काठमाडौं- कांग्रेसको जारी महासमिति बैठकमा १२ केन्द्रीय सदस्यहरुले शीघ्र महाधिवेसनको माग गरेका छन्।
गत चैत/बैसाखको केन्द्रीय कार्यसमिति बैठकमा चन्द्र भण्डारी, गगन थापा, धनराज गुरुङ लगायतका ६ जना नेताहरुले बुझाएको ५१ पृष्ठको प्रतिवेदन जारी महासमिति बैठकमा पनि बहसमा ल्याउने प्रयत्न गरिएको हो। सो प्रतिवेदनमा 'महासमिति लगत्तै शीघ्र १४औं महाधिवेसनको तालिका बनाएर काम सुरु गर्नुपर्छ' भन्ने माग गरिएको थियो।
सोही प्रतिवेदनलाई बहसमा ल्याउन १२ नेताको तर्फबाट महासमिति सदस्यहरुलाई पुस्तिकाको रुपमा वितरण गरिएको हो। पुस्तिकामा नेताहरु चन्द्र भण्डारी, धनराज गुरुङ, कमला पन्त, रत्ना शेरचन, गगन थापा, बद्री पाण्डे, जीवन परियार, गुरुराज घिमिरे, प्रदीप पौडेल, कल्याण गुरुङ, रामकृष्ण यादव तथा किरण यादवको नाम उल्लेख छ।
उनीहरुले महासमिति सदस्यहरुलाई प्रतिवेदनबारे ५ पृष्ठ लामो व्याख्या पनि गरेका छन्।
'हामीले त्यतिबेला उठाएका विषयहरु अहिले पनि उत्तिकै सान्दर्भिक छन्। त्यतिबेलाको बैठकले 'यी विषयहरुमा भविष्यमा पनि विमर्श चलिरहने'भन्ने निर्णय भएको कुरा स्मरण गराउन चाहन्छौं', वितरित पुस्तिकामा महासमिति सदस्यहरुलाई भनिएको छ।
सो केन्द्रीय कार्यसमितिको बैठकमा विमर्श चलिरहने भनिए पनि पछिल्लो समय निर्वाचनमा पराजयको कारणमा भने छलफल हुन छाडेको छ। त्यतिबेलै छलफल भएर निष्कर्ष निस्किसकेको कतिपय नेताहरुले बताउने गरेका छन्। 'त्यतिबेला यो कुरा त्यहीँ टुंगो लगाउनुपर्छ भन्दा निरन्तर छलफल गर्दै लैजाने भनियो। अहिले त्यहीँ टुंगो लागिसक्यो भन्ने तर्क गरिन्छ', थापा भन्छन्, 'कम्युनिस्ट पार्टीले नराम्रो काम गरेपछि हामीलाई मतदाताले मत दिन्छन् भन्ने भ्रम छ। त्यसले हामीलाई गाँज्दै लैजान्छ। पछिल्लो समय हाम्रो मत घट्दै गएको छ। त्यसैले महासमिति सदस्यहरुले यस्ता विषयमा व्यापक छलफल गर्नुहुन्छ भन्ने हाम्रो अपेक्षा छ।'
५१ सदस्यको प्रतिवेदन केही महिनाअघि हेटौंडामा भएको जिल्ला सभापतिहरुको भेलामा पनि वितरण गरिएको थियो।
जुन परिस्थितिमा केन्द्रीय कार्यसमिति बैठक बसेको थियो, त्यो परिस्थितिमा खास परिवर्तन नआएकाले सो प्रतिवेदन महासमिति सदस्यहरुलाई पनि बाँडिएको केन्द्रीय सदस्य थापाले बताए। 'यसको सान्दर्भिकता के हो भने परिस्थिति फेरिएको छैन', थापाले भने, 'बैसाखमा बैठक बस्दा जे परिस्थिति थियो। अहिले पनि त्यही नै छ।'
के छ ५१ पृष्ठको प्रतिवेदनमा?
प्रतिवेदनमा कांग्रेसमा अस्तित्व संकट देखिएको र त्यसको मुक्तिको बाटो खोज्न अपिल गरिएको छ। त्यसका लागि कांग्रेसको वैचारिक धरातल स्पष्ट र समयानुकुल हुनुपर्ने आवश्यकता औंल्याइएको छ। 'वर्तमान कांग्रेस र कांग्रेसीको सबैभन्दा ठूलो समस्या हाम्रो अस्तित्वको संकट हो', प्रतिवेदनमा भनिएको छ, 'कांग्रेस र कांग्रेसीका लागि यस अस्तित्वको संकटबाट मुक्तिको बाटो अबको महासमिति बैठकले तय गर्नुपर्छ।'
युवा नेताहरुको प्रतिवेदनले महासमिति बैठकको आवश्यकता पनि देखाएका छन्। 'यो बेलामा हामीलाई अत्यावश्यक छ, महासमितिको बैठक। महासमिति एउटा नियमित प्रक्रिया हो, तर यसलाई सामान्य कर्मकाण्डमा मात्र सिमित गरिनु हुँदैन', प्रतिवेदनमा भनिएको छ, 'वैचारिक स्पष्टता महासमिति बैठकबाट मात्र प्राप्त अवश्य नहोला, तर महासमिति बैठकले यस समस्याको संस्थागत रुपमा पहिचान अवश्य गर्न सक्छ।'
'अब के हो त पार्टीको ध्येय? समुन्नत नेपाल निर्माण पार्टीको ध्येय हो। तर, समुन्नत नेपाल कस्तो हुन्छ? संविधानको प्रयोग जसरी गरिएको हुन्छ, राज्यको चरित्र कस्तो, समाजको व्यवहार कस्तो, राज्य र व्यक्ति बीचको सामान्जस्यता र सम्बन्ध कस्तो हुने यी लगायत थुप्रै विषय अनुत्तरित छन्। यो दृष्टिकोणका आधारमा कम्तिमा २० वर्षका लागि नयाँ कार्यक्रमको विस्तृत खाका तयार गर्न जरुरी छ। यसको आधार तयार गर्न पनि महासमिति बैठक अपरिहार्य छ', प्रतिवेदनमा प्रस्ताव गरिएको छ।
प्रतिवेदनमा विधान विपरीत गएर भए पनि अग्रिम महाधिवेसनमा जानुपर्ने माग गरिएको छ। महासमिति बैठकबाट संशोधित विधान पारित गरी शीघ्र महाधिवेसनमा जानुपर्ने विकल्प प्रस्तुत गरिएको छ। 'महासमितिबाट पार्टीको नयाँ कार्यक्रम र संगठनको नयाँ संरचनाको निर्धारण हुन्छ,' भनिएको छ, 'तर अहिलेको विधानअनुसार जाँदा छिटोमा महाधिवेसन सम्पन्न गर्न अर्को दुई वर्ष लाग्छ।'
कांग्रेसभित्र कतिपयले भन्ने गरेको 'एज होइन, एजेन्डा'को मान्यतालाई युवा प्रतिवेदनले खण्डन गर्न खोजेको छ। नेतृत्वमा रहेका पुराना मान्छेको स्वभाविक बहिर्गमन र नयाँ मान्छेको आगमन नहुनाले पार्टी जमेको पोखरीजस्तो भएको उनीहरुको तर्क छ। 'नेतृत्व चयन एजेन्डाका आधारमा हुनुपर्छ भन्नेमा सायदै विमति होला, तर उमेर केही पनि होइन भन्ने कदापि होइन', प्रतिवेदनमा भनिएको छ, 'सबै किसिमका अतिवादसँगको असंख्य संघर्षले थाकेको नेतृत्वलाई सत्ताको सितल छहारीले सिथिल र यथास्थितिवादी बनाइदिएको छ।'
त्यसैले अहिलेकै नेतृत्वको निरन्तरता खोज्नु जनादेश र मतादेशलाई नबुझ्नु भएको उनीहरुको तर्क छ।
मुख्यकुरा युवा नेताहरुले प्रतिवेदनमार्फत अहिलेका सभापतिलाई नेतृत्व हस्तान्तरण गर्न औपचारिक आग्रह गरेका छन्। सभापतिलाई अनुरोध गर्दै भनिएको छ, 'यतिबैला चुनावी परिणाम तातो रहेको अवस्थामा नेतृत्वको कमजोरी मात्र देखिरहेका छौं होला, तर अविलम्ब महासमिति बैठक र शीघ्र महाधिवेसन गराएर सहजतापूर्वक नेतृत्व हस्तान्तरण गर्नेतर्फ लाग्नुभयो भने त्यो सभापतिज्यूको व्यक्तिगत हितमा त हुन्छ नै नेपाली कांग्रेस पार्टी, यसका लाखौं कार्यकर्ता र आमजनताले गौरव गर्ने नेतृत्वको पंक्तिमा अर्को एक नेतालाई जोड्न पाउँनेछन्।'
यस्ताे छ प्रतिवेदन:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
