विर्तामोड– झापाको विर्तामोडमा एक बालकको हत्याको घटनामा दोषीलाई कारबाहीको माग गर्दै भएको प्रदर्शनमा शुक्रबार एक जनाको मृत्यु भएपछि बढेको तनाव साँझ केही सामान्य भएको छ।
स्थिति तनावपूर्ण बनेपछि स्थानीय प्रशासनले दिउँसोदेखि कर्फ्यु लगाएको थियो । प्रदर्शनको क्रममा दिउँसो प्रहरीको गोली लागेर अर्जुनधारा–५ बस्ने वर्ष ३० का नरेश थापाको मृत्यु भएको थियो ।
आक्रोशित भिडले कर्फ्यु उल्लंघन गर्दै सरकारी सम्पत्तिमा तोडफोड गर्न थालेपछि अश्रुग्यास र गोली प्रहार गर्नुपरेको प्रहरीले जनाएको छ।
घटनामा ६ जना घाइते भएको र उनीहरुको स्थानीय बी एन्ड सी अस्पतालमा उपचार भइरहेको प्रहरी नायव उपरीक्षक हरिप्रसाद शर्माले नेपाल लाइभलाई जानकारी दिए।
घटना सम्बन्धमा शुक्रबार साँझ सर्वदलीय बैठक बसिरहेको जनाइएको छ।
दशैंको टीकाको दिन बेपत्ता भएका अर्जुनधारा नगरपालिका–११ का ११ वर्षीय लक्ष्मण सिवाकोटीको शव भोलिपल्ट विर्तामोड– १ बैसाबाडीस्थित झाडीमा भेटिएको थियो । हत्यारालाई कारबाहीको माग गर्दै शुक्रबार बिहान स्थानीयले प्रदर्शन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
