काठमाडौं– राष्ट्रिय जनता पार्टी (राजपा) नेपालका दुई मन्त्रीले पार्टीका सांसद र राज्यमन्त्रीले सहयोग नगर्दा मन्त्रालय चलाउन समस्या उत्पन्न भएको बताएका छन्।
राजपा नेपालको जनकपुरमा जारी तीन दिने केन्द्रीय समितिको बैठकमा वर्तमान मन्त्रीहरूले काम गर्न नसकेको भन्दै फिर्ता बोलाएर नयाँ सांसदहरूलाई मौका दिनुपर्ने कुरा उठेको थियो।
मन्त्रीहरुले काम नगरेको आरोपलाई चिर्दै प्रदेश–२ का उद्योग, पर्यटन, वन तथा वातावरणमन्त्री रामनरेश यादवले आफ्नो कार्य सिसिटीभी क्यामेरामार्फत् नै निगरानी गर्न पार्टीका सांसद र नेतृत्वलाई चुनौती दिए।
सांसदहरूले उठाएको प्रश्नको जवाफमा मन्त्री रायले आफू बिरामी भए नभएको जानकारी राख्न सिसिटिभीबाट निगरानी गर्न सांसदहरूलाई चुनौती दिए। उनले भने, ‘म बिरामी भएर मन्त्रालयको काम गर्न नसकेको आरोप निराधार हो, विकास निर्माणमा दलका नेता जितेन्द्र सोनलले सहयोग गरेनन्। सचेतक परमेश्वर साहले लगाएका आरोप मिथ्या हुन्। म बिरामी छु कि छैन क्यामेरा लगाएर हेर्दा हुन्छ ।’
मन्त्री रायको जवाफप्रति अध्यक्ष मण्डलका संयोजक महेन्द्र यादव र प्रदेशका संसदीय दलका सचेतक परमेश्वर साहले सन्तुष्टि जनाएनन्। प्रदेशको रेडबुकमा उद्योग, पर्यटन, वन तथा वातावरण मन्त्रालयको योजनामा अर्थमन्त्रीले आफ्नो योजना राख्दा काम गर्न समस्या भएको रायले नेतृत्व समक्ष जानकारी गराएको बैठकमा सहभागी एक सांसदले बताए।
समीक्षा बैठकमा सामाजिक विकासमन्त्री नवलकिशोर साह पनि दलका नेता जितेन्द्र सोनलमाथि खनिएका थिए।
मन्त्री साहले मन्त्रालयको बजेट चलाउन सोनलले सहयोग नगरेको उल्लेख गर्दै बजेटको फेहरिस्त सुनाएको सहभागी एक सांसदले बताए।
राजपाका सांसदहरूले मन्त्री साहले मन्त्रालयको बजेट फ्रिज गराएर बदनाम गराएको भन्दै बैठकमा आलोचना गरेका थिए।मन्त्रीको जवाफपछि सञ्चरकर्मीसँग कुरा गर्दै राजपा अध्यक्ष मण्डलका संयोजक महेन्द्र राय यादवले सांसदहरूले उठाएको प्रश्नको मन्त्रीहरूले जवाफ दिएको बताए।
प्रदेश सरकारको समीक्षा, त्रुटि र अन्य गतिविधिबारे जनप्रतिनिधिको अनुभव सुन्ने क्रम जारी रहेको छ,’ उनले भने, ‘बैठकमा जनप्रतिनिधिको समीक्षा भएको छ, आलोचना गरेको छैन। बैठकबाट पार्टीले ठोस धारणा बनाउनेछ।’
बैठकमा स्थानीय तहका जनप्रतिनिधिहरूले सबैभन्दा बढी कर्मचारी अभाव रहेको बताएका थिए। बैठकको निर्णय आज राति सार्वजनिक गरिने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
