काठमाडौं– सेवा निवृत्त भएको ६ वर्षपछि मात्रै अवकाशको पत्र थमाइएका प्रहरी उपरीक्षक (एसपी) दीपकराज खरेल पुनर्बाहलीको माग गर्दै सर्वोच्च अदालत पुगेका छन्।
अवकाशमा जानुपर्ने समय गुज्रेको ६ वर्षसम्म जागिर खाइरहेको भन्नेबारे नेपाल लाइभले समाचार सम्प्रेषण गरेपछि उनलाई सेवाबाट हटाइएको थियो।
प्रहरी किताबखानाको विवरणअनुसार एसपी खरेल २०६९ चैत १२ गते नै ३० वर्षे सेवा अवधिका कारण अनिवार्य अवकाशमा जानुपर्ने थियो। सोही अभिलेखअनुसार उक्त मितिबाटै खरेल अवकाशमा जानुपर्ने भन्दै किताबखानाले गत शुक्रबार नै उनलाई अवकाशको पत्र थमाएको थियो। किताबखानाको पत्र आएपछि उनी अवकाशमा गएका थिए।
खरेलले गृह मन्त्रालयलाई समेत प्रभावमा पारेर पुस ६ गते सेवामा रहिरहन सक्ने बेहोराको पत्रसमेत लगेका थिए। त्यसको तीन दिनपछि पुस ९ गते उनको जागिर खोसिएको थियो।
अवकाशको पत्र पाएको दुई दिनपछि सोमबार खरेल पुनर्बाहलीको माग गर्दै सर्वोच्च पुगेका हुन्।
उनले प्रहरी किताबखानामा २०५५ मंसिर १८ बाट नयाँ नियुक्तिको अभिलेखीकरण भएको तर पुरानो नियुक्तिअनुसार सेवा अवधि जोडेर अन्यायपूर्वक हटाइएको भन्दै रिट दायर गरेका छन्।
प्रहरी नियमावली २०४९ को दफा ११० र २०६४ को १४० मा उपदान पाएको व्यक्तिले उपदान रकम फिर्ता नगरेको खण्डमा नयाँ, पछिल्लो मितिबाट सेवा अवधि गणना हुने व्यवस्था भएको भन्दै अवकाशको पत्र बदर गरी पाउँ भनेर खरेलले रिट दायर गरेका छन्।
खरेलको मुद्दा सर्वोच्चका न्यायाधीश डम्बरबहादुर शाहीको इजलाशमा पेस भएको छ।
इन्सपेक्टरमा भर्ना हुन फारम भर्दा हवल्दार, नतिजा प्रकाशित हुने बेला जवान
तत्कालीन समयमा दीपकराज खरेललाई प्रहरी निरीक्षक बनाउन खोसिएको जागिर जोडिएन मात्रै, हवल्दारबाट राजीनामा गर्न लगाई जवानमा भर्ना गराइएको थियो।
जानकारहरु भन्छन्, ‘तत्कालीन आइजिपी अच्युतकृष्ण खरेलको ‘मास्टर माइन्ड’ र ठाडो आदेशकै कारण खोसिएको जागिर जोडिने त कहिले हवल्दारबाट जवान हुनेसम्म भएको थियो।’
आइजिपी नै आफ्नै मान्छे भएपछि प्रहरी निरीक्षक हुनेमा दीपकराज त्यसबेलै ढुक्क थिए। किनकि २०५४ बैसाख २ गते सेवाबाट हटाइएका उनलाई प्रहरी निरीक्षक बनाउनै अच्युतकृष्णले बोलाएर पुनः १५ महिनापछि जागिर खुवाएका थिए।
त्यसपछि २०५५ साउन २५ गते प्रहरी निरीक्षकको आदेवन खुल्ला गरियो। उनले विभागीय भएर आवेदन दिए। त्यसबेला उनले २०३९ सालमा प्रहरी सेवामा कार्यरत रहेको कागजात पेस गरेका थिए। दीपकराज प्रहरी निरीक्षक हुने पक्का भयो। तर, जम्मा १५ वर्षमात्रै सेवा गर्न पाउने भए। किनकि २०३९ साल चैतमा प्रहरी सेवामा प्रवेश गरेका उनले जवान र हवल्दार पदमा गरी १५ वर्ष बिताइसकेका थिए।
तर, सेवा अवधि लम्ब्याउनका लागि अर्को कुटिल चाल चालियो– हवल्दारबाट जवानमा भर्ना।
आइजिपी अच्युतकृष्णकै आदेशमा दीपकराजले २०५५ मंसिर १८ गते हवल्दारबाट राजीनामा दिए। बिना विज्ञापन आइजिपीको ठाडो आदेशमा सोही दिन मंसिर १८ गते उनी प्राविधिकतर्फको जवान पदमा भर्ना भए।
यसरी पहुँचको आधारमा खोसिएको जागिर जोड्दै हवल्दारबाट जवानमा भर्ना हुँदै दीपकराज प्रहरी निरीक्षक हुन सफल भए। प्रहरी निरीक्षकको आवेदन दिँदा हवल्दार भएका उनी निरीक्षकको जागिर खानेबला जवान थिए। यसरी कुटिल चाल चालेर खरेलले २०५६ असार ३ गते प्रहरी निरीक्षकको फुली लगाए।
यही आधार मान्दै प्रहरी किताबखानाले प्रहरी निरीक्षकमा भर्ना हुँदा पेस गरेको कागजातअनुसार उनको जागिरको अवधि ६ वर्ष पहिले सकिएको भन्दै अवकाशको पत्र थमाएको हो।
यसबारे किताबखाना स्रोतले भनेको छ, ‘बिचमा कसले जागिर छोड्यो, खायो, त्यसले हामीसँग सरोकार राख्दैन। उनले जागिर खाने बेला विभागीयको रुपमा पेस गरेको कागजातअनुसार उनी ६ वर्ष पहिल्यै अवकाशमा जानुपर्ने हो। त्यही भएर ६ वर्ष अगाडिकै मितिबाट अवकाश हुनेगरी पत्र पठाइएको हो।’
यस सम्बन्धमा नेपाल लाइभले प्रकाशन गरेका विशेष समाचार:
EXCLUSIVE : अवकाशको ६ वर्षपछि खरेललाई एसपीको फुली, पूर्व आइजिपीको कुटिल चाल, गुमराहमा सरकार
अवकाशको ६ वर्षपछि एसपीको फुली काण्ड : छानबिन गर्न गृह र सतर्कता केन्द्रलाई निर्देशन
अवकाशको ६ वर्षपछि एसपीको फुली काण्ड : अन्ततः दीपकराज खरेललाई अवकाशको पत्र
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770957149.png)
-1764146706.png)
-1770562345.jpg)
