काठमाडौं– अवकाश भएको ६ वर्षपछि प्रहरी उपरीक्षक (एसपी) दीपकराज खरेललाई अवकाश दिइने भएकाे छ। अवकाशमा जानुपर्ने समय गुज्रेको ६ वर्षपछि पनि एसपीमा बढुवा भएकोबारे नेपाल लाइभले समाचार सम्प्रेषण गरेपछि गृह मन्त्रालयले छानबिन सुरु गरेको थियो।
गृहले खरेलको सेवा अवधिसम्बन्धमा प्रहरी किताब खानामा विवरण माग गरेको थियो। खरेलको हालसम्मको कार्यावधिलाई अध्ययन गर्दा २०६९ सालमै उनी अवकाश हुनुपर्ने निष्कर्ष निकाल्दै किताबखानाले अवकाशको पत्र पठाएको हो।
यसबीचमा खरेलले नेपाल प्रहरीको काजमा रही लिएको सबै सेवासुविधासमेत फिर्ता गर्नुपर्ने कितावखानाले जनाएको छ।
किताबखानाले शुक्रबार गृह तथा प्रहरी प्रधान कार्यालयलाई खरेललाई अवकाश दिनुपर्ने निष्कर्षसहितको पत्र पठाएको हो।
२०३९ चैत १३ गते खरेल तत्कालीन मध्य क्षेत्रीय प्रहरी तालिम केन्द्र हेटौंडाबाट प्रहरी जवान पदमा भर्ना भएका व्यक्ति हुन्। जवानमा भर्ना भएको मितिबाट अहिलेसम्म उनको प्रहरी सेवाको अवधि ३६ वर्ष पुग्छ।
प्रहरी नियमावली २०७१ को परिच्छेद–११ मा अवकाशबारे उल्लेख छ। नियमावलीमा उल्लेख भएअनुसार सेवा अवधि, उमेर हद र पद बमोजिमको पदावधिका आधारमा अनिवार्य अवकाश हुने व्यवस्था गरिएको छ।
उक्त नियमावली अनुसार ३० वर्षे सेवा अवधि वा पद बमोजिम पदावधि वा तोकिएको उमेर हदमध्ये जुन पहिला आकर्षित हुन्छ, साेही अनुसार सेवाबाट अनिवार्य अवकाश हुनुपर्ने प्रावधान छ।
उमेर हद र पद बमोजिमको पदावधिका कारण एसपी खरेल अवकाश हुँदैनन्। तर, उनी सेवा अवधिका कारण अनिवार्य अवकाश भइसकेको ६ वर्ष भइसकेको छ।
परिच्छेद ११ को दफा १२७ को उपदफा १ को (घ) मा प्रहरीमा ३० वर्ष सेवा अवधि गरेको व्यक्ति अनिवार्य अवकाश हुने उल्लेख छ। यसरी प्रहरी नियमावली अनुसार एसपी खरेल ६ वर्षअघि २०६९ चैत १२ गते अनिवार्य अवकाश हुनुपर्ने हो।
यसरी चुकेका थिए खरेल
कुटिल चाल चालेर जागिर लम्ब्याउन खोजेका एसपी खरेल थोरै बुद्धि नपुग्दा चुकेका थिए। २०३९ सालमा प्रहरी सेवामा प्रवेश गरेका खरेल गयल भएका कारण २०५४ बैसाख २ गते सेवाबाट हटाइए। त्यसेबला उनले प्रहरी सेवामा १३ वर्ष बिताइसकेका थिए। १३ वर्ष सेवा गरेबापत प्रहरी नियमावली अनुसार आफूले पाउनुपर्ने उपदान बापतको रकमसमेत उनले २०५४ साउन २२ गते बुझेका थिए।
अच्युतकृष्ण खरेल पुनः आइजिपी हुँदा दीपकराजको उमेर ३३ वर्षको थियो। खुल्ला प्रतिस्पर्धाबाट प्रहरी निरीक्षकमा भर्ना हुन उनलाई उमेरले छेक्थ्यो।
१५ महिनाअघि सेवाबाट हटाइएका दीपकराजलाई तत्कालीन आइजिपी अच्युतकृष्णले प्रहरी निरीक्षक बनाउन कुटिल चाल चाल्दै २०५५ साउन १ गते पुरानो निर्णय बदर गर्दै पुनः प्रहरी सेवामा प्रवेश गराएका थिए। १५ महिनासम्म घर बसेका उनलाई पुनर्वाहली गराउँदै १५ महिनासम्मको पाउनुपर्ने सेवा सुविधा समेत आइजिपी अच्युतकृष्ण खरेलले दिलाएका थिए।
जबकि उनी उपदानसमेत लिएर बिदा भइसकेका थिए। उनले लिएको उपदान अहिलेसम्म फिर्ता गरेका छैनन्। उपदान पनि फिर्ता नगर्ने र १५ महिनासम्मको गयल भएको बेलाको समेत तलब सुविधा बुझेकाले उनको जागिरमा पुन: भर्ना नभई पुनर्बहाली भएको थियो।
यहीबाट नै उनी चुकेको देखिन्छ। प्रहरी नियमावली २०७१ अनुसार एसपी खरेलले त्यसबेला आफू गयल भएको १५ महिनाको तलबभत्ता नबुझी पुन: भर्ना भएका भए उनले जागिर अवधि लम्बिन्थ्यो र प्रहरी नियमावली अनुसार नै उनी अहिले सेवारत हुन्थे। निकै 'मास्टर माइन्ड' लगाएर जागिर लम्ब्याउन खोजेका पूर्व आइजिपी खरेल र एसपी खरेल यहीँनेर चुकेको देखिन्छ।
त्यसैगरी पुनर्बहाली भएर प्रहरी निरीक्षकमा विभागीय भएर आवेदन दिने बेला उनले २०३९ सालदेखि प्रहरी सेवामा रहेको कागजात पेश गरेका थिए। यसबाट पनि उनीहरु कानुनी रुपमा तल परेका छन्। यही तथ्यलाई आधार मान्दै प्रहरी किताबखानाले उनी ६ वर्षअघि २०६९ साल चैत १२ गते ३० वर्षे सेवा अवधिका कारण अनिवार्य अवकाश हुनुपर्ने भन्दै गृहको राय माग गरेको हो।
पुनर्बहाली भएपछि किन गरिएन उपदान फिर्ता?
अच्युतकृष्ण खरेल पुन: आइजिपी भएपछि एसपी खरेल त्यसबेला प्रहरी हवल्दारमा पुनर्बहाली भएका थिए। जबकि उनले यसभन्दा अघि आफूले पाउनुपर्ने उपदान समेत बुझिसकेका थिए। तर सेवामा पुनर्बहाली भएपछि फिर्ता गर्नुपर्ने उपदान उनले अझै फिर्ता गरेका छैनन्। उपदान लिएपछि सेवामा रहिरहन नपाउने कानुनी प्रावधान छ।
तर उनी उपदान पनि लिने र सेवामा रहिरहने गरेका छन्। यसरी उनले प्रहरी नियमावली विपरीत प्रहरीबाट दोहोरो सुविधा लिएको देखिन्छ।
यस सम्बन्धमा नेपाल लाइभले प्रकाशन गरेका विशेष समाचार:
EXCLUSIVE : अवकाशको ६ वर्षपछि खरेललाई एसपीको फुली, पूर्व आइजिपीको कुटिल चाल, गुमराहमा सरकार
अवकाशको ६ वर्षपछि एसपीको फुली काण्ड : छानबिन गर्न गृह र सतर्कता केन्द्रलाई निर्देशन
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
