१ सय ३३ उद्योगलाई ‘एक्जिम कोर्ड’

कर्पोरेट

नेपाल लाइभ बिहीबार, फागुन २, २०७५ ०९:४१

काठमाडौं- उद्योग विभागले चालू आर्थिक वर्षमा १ सय ३३ साना, मझौला तथा ठूला उद्योगलाई आयात निर्यात कोर्ड (एक्जिम कोर्ड) प्रदान गरेको छ।

२०७४ साउन १ देखि ५० हजार रुपैयाँभन्दा बढी मूल्य बराबरको सामान आयात तथा ५ लाख रुपैयाँभन्दा बढी मूल्य बराबरको सामान निर्यातका लागि अनिवार्य रुपमा ‘एक्जिम कोर्ड’ लिनुपर्ने व्यवस्थाअनुसार चालू आवमा १ सय ३३ उद्योगलाई ‘एक्जिम कोर्ड’ प्रदान गरिएको हो।

उद्योग विभागले 'एक्जिम कोर्ड' लिनका लागि आवश्यक कागजात र मापदण्ड पूरा गरेका उद्योगलाई भन्सार विभागमा सिफारिस गर्दै आएको छ। गत आवमा घरेलु तथा साना उद्योग विभागले ‘एक्जिम कोर्ड’ लिनका लागि भन्सार विभागमा सिफारिस गर्ने भए पनि चालू आवबाट उक्त विभाग उद्योग विभागमा गाभिएपछि उद्योग विभागले ‘एक्जिम कोर्ड’का लागि भन्सार विभागलाई सिफारिस गर्दै आएको छ।

विभागका सूचना अधिकारी जीवनराज सेढाईं सरकारले अनिवार्य रुपमा 'एक्जिम कोर्ड' लिई आयात निर्यातको काम गर्नुपर्ने व्यवस्था गरेकाले ‘एक्जिम कोर्ड’ लिनेको सङ्ख्यामा वृद्धि भएको बताउँछन्। 'कोर्ड नलिइकन आयात निर्यातको काम गर्न मिल्दैन', उनले भने। 'एक्जिम कोर्ड' नलिएका उद्योगले सामान आयात तथा निर्यात गर्न नमिल्ने व्यवस्था गरिएको छ।

विभागले प्यान/भ्याटमा दर्ता भएका उद्योग, उद्योग र वाणिज्यमा दर्ता भएका उद्योग, आयातको लागि १० लाख र निर्यातका लागि ३ लाख रुपैयाँ बैंक ग्यारेन्टी गरेको तथा कर चुक्ता प्रमाणपत्र भएको उद्योगलाई ‘एक्जिम कोर्ड’ प्रदान गर्दै आएको छ। यस्तै वाणिज्यका सामग्री आयात तथा निर्यातका लागि भने वाणिज्य विभागबाट ‘एक्जिम कोर्ड’ लिनुपर्ने व्यवस्था गरिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

हङकङका बाबार हायत कर्णाली याक्समा

गुणस्तरीय सेवा दिन टेलिकमलाई प्रधानमन्त्रीको निर्देशन

आरिफको अर्धशतकसँगै स्कट्ल्यान्डमाथि नेपालको शानदार जित