काठमाडौं- ३८ सय किलो तथा साढे ३३ किलो सुन तस्करीको आरोपमा काठमाडौ र मोरङ जिल्ला अदालतमा दायर भएको मुद्दामा ६ आरोपितहरुको मुद्दा शुक्रबार एकैदिन पेशी परेको छ। त्यसमध्ये चार प्रतिवादीको मुद्दामा सुनुवाइ हुँदै फाइल मगाउने आदेश गरिएको छ।
काठमाडौ र मोरङ जिल्ला अदालत दर्ता भएको सुन तस्करी, कर्तव्य ज्यान तथा संगठित अपराध मुद्दामा उक्त अदालतको आदेशलाई चुनौती दिँदै उनीहरुले सर्वोच्च पुगेका थिए।
उनीहरुको मुद्दा दुई इजलासमा पेशी तोकिएको छ।
३८ सय किलो सुन तस्करी र सनम शाक्य हत्या प्रकरणमा उच्च अदालत विराटनगर र जिल्ला अदालत मोरङको आदेशलाई चुनौती दिँदै दायर भएका चार थान मुद्दा न्यायाधीशद्वय केदारप्रसाद चालिसे र पुरुषोत्तम भण्डारीको इजलाशमा पेशी रहेको थियो।
आरोपितहरु डिएसपी सञ्जयबहादुर राउत, तुलाराम थारु, रामकुमार तिवारी र दम्बा सान्डु तामाङको मुद्दा सुनुवाइ हुँदै फाइल मगाउने आदेश गरेको छ।
मोरङ जिल्ला अदालतको आदेशविरुद्ध सात आरोपितले सर्वोच्चमा निवेदन दिएका थिए। सरकारी पक्षले पनि दुई जनाविरुद्ध निवेदन दर्ता गराएको छ। उनीहरु निवेदनमा पहिलो सुनुवाइ भइसकेको छ।
सर्वोच्च पुगेका अधिकांश आरोपितहरुलाई जिल्ला अदालत थुनामा राख्ने आदेश गरेको थियो। त्यसविरुद्ध उनीहरू उच्च अदालत समेत पुगेका थिए। तर उच्चले पनि केही आरोपितहरूलाई थुनामा मुक्त गर्न अस्वीकार गरेपछि उनीहरु सर्वोच्च पुगेका हुन्।
आजको सुनुवाइमा सर्वोच्चले फाइल मगाएपछि अर्को सुनुवाइमा थुनामा राख्ने निर्णयको बारेमा तल्ला अदालतले दिएको आदेशको वैधानिकता जाँच गर्नेछ।
सुन तस्करी प्रकरणमा जिल्ला र उच्च अदालतले धरौटीमा रिहा गर्न अस्वीकार गरेपछि डिएसपी राउत, तिवारी, तोलाङ्गे, हेमन्त गौतम, राजन थापा , तुलाराम थारू, दम्बा सान्डु तमाङ लगायत सर्वोच्च पुगेका थिए।
जिल्ला अदालत र उच्च अदालतको आदेशलाई चुनौती दिँदै उनीहरूले सर्वोच्चमा १७ नम्बरको निवेदन दिएका हुन्। तल्लो अदालतको आदेश चित्त नबुझे माथिल्लोमा जान पाउने सुविधाअन्तर्गत उनीहरू सर्वोच्च आएका हुन्।
करिब डेढ महिना लामो अनुसन्धानपछि गत बैसाख २६ गते जिल्ला सरकारी वकिलको कार्यालयले बहालवाला प्रहरी अधिकृतसहित २९ जनालाई पक्राउ गरी अदालतमा पेस गरेको थियो।
उनीहरू विरुद्ध संगठित अपराधअन्तर्गत आपराधिक समूह स्थापना गरी सुन चोरी-पैठारी र निकासी गरेको, अपहरण तथा शरीर बन्धक बनाएको र कर्तव्य ज्यान मुद्दामा आरोपपत्र दायर भएको थियो।
साढे ३३ किलोका दुई आरोपितको सुनुवाइ सर्यो
साढे ३३ किलो सुन तस्करी मुद्दामा आरोपितहरु श्यामकृष्ण श्रेष्ठ र गुप्तलाल भुसालको मुद्दा पेशीमा रहेको थियो। न्यायाधीशद्वय शारदाप्रसाद घिमिरे र डम्बरबहादुर शाहीको इजलासमा उनीहरुको पेशी थियो। तर उनीहरुले यसअघि नै आदेश गरेको भन्दै सुनुवाइ गर्न अस्वीकार गरेपछि अर्को साताका लागि सरेको छ।
श्रेष्ठ विमानस्थलका कर्मचारी हुन् भने भुसाल व्यवसायी हुन्।
त्रिभुवन विमानस्थलबाट अवैधरुपमा साढे ३३ किलो सुन ल्याएको घटनामा संलग्न भएको भन्दै प्रहरीले ३३ जनाविरुद्ध २०७३ फागुन २२ गते मुद्दा दायर गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
