चितवन- हरेक वर्ष प्रणय दिवसको अवसर पारेर चितवनको सौराहामा आयोजना हुने फुड फेस्टिबल साेमबारदेखि सुरु भएको छ।
प्रणय दिवसलाई विशेष बनाउन चितवनको सौरामा फुड फेस्टिबल आयाेजना गरिँदै आएकाे हो। फेस्टिबलमा सौराहाका व्यवसायीले विदेश तथा देशका विभिन्न स्थानबाट सौराहा आउने अतिथिको लागि विभिन्न प्रकार र स्वादको खाना खुवाएर स्वागत गर्ने गरेका छन्।
फागुन ३ गतेसम्म सञ्चालन हुने १३औँ संस्करणको फुड फेस्टिबलको सोमबार नेपाल कम्युनिष्ट पार्टी (नेकपा)का नेता एवम् पूर्व अर्थमन्त्री सुरेन्द्र पाण्डेले उद्घाटन गरेका छन्।
सौराहाको पर्यटन प्रवर्द्धन गर्ने उद्देश्यले आयोजना गरिएको फुड फेस्टिबलले आन्तरिक तथा बाह्य पर्यटकलाई सौराहामा केन्द्रित गर्न मद्दत पुग्ने पाण्डेले बताए। पर्यटकको आगमन कम हुने समयमा निजी क्षेत्रबाट पर्यटकीय गतिविधि बढाउनका लागि आयोजना गरिने क्रियाकलापलाई सरकारले सहयोग गर्नुपर्नेमा पाण्डेले जोड दिए।
यसपटकदेखि नि:शुल्क प्रवेशको व्यवस्था गरिएको फुड फेस्टिबलमा विभिन्न जातजातिसँग सम्बन्धित ४० वटा खानाका स्टलहरु राखिएकाे रेष्टुरेन्ट एन्ड बार एसाेसिएसन (रेवान) सौराहाका अध्यक्ष गोकर्ण गिरीले बताए।
गत वर्षहरुमा फुड फेस्टिबल अवलोकनका लागि समेत शुल्क तिर्नुपर्ने भएपनि यसपटक भने फागुन २ गते मात्रै टिकट काट्नुपर्ने गरि फुड फेस्टिबल आयोजना गरिएको गिरीले बताए। महोत्सवबाट खर्च कटाएर बचत भएको पैसालाई उज्यालो सौराहा तथा घुम्ती शौचालय निर्माणका लागि प्रयोग गरिने कार्यक्रम संयोजक ध्रुव गिरीले जानकारी दिए।
फेस्टसबलले आन्तरिक तथा बाह्य पर्यटन प्रवर्द्धनमा टेवा पुग्ने यहाँका व्यवसायीले विश्वास लिएका छन्। नेपालका विभिन्न समुदाय र जातिका खानाका परिकारदेखि अन्तर्राष्ट्रिय स्तरका खानाको परिकार उपलब्ध हुने फुड फेस्टिबलमा ५ लाख भन्दा बढी दर्शकले अवलोकन गर्ने आयाेजक रेबान साैराहाले विश्वास लिएकाे छ।
यसपटकदेखि फेस्टिबललाई प्लाष्टिकमुक्त बनाउने अभियान सुरु गरिएको उल्लेख गर्दै संयोजक गिरीले आगामी पाँच वर्षभित्रमा फेस्टिबललाई पूर्ण प्लाष्टिकमुक्त महोत्सवको रुपमा विकास गरिने बताए। उनले फेस्टिबलकाे आम्दानीबाट आर्थिक अभावमा परि विद्यालय जान नसकेका विद्यार्थीलाई सहयोगार्थ कोष निर्माण गर्ने, उज्यालो सौराहा कार्यक्रमलाई निरन्तर दिने, घुम्ती शौचालय राख्ने, सौराहाको सरसफाइको सवालमा ५ प्रतिशत रकम विनियोजन गरिने बताए।
नेपालमा आउने कुल पर्यटकमध्ये २२ प्रतिशत साैराहा आउने गरेका छन्। १ सय १० होटल ८५ रेष्टुरेन्ट रहेको सौराहामा पर्यटकहरु जंगल सफारी, हात्ती सफारी, जीप सफारी, ढुङ्गा सयर गर्नको लागि आउने गर्दछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
