जनकपुर- पूर्व-पश्चिम राजमार्गअन्तर्गत सिरहाको कर्जन्हा नगरपालिकास्थित बस्तीपुरमा आज भएको सवारी दुर्घटनामा १ जनाको मृत्यु भएको छ भने ३० जना घाइते भएका छन्। घाइते ३० जनाको जिल्लाका विभिन्न अस्पतालमा उपचार भइरहेको छ।
मृत्यु हुनेमा वीरगञ्जका ३५ वर्षीय दिपराज यादव रहेको प्रहरीले जनाएको छ। उनको कर्जन्हास्थित फुलकुमारी महतो मेमोरियल अस्पतालमा उपचारका क्रममा मृत्यु भएको हो। राजविराजबाट जनकपुरका लागि छुटेकाे ना५ख २५८८ नम्बरको बस कर्जन्हा नगरपालिका-४ मा तीव्र गतिका कारण दुर्घटना भएको चालक रामशरण यादवले बताएकाे प्रहरीले जानकारी दिएकाे छ। चालक यादव पनि घाइते भएका छन्।
धुनषाको नगराइन नगरपालिकाका ४५ वर्षीय रामप्रताप राउत र भारतका सतेन्द्र यादव गम्भीर घाइते भएका छन्। गम्भीर घाइते रामप्रताप राउतलाई थप उपचारका लागि धरान पठाइएको फुलकुमारी महतो मेमोरियल अस्पताल कर्जन्हाका डा शिवशंकर साहले जानकारी दिए। यहाँ उपचार सम्भव नभएकाहरुलाई धरान, विराटनगर र जनकपुर पठाइएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
