काठमाडौं- नेपाल कम्युनिस्ट पार्टी (नेकपा) को जारी स्थायी समितिको बैठकमा बोल्दै पार्टी प्रवक्ता नारायणकाजी श्रेष्ठले सरकारको कार्यशैलीप्रति आपत्ति जनाएका छन्। अध्यक्षद्वय केपी शर्मा ओली र पुष्पकमल दाहालले प्रस्तुत गरेको प्रतिवेदनमा बोल्ने क्रममा श्रेष्ठले राजनीतिक नियुक्तिप्रति प्रश्न उठाएका हुन्।
शुक्रबार बोल्ने सदस्यहरूले सरकारका काम कारबाही र पार्टीका एकतामा भएको ढिलाइबारे नेतृत्वको कटु आलोचना गरे।
बैठकमा स्थायी समितिका सात जनाले बोलेका थिए। आज बोलेका श्रममन्त्री गोकर्ण विष्टले आफ्नो मन्त्रालयको कामप्रति बचाउ गरे पनि सरकारको बचाउ भने गरेनन्।
प्रवक्ता श्रेष्ठ अरु नेताभन्दा अलि कडा रुपमा प्रस्तुत भएको एक नेताले बताए। श्रेष्ठको बोली उद्धृत गर्दै उनले भने, 'सरकारले भ्रष्टहरुलाई नियुक्त गरेको छ। भ्रष्टहरूलाई राजनीतिक नियुक्ति दिएर सुशासन कसरी दिन सकिन्छ?'
सरकारका कार्यशैलीप्रति जनतामा वितृष्णा देखिएको भन्दै उनले आत्मालोचित हुन सुझाव दिएका थिए। उनले भनेका थिए, 'यो बैठकमा सबै आत्मलोचित होऔँ र गल्ती सच्याउने प्रण गरौँ।'
त्यस्तै श्रेष्ठले यही बैठकले पार्टी एकता प्रक्रिया टुंग्याउनुपर्नेमा जोड दिएका थिए। पार्टी एकता प्रक्रियाले गति नलिएको प्रति उनको असन्तुष्टि थियो।
विधानमा स्थायी समिति सदस्यहरुको गुनासो रहेकाले पुनर्लेखनको पनि उनले माग गरे।
त्यस्तै, शुक्रबार धारणा राख्ने संसदीय दलका उपनेता सुवास नेम्वाङले सरकार र पार्टीको काम प्रभावकारी हुन नसकेको भन्दै चिन्ता व्यक्त गरे। पार्टी पद्धतिअनुरुप नचेलेको उनको धारणा थियो। उनले भने, 'हामी बोल्न पाउनुपर्ने स्थान कहाँ हो?' पार्टी बैठक नियमित नभएको प्रति उनले चिन्ता राखे। एसिया प्यासिफिक सम्मेलनमा सरकार र संसद्को लोगो प्रयोग भएको भन्दै सरकारको आलोचना गरे।
'एसिया प्यासिफिक सम्मेलन कुनै संस्थाको हो, त्यस्तो कार्यक्रममा सरकार र संसद्को लोगो दुरुपयोग हुनुहुँदैनथ्यो,' उनले भने।
सचिवालयको बैठक बस्दा सचिवालयको नेताले आफ्नो धारणा राख्ने गरेको भन्दै उनले तर्क गरे, 'स्थायी कमिटीको बैठक नबस्दा हामीले आफ्ना कुरा कहाँ राख्ने?'
बैठकलगत्तै सञ्चारकर्मीसँग कुरा गर्दै नेता घनश्याम भुसालले पार्टी एकतापछि पहिलोपटक मन खोलेर छलफल गर्ने वातावरण बनेको भन्दै खुसी देखिए। स्थायी समितिमा उठेका विषय सम्बोधन हुनेप्रति उनी आशावादी देखिए।
'पहिलोपल्ट खुला–खुलस्त छलफल गर्न पाएका छौँ। पार्टी र सरकारका कामका विषयमा छलफल भएका छन्,' उनले भने।
सात जना सहित हालसम्म ४१ सदस्यले धारणा राखेका छन्। आमन्त्रित सदस्यसहित गरी ५१ सदस्यीय स्थायी कमिटीका सदस्यहरुको बोल्ने क्रम शनिबार सकिनेछ।
शुक्रबार सुवास नेम्वाङ, ईश्वर पोखरेल, नारायणकाजी श्रेष्ठ, अमिक शेरचन, मणि थापा, गोकर्ण विष्ट, छविलाल विश्वकर्माले अध्यक्षद्वयको प्रतिवेदनमाथि बोलेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
