दाङ– तुलसीपुर नगरपालिका-३ मा भएको बस दुर्घटनामा मृत्यु हुनेकाे संख्या १७ पुगेकाे छ। दुर्घटनामा १६ जना घाइते भएकाे र उनीहरुलाई राप्ती उपक्षेत्रीय अस्पताल तुलसीपुरमा उपचारका लागि ल्याइएकाे छ।
रातिकाे समय भएकोले उद्धारमा कठिनाइ भएको प्रहरीले जनाएको छ।
तुलसीपुर सल्यान सडक खण्डको तुलसीपुर उप-महानगरपालिका ३ राम्री भन्ने स्थानमा बस दुर्घटना भएको थियो। प्रहरीका अनुसार सडकबाट करिब ७ सय मिटर तल खसेको थियाे। एकदमै भिरालो भएका कारण शव निकाल्नसमेत कठिन परेको छ। मृतकहरूकाे पहिचान हुन सकेको छैन।
कृष्णसेन इच्छुक पोलिटेक्निकल इन्स्टिच्युट घोराही दाङको बस शैक्षिक भ्रमणका लागि सल्यान पुगेर फर्कँदै गरेकाे बा४ ख ९७६६ नम्बरको बस दुर्घटना भएको हाे।
दुर्घटनामा घाइते हुनेहरुमा जुम्ला तातोपानी गाउँपालिका १४ बस्ने १८ वर्षीय हिमाली हमाल,चन्दनाथ गाउँपालिका ३ बस्ने १६ वर्षीय शेन्द्र खत्री, घोराही उममहानगरपालिका १५ रतनपुर बस्ने १७ वर्षीया समीक्षा रोकाया, अछाम मंगलसेन नगरपालिकाकाे १८ वर्षीय क्रम भण्डारी, रुकुमकाे त्रिवेणी गाउँपालिका ३ बस्ने १६ वर्षीय प्रेम बहादुर खड्का, घोराही उपमहानगरपालिका १९ स्यूजा बस्ने १७ वर्षीया मेनुका रिजाल, जुम्ला चन्दनाथ २ बस्ने १७ वर्षीय जीवन भण्डारी, १६ वर्षीया पर्शा रोकाया, अछाम मंलगसेनकाे १९ वर्षीय यूवराज ढुंगाना, रुकुम सानोभेरी ३ बस्ने १६वर्षीया रोजिना पुन, घाेराही १४ बस्ने सञ्जय खनाल, रुकुम अर्मा बस्ने १९ वर्षीय राजन डागी, अछाम मंगलसेन बस्ने ५ बस्ने १६ वर्षीय भद्र बिष्ट, राेल्पाका १७ वर्षीय प्रकाश वली र नाम नखुलेका दुई रहेका छन्।
घाइते ७ जनाकाे अवस्था गभ्भीर रहेकाे प्रहरीले जनाएकाे छ।
प्रहरीका अनुसार बसमा ३४ जना विद्यार्थी, २ जना शिक्षक र १ चालक गरी ३७ जना चढेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
