन् भने टायल लगाउने काम भइरहेको छ। घरेलु तथा साना उद्योग कार्यालय भरतपुरको स्वामित्वमा रहेको करीब दुई बिघा सात कट्ठा जग्गा सङ्घले २९ वर्षका लागि भाडामा लिएर केन्द्र निर्माण सुरु गरेको हो। प्रदर्शनी केन्द्र ६० हजार वर्ग फिटको रहेको छ। ठूला उपकरण प्रदर्शनीका लागि ३० हजार वर्गफिट व्यवस्थित खुला ठाउँसमेत रहनेछ। चार हजार वर्गफिटको फुडकोट बनाइएको छ। पाँच हजार वर्गफिटको सचिवालय बन्दैछ।

प्रदर्शनी केन्द्रमा सूचना केन्द्र हुनेछ। केन्द्रबाट उद्योग, कृषि, पर्यटनलगायतको सूचना उपलब्ध गराइनेछ। सङ्घका अध्यक्ष दुवाडीका अनुसार काम सम्पन्न गर्न ४२ करोड ६४ लाख रुपैयाँ लाग्ने अनुमान गरिएको छ। रासस

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

हङकङका बाबार हायत कर्णाली याक्समा

गुणस्तरीय सेवा दिन टेलिकमलाई प्रधानमन्त्रीको निर्देशन

आरिफको अर्धशतकसँगै स्कट्ल्यान्डमाथि नेपालको शानदार जित