काठमाडौं- नेपाल एयरलाइन्सका कार्यकारी अध्यक्ष मदन खरेलका कारण ४ वटा चिनियाँ वाई-१२ जहाज एक महिनादेखि ग्राउन्डेड भएका छन्।
खरेलले वाई-१२ जहाज उडान गरिरहेका पाइलट उद्धव घिमिरेलाई ए-३२० जहाज उडानका लागि प्रशिक्षणमा पठाउने निर्णय गरेसँगै चारै वटा चिनियाँ जहाज वाई-१२ ग्राउन्डेड भएका हुन्।
तर खरेलले गरेको सो निर्णयमा एयरलाइन्सका सिनियर पाइलट सन्जय बादे र नेपेन्द्र भट्टराई सन्तुष्ट हुन सकेनन्। आफूहरुलाई ए-३२० को पशिक्षणमा नपठाएको भन्दै उनीहरू बिरामी बिदामा बसे। यसपछि एयरलाइन्सका सबै चिनियाँ जहाज ग्राउन्डेड भएका हुन्।
अध्यक्ष खरलेले नियम विपरीत घिमिरेलाई ए-३२० जहाज उडान पाइलट प्रशिक्षणमा पठाउँदा सबै जहाज ग्राउन्डेड भएको नेपाल एयरलाइन्सका एक वरिष्ठ पाइलटले बताए।
नेपाल वायुसेवा निगमको सेवा प्रवेश गर्दा जुन व्यक्ति पहिले प्रवेश गरेको हो, उसलाई नै पेशागत वृद्धि/विकासमा पहिलो अवसर हुने व्यवस्था उल्लंघन गरेकाले जहाज ग्राउन्डेड भएको स्रोतको दाबी छ।
अध्यक्ष खरेलले नवौं तहमा प्रवेश गरेका दुई पाइलट बादे र भट्टराईलाई प्रशिक्षणमा नपठाएर आठौं तहमा प्रवेश गरेका उद्धव घिमिरेलाई पठाएको तथ्य फेला परेको छ।
जब सिनियर पाइलटलाई प्रशिक्षणमा जान रोक लगाउँदै खरेलले म्यान्युअल परिवर्तन गरेपछि समस्या सृजना भएको स्रोत बताउँछ।
सिनियर पाइलट बादे र भट्टराईले आफूभन्दा जुनियर पाइलटलाई ए-३२० को प्रशिक्षणमा पठाएको भन्दै बिरामी बिदामा बसेपछि ४ वटै जहाज ग्राउन्डेड छन्।
अहिले दुबै पाइलट 'स्टे अर्डर'को माग गर्दै उच्च अदालत पाटन पुगिसेकेका छन्। बादे र भट्टराईले आफूहरूमाथि अन्याय भएको भन्दै रिट दायर गरेका हुन्।
घिमिरेलाई तालिममा पठाउन नेपाल नागरिक उड्डयन प्राधिकरणले गत ३० डिसेम्बरमा अनुमति दिएको थियो। यसपछि उक्त निर्णयमा चित्त नबुझाएका दुई पाइलट बादे र भट्टराईले प्राधिकरणमा उजुरी गरेका थिए।
दुई पाइलटको उजुरी आएपछि प्राधिकरणले गत २ जनवरीमा घिमिरेलाई प्रशिक्षणमा नपठाउने भन्दै एयरलाइन्सलाई पत्र लेखेको थियो। तर, प्राधिकरणको पत्र विपरीत घिमिरे ४ जनवरीमा प्रशिक्षणका लागि इन्डोनेसिया गए।
घिमिरे प्रशिक्षणका लागि विदेश गइसकेपछि निगमका अध्यक्ष खरेलले फेरि प्राधिकरणबाट प्रशिक्षणमा जाने अनुमति समेत लिएको स्रोत बताउँछ।
पाइलटहरूले आफूहरुमाथि भएको अन्यायका विषयमा सत्य-तथ्य चाहिएको बताउँदै आएका छन्। उनीहरुले व्यवस्थापनसहित अध्यक्ष खरेलसँग किन सिनियर पाइलट हुँदा-हुँदै जुनियर पाइलट पठाएको भन्ने विषयको उत्तर खोजिरहेको स्रोत बताउँछ। तर, खरेल भने नियमसंगत रुपमा नै घिमिरेलाई ए-३२० को प्रशिक्षणमा पठाएको दाबी गर्दै आएका छन्। यस विषयमा खरेलसँग जानकारी लिन खोज्दा उनी सम्पर्कमा आउन चाहेनन्।
दैनिक १० लाख क्षति
एयरलाइन्सका ४ वटा वाई-१२ जहाजमध्ये तीन वटा जहाज उडानमा थिए। नियम विपरीत उद्धव घिमिरेलाई प्रशिक्षणमा पठाइएसँगै अन्य दुई पाइलट पनि बिरामी बिदामा बसेपछि एयरलाइन्समा ती जहाज उडाउने पाइलट नै छैनन्।
बादे र भट्टराई बिरामी बिदामा बसे भने अर्का पाइलट आङ नुरी शेर्पाको 'पिपिसी'को म्याद सकिएपछि जहाज उडान गर्न पाएका छैनन्। वाई-१२ जहाज ग्राउन्डेड हुँदा आर्थिक अवस्था कमजोर भएको एयरलाइन्सलाई अहिले दैनिक १० लाख क्षति हुँदै आएको छ।
यसका साथै शेर्पाको पिपिसी नवीकरण हुन नसक्दा उनका लागि तलबमा मात्रै मासिक १० लाख आर्थिक भार थपिएको छ। यसैगरी, ४ वटा जहाजको मासिक पार्किङ शुल्क मात्रै एयरलाइन्सलाई १ करोड ५० लाख आर्थिक भार बढेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
