भद्रपुर- नेकपा एमालेले अर्जुनधारा–११का बालक लक्ष्मण सिवाकोटीको मृत्युको विषयलाई लिएर भएको प्रदर्शनमा प्रहरीले गोली चलाएको र सर्वसाधारणलाई घाइते बनाएको प्रति दु:ख व्यक्त गरेको छ।
बालक शिवाकोटीको मृत्युका बारेमा छानबिन गरी दोषीलाई कानुनी दायरामा ल्याउन र सिवाकोटी परिवारलाई न्याय दिलाउन माग गरेको छ।
विर्तामोड नगरपालिकाका प्रमुख ध्रुवकुमार सिवाकोटीको घरमा आक्रमण गर्ने, गाडी तोडफोड गर्ने, मोटरसाइकलमा आगजनी गर्ने, पूर्वसांसद प्रेमबहादुर गिरीको मोटरसाइकल तोडफोड गर्ने, बिर्तामोड नगरपालिका बोर्ड सदस्य सुरेन राजवंशीका घरमा तोडफोड गर्ने, पार्टीका कार्यकर्ता नारायण चिमरिया लगायतलाई आक्रमण गर्ने र मनमोहन अस्पतालमा तोडफोड गर्ने जस्ता कार्यको एमालेले निन्दा गरेको छ। ‘नियोजित रुपमा गरिएको आक्रमण र तोडफोडसँगै प्रदर्शनकारीमाथि गोली चलाउने अवस्था आउनु’ सरकारविहीनताको पराकाष्ठा भएको एमाले झापाले विज्ञप्तिमार्फत जनाएको छ।
एमालेका नेता कार्यकर्ता र जनप्रतिनिधिमाथि आक्रमण गर्नेलाई कारबाहीको माग गर्दै घटनामा परी मृत्यु भएकालाई क्षतिपूर्तिसहित घाइतेलाई उपचारको माग गर्दै तोडफोड भएको सम्पत्तिको उचित क्षतिपूर्तिसहित समग्र घटनाको छानबिन गर्न पनि एमालेले माग गरेको छ।
सिवाकोटीको हत्यारा पत्ता लगाई कारबाही गर्न माग गर्दै स्थानीयवासीले शुक्रबार दिनभर विर्तामोडमा प्रदर्शन गरेका थिए। दिउँसोदेखि प्रशासनले कर्फ्यु लगाएपछि पनि स्थानीय तोडफोडमा उत्रिएपछि प्रहरीले गोली चलाएको थियो। प्रहरी कारबाहीमा अर्जुनधारा ५ का ३० वर्षीय नरेश थापाको मृत्यु भएको छ। ६ सर्वसाधारण, नेपाल प्रहरीका २७ तथा सशस्त्र प्रहरी बलका ७ जना घाइते भएका छन्।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
