काठमाडौं– लोकतन्त्रपछि मन्त्रिपरिषद्को निर्णयहरु संक्षेपमा सुनेर सम्प्रेषण गर्ने बानी लागेका पत्रकारहलाई गत कात्तिक २५ गते राति सरकारका प्रवक्ता तथा सञ्चारमन्त्री गोकुल बास्कोटाले अचम्मित तुल्याइदिए।
सोही राति अबेर सकिएको मन्त्रिपरिषद्को निर्णय कुरेर बसेका पत्रकारहरुलाई उनले भने– 'आवश्यक निर्णयहरु गरिएको छ र समय क्रममा तपाईंहरुले थाहा पाइहाल्नुहुन्छ।'
निर्णयहरु तत्काल नसुनाउनका लागि उनले खुलाएका कारण यस्तो थियो– 'पत्रकारहरुलाई चिया पनि खुवाउन नपाइने अवस्था भयो। स्थानको अभाव भयो। कहिले बालुवाटार, कहिले सिंहदरबार जुनसुकै अवस्थामा पनि बस्नुपर्ने। यहाँहरुका लागि सुविधा होस् भनेर सूचना सम्प्रेषणमा एकरुपता दिन नयाँ प्रयोग गर्ने तयारी गरेका हौं।'
आइतबार रातिको यो घटनापछि त्यही बिहीबार उनले सञ्चार मन्त्रालयमा पत्रकार सम्मेलन गरेर निर्णयहरु सुनाए। त्यसयता हरेक बिहीबार पत्रकार सम्मेलन गरेर निर्णयहरु सुनाइने गरिएको छ।
पछिल्ला हप्ताहरुमा भने पत्रकार सम्मेलन राष्ट्रिय योजना आयोगको हलमा हुने गरेको छ। आजको सहित पछिल्ला तीन हप्ताको पत्रकार सम्मेलन भने सोही हलमा भएका हुन्। पत्रकार सम्मेलनको मन्त्री बाँस्कोटाको फेसबुक पेजबाट लाइभ पनि हुने गरेको छ। अरु सञ्चार माध्यमले रुचि अनुसार पनि लाइभ गर्छन्।
सञ्चार मन्त्रालयदेखि योजना आयोगको कार्यालयसम्मका पत्रकार सम्मेलनमा एउटा कुरा समान छ, पत्रकारहरलाई खुवाइने खाजा।
प्रवक्ताले उपस्थित पत्रकारलाई मन्त्रिपरिषद्को निर्णय सुनाउने र आवश्यक प्रश्नोत्तर सकिएपछि पत्रकारहरुलाई जुस, मिठाइ, मम लगायतका खानेकुरा रहेको खाजाको प्याकेट वितरण गरिन्छ। कहिलेकाहीँ केही आइटमहरु भने परिवर्तन हुने गरेका छन्।
सामान्यतयाः ५०/६० जना जति पत्रकार उपस्थित हुने सम्मेलनमा प्रायले खाजा लिएर खाने गरेका छन्।
हरेक हप्ता खाजा खुवाउँदा सरकारको कति खर्च होला?
'यो सामान्य खुद्रे कुरा हो जस्तो लाग्छ', आज आयोजित पत्रकार सम्मेलनमा यसबारेको जिज्ञासाको ठोस उत्तर नदिई सञ्चारमन्त्री बाँस्कोटाले उत्तर फर्काए।
उनले खाजा फाइभ स्टार होटलबाट नमगाइएकाले आफैंले अनुमान गर्न सुझाए। 'हामीले फाइभ स्टारबाट ल्याएको छैन', उनले भने, 'मूल्य कति हो भनेर तपाईंहरुले सहजै अनुमान गर्नसक्नुहुन्छ।'
उनले उपस्थित पत्रकारहरुको संख्या घटबढ भइरहने भएकाले औसतमा कति खर्च हुने पनि भन्न नसकिने बताए। 'कहिले सय जना आउनुहोला भनेर खाजा मगाएको हुन्छ, पचास जना मात्रै आउनुहुन्छ। पचास त पसलेले फिर्ता लिँदैन', उनले भने, 'कहिले भने अघिल्लो पटक पचास जना आउनुभयो भने ७५ मगाएको हुन्छ, डेढ सय आइदिनुहुन्छ।'
उनले खाजामा कुनै गडबड नभएको दाबी गरे। भने, 'यहाँहरुलाई गडबड छ भन्ने आशंका लाग्यो? हेर्न सक्नुहुन्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1784873618.png)
