जनकपुर– प्रदेश २ को अस्थायी मुकाम जनकपुरमै घर भएका केही प्रदेश सांसदहरुले प्रदेशसभा सचिवालयबाट घरभाडा बुझ्ने गरेका छन्।
उनीहरु जनकपुरमा आफ्नै घरमा बसे पनि घरभाडावापत सरकारी सुविधा लिने गरेका पाइएको हो।
संसदीय दलका नेता, सत्तापक्षका प्रमुख सचेतक, विपक्षी दलका प्रमुख सचेतक र संसदीय समितिका सभापतिलाई प्रदेशसभा सचिवालयले मासिक १८ हजार आवास सुविधा दिँदै आएको छ।
कांग्रेसका संसदीय दलका नेता रामसरोज यादवको घर जनकपुरमै रहेतापनि उनले घरभाडावापत प्रदेशसभाबाट प्रत्येक महिना १८ हजार रकम लिने गरेका छन्।
यादवसहित १४ प्रदेश सांसदले जनकपुरमा घर भएर पनि प्रदेश सभाबाट घरभाडा रकम बुझ्ने गरेका छन्। सांसदहरूले घरभाडावापत प्रतिमहिना १५ हजार रुपैयाँ पाउने व्यवस्था छ।
जनकपुरमै घर भएर पनि घरभाडा लिने प्रदेश सांसदहरुमा राजपाका सुरिता साह, ज्यनुल राइन, रिना यादव, जानकीशरण साह र परमेश्वर साह, कांग्रेसका मञ्जुकुमारी यादव, सरस्वती चौधरी, प्रमिला दास र शिवचन्द्र चौधरी, नेकपाका रामचन्द्र मण्डल र किशोरी साह, संघीय समाजवादी फोरमका कौशल यादव र रामआशिष यादव छन्।
जनकपुरआसपासका जिल्लाका केही सांसद घरबाटै संसद ओहोरदोहोर गर्छन्। उनीहरूले पनि घरभाडा रकम बुझ्ने गरेका छन्। प्रदेशसभामा एक सय ७ सदस्य छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
