काठमाडौं- देशभर रहेका ५० वटा विमानस्थलमध्ये ३२ वटामा मात्रै हवाई सेवा सञ्चालनमा छ।
सञ्चालनमा रहेका विमानस्थलमध्ये पनि ३१ मा मात्रै कालोपत्रे भएको नेपाल नागरिक उड्डयन प्राधिकरणले जनाएको छ। देशभर अहिले आन्तरिकतर्फ ५ वटा नयाँ विमानस्थल निर्माणका चरणका रहेको प्राधिकरण महानिर्देशक सन्जीव गौतमले बताए।
नेपाल नागरिक उड्डयन प्राधिकरणको २० औं वार्षिकोत्सव सभालाई सम्बोधन गर्दै गौतमले नेपाललाई युरोपियन युनिएनको सुरक्षा चासो लिस्टबाट हटाउने गरी प्राधिकरणले काम गरेको बताए। ‘हवाई यातायातको क्षेत्र विश्वमा दिनानुदिन बढिरहेको छ’, गौतमले भने, ‘नेपालको हवाई क्षेत्रको विकास र सुधार पनि क्रमिक रुपमा हुँदै छ।’
प्राधिकरणले नेपाल नागरिक उड्डयन प्राधिकरण ऐन, २०५३ अनुसार उडान सुरक्षा, हवाई सुरक्षा, उड्डयन सञ्चार, परिवहन–निगरानी तथा विमानस्थल पूर्वाधार विकार तथा विस्तारमा उल्लेखनीय काम गरेको गौतमको दाबी छ।
हवाई यात्रु बढ्दो
अन्तर्राष्ट्रिय नागरिक उड्डयन संगठन आइकाओका अनुसार सन् २०१७ मा मात्रै सन् २०१६ को तुलनामा हवाई यात्रु ७.२ प्रतिशतले बढेको छ। त्यसमा पनि एसिया प्रशान्त सबैभन्दा अगाडि रहेको छ। यसैगरी, सन् २०१६ को तुलनामा सन् २०१७ मा मात्रै हवाई ट्राफिक वृद्धि पनि १०.७ प्रतिशत रहेको छ।
नेपालमा मात्रै सन् २०१७ को १० महिनाको तुलनामा सन् २०१८ को यसै अवधिमा अन्तर्राष्ट्रिय वायुयान आगमनमा २.२० प्रतिशत र आन्तरिक वायुयान तर्फ २.७३ प्रतिशत वृद्धि भएको गौतमले जानकारी दिए।
यसै अवधिमा अन्तर्राष्ट्रिय हवाई यात्रुतर्फ १३.८५ र आन्तरिक तफै १५.४५ प्रतिशत हवाई यात्रु बढेको गौतमले बताए।
सन् २०१८ को १० महिनामा मात्रै त्रिभुवन अन्तर्राष्ट्रिय विमानस्थल हुँदै नेपाली ३ वायुयान तथा अन्य १३ देशका २६ वटा वायुसेवा कम्पनीको विमानमार्फत ३५ लाख ४२ हजारभन्दा बढी यात्रुले अन्तर्राष्ट्रिय हवाई यात्रा गरेका छन्।
यसै अवधिमा आन्तरिकतर्फ भने २३ लाखभन्दा बढी यात्रुले हवाई सेवा लिएको प्राधिकरणले जनाएको छ।
यस अवधिमा नेपालले आइकाओबाट उडान सुरक्षा सुपरिवेक्षणमा उल्लेखनीय काम गरेको भन्दै आइकाओ काउन्सिल सर्टिफिकेटसमेत पाएको प्राधिकरणले वार्षिकोत्सव सभाबाट जानकारी दिएको छ।
प्राधिकरणले वायुयान दुर्घटना न्यूनीकरणका लागि वायुसेवा कम्पनीहरुको सेफ्टी अडिटसमेत गर्न थालेको छ।
'तोकिएकै समयमा गौतमबुद्ध अन्तर्राष्ट्रिय विमानस्थल'
प्राधिकरणले तोकिएकै समय सन् २०१९ को जुन २८ भित्र गौतम बुद्ध अन्तर्राष्ट्रिय विमानस्थल निर्माण सम्पन्न हुने दाबी गरेको छ। यसैगरी पोखरा क्षेत्रीय अन्तर्राष्ट्रिय विमानस्थल पनि २०२१ को जुलाईभित्र निर्माण सम्पन्न हुने प्राधिकरण महानिर्देशक गौतमको भनाइ छ। अहिलेसम्म पोखरा क्षेत्रीय विमानस्थल निर्माण २० प्रतिशतभन्दा बढी काम भइसकेको गौतमको दाबी छ।
निजगढ अन्तर्राष्ट्रिय विमानस्थल निर्माणको काम पनि द्रुत गतिमा बढेको प्राधिकरणले जनाएको छ। अहिले विमानस्थलको पहिलो चरणको लागि आवश्यक रुख कटानीको आदेश लिने काम प्रक्रियामा रहेको गौतमले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791358722.jpg)
-1786602170.png)
