काठमाडौं– बुधबारदेखि सुरु भएको संघीय संसदको हिउँदे अधिवेशनको पहिलो दिन संसदमा सरकारको चर्को आलोचना भएको छ। प्रतिनिधि सभाको बैठकमा बोल्ने अधिकांश वक्ताले सरकारको कार्यशैलीमा आपत्ति जनाउँदै आलोचना गरेका हुन्।
प्रमुख प्रतिपक्ष दलका सभापति शेरबहादुर देउवादेखि सरकारलाई सर्मथन गरेका राष्ट्रिय जनता पार्टीका अध्यक्ष मण्डलका संयोजक राजेन्द्र महतोसम्मले सरकारको आलोचना गरे।
नेकपाका अध्यक्ष पुष्पकमल दाहालले सरकारको बचाउ गर्न खोजेपनि काम गर्न नसकेको कुरा स्वीकार गरे। उनले अहिले अपनाइएको लोकतान्त्रिक प्रणालीका कारण विकासको गति ढिलो भएको टिप्पणी गरे।
‘लोकतान्त्रिक प्रणाली भनेको छिटोछिटो विकास हुने प्रणाली होइन। कम्युनिस्ट पार्टीको परम्परागत शासन हुन्थ्यो भने ड्यामड्याम निर्णय गरेर, त्यो तरिकाले जान पाएको भए अलिकति छिटो विकास हुन्थ्यो। अहिले जे देखिएन भन्ने भएको छ, यस्तो हुँदैनथ्यो। देखिइसक्थ्यो,’ प्रतिनिधिसभामा सम्बोधन गर्दै प्रचण्डले भने।
उनले प्रणाली, कानुन र ब्युरोक्रेसीलाई मिलाउँछौ भन्दाभन्दा झमेला भएको बताए। 'यो प्रणालीमा एक महिनामा हुने काम १५ र २० महिना लाग्छ’, उनले भने। आफ्नो सम्बोधनमा प्रचण्डले संविधान निर्माण र चुनावका विषयमा चर्चा गरेका थिए। उनले सुझबुझपूर्ण ढंगले तीनै तहको निर्वाचन गर्न सफल भएको बताए। उनले आफूहरु देशलाई विकास र समृद्धिको नयाँ यात्रामा अघि बढाउन प्रयत्नशील भएको बताएका छन्।
प्रचण्डले अहिलेका उपलब्धिहरू शिशु अवस्थामा रहेको बताउँदै त्यसलाई सबै मिलेर सफल बनाउनुपर्ने बताए। 'जसले जन्मायो, उसले राम्रोसँग हुर्काएन भने अप्ठ्यारो स्थिति आउन सक्छ’, उनले भने, ‘यसलाई सफल तुल्याउने जिम्मेवारी सत्तापक्षको मात्रै होइन, प्रतिपक्षीको पनि हो।’
प्रमुख प्रतिपक्षी दलका सभापति देउवाले सरकार सम्झौता गर्ने तर पालना नगर्ने, विवादास्पद कार्य गर्ने र बलात्कारको आरोपी पक्राउ नगर्ने भन्दै आलोचना गरेका थिए।
सरकारले चिकित्सा क्षेत्रको सुधारका लागि डा गोविन्द केसीसँग सम्झौता गर्ने तर कार्यान्वयन नगरेको भन्दै उनले सरकारको विरोध गरे। एसिया प्यासिफिक समिटमा सरकार धर्म प्रचारक संस्थाको आयोजक बनेको भन्दै उनले आपत्ति जनाएका थिए। उनले विपक्षीलाई बेवास्ता गरेर सरकारले एक्लै कुनै काम गर्न नसकिने चेतावनी पनि दिए। देउवाले अध्यादेश ल्याएर कर्मचारीलाई आतंकित पारेको आरोप लगाए।
त्यस्तै पूर्वप्रधानमन्त्री तथा नयाँ शक्तिका संयोजक बाबुराम भट्टराईले पनि सरकारको आलोचना गरे।
सरकार बनेपछि पनि कुनै गुणात्मक परिवर्तन नआएको भन्दै भट्टराईले सरकार पुरानै अवस्थामा रहेको बताए। ‘स्थिर सरकार बन्नु मात्रै ठूलो कुरा होइन’, उनले भने, ‘जनताको जीवनमा के कति परिवर्तन आयो, लोकतान्त्रिक मूल्यमान्यताले कति जरो गाड्यो, विधिको शासन कायम भयो कि भएन, सुशासन र शान्ति सुरक्षा कायम भयो कि भएन जनताले हेर्ने हो। मैले दुखका साथ भन्नुपर्छ, जनताले त्यसो भनेको पाइएन।’
सरकारलाई सर्मथन गरेको राजपाका अध्यक्ष मण्डलका संयोजक राजेन्द्र महतोले पनि सरकार असफल भएको भन्दै आलोचना गरे।
महतोले सरकारको चर्को आलोचना गर्दै मुलुकमा भेदभावले चरम सीमा नाघ्न लागिसकेको बताए।
निर्मला पन्तका बलात्कारी कहाँ छ भन्दै महतोले सरकारलाई प्रश्न गरेका थिए। उनले संघीयतापछि पनि सरकार प्रभावकारी हुन नसकेको उदाहरण दिँदै भने, ‘टोलटोलमा सरकार पुग्नुपर्ने, पोलपोलमा पुग्यो।’
‘प्रचण्डले भनेजस्तो सबै ठिकठाक छैन। यो संसदमा निवार्चित सांसद बस्नुपर्छ कि पर्दैन?’ आफ्ना नेता रेशम चौधरीको प्रसंग उठाउँदै महतोले भने, ‘प्रचण्डजी तपाईंले १० वर्ष आन्दोलन गर्नुभयो। हजारौं मान्छे शहादत भए। सुरक्षा निकायका कर्मचारी मारिए। कसलाई मुद्दा लाग्यो? को जेलमा छ? जनताबाट निवार्चित रेशम चौधरी जेलमा बस्नुपर्छ? थारु हुँदैमा जेलमा बस्नुपर्ने? यही हो लोकतन्त्र? यसैको लागि लडेका हौं हामी?’
संसदको बोल्दै सरकारमै रहेको संघीय समाजवादी फोरमका राजेन्द्र श्रेष्ठ र स्वतन्त्र सांसद दुर्गा पौडेलले समेत सरकारले गति लिन नसकेको आरोप लगाए। त्यस्तै नेमकिपाका सांसद प्रेम सुवालले पनि सरकार असफल भएको टिप्पणी गरे। प्रधानमन्त्रीले गफ रेल र पानी जहाजको गरेको तर काम केही पनि नगरेको भन्दै उनले सरकारको आलोचना गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
