काठमाडौं- कांग्रेसको जारी महासमिति बैठक स्थल योगम्बर पार्टी प्यालेसको मुख्य गेटबाट भित्र छिर्नेबित्तिकै पुस्तकहरु बिच्छ्याइएको देख्न सकिन्थ्यो। बिपीको आत्मकथादेखि महाथिरका जिवनीसम्म फिँजाइएका त्यहाँका स्टलमा बुधबार दिउँसो खासै भिडभाड थिएन। पुस्तक सुम्सुम्याएर केही पाना पल्टाउँदै अघि बढ्नेहरु देखिन्थे। मानौं, उनीहरु अरु कसैलाई पालो दिइरहेका छन्।
विभिन्न ठाउँमा पुस्तक पसल सञ्चालन गरेका व्यापारीदेखि स्वयं कांग्रेस राजनीति गरिरहेकाहरुसम्म यहाँ किताब बेचिरहेका थिए।
युवा नेता नै पढ्दैनन्
२९ गतेयता पुस्तक बेचिरहेका केही व्यापारीको अवलोकनमा कांग्रेसका युवाभन्दा बुढा नेताहरु अध्ययनशील भएको निष्कर्ष छ। 'युवा नेताहरुले पुस्तक किनेको देख्नै मुस्किल छ', प्राय व्यापारी सुनाउँछन्।
न्युरोडकोमा पसल रहेका कविराज अधिकारी पनि महाधिवेशन सुरु भएदेखि पुस्तक बेचिरहेका छन्। युवा नेताले कम पुस्तक किनेको अनुभव गर्ने अरुजस्तै उनी पनि एक हुन्। यस्ता कार्यक्रममा किताब बेच्न पुगिरहने उनलाई पछिल्लो समय कांग्रेसीहरुमा पनि पुस्तक पढ्ने बानी भने बढेको हो कि भन्ने लाग्छ। '५० वर्ष सेरोफेरोको उमेर भएका नेताहरुले नै पुस्तक किनेको देखियो। युवाहरुले खासै पुस्तक किनेको देखिएन', उनले भने।
उनलाई कांग्रेस त बुढा नेताले नै धानेको हो कि जस्तो लाग्छ। त्यसैले पार्टीले पठन संस्कृतिलाई बढाउन अभियान नै चलाउनुपर्ने उनको सुझाब छ। 'यस्तो रणनीति अपनायो भने युवाहरुमा पनि पठन संस्कृति बढ्ला र नयाँ आउने नेताहरु पनि अध्ययनशील होलान्', उनी भन्छन्।
विभिन्न पार्टीको कार्यक्रम हुँदा आफू पुस्तक बेच्न पुग्ने गरेको उनले बताए। 'कांग्रेसको १३औ महाधिवेशनमा पनि पुस्तक बेचेको थिएँ। पछिल्लो समय विप्लवको भेला हुँदा पनि पुस्तक बेचेको थिएँ', उनले थपे, 'कांग्रेसमा बुढाहरुले मात्रै पढ्ने गरेको देखें। विप्लवका भने युवाहरुले पुस्तक किनेको देखें। बिपीका किताबहरु पनि तिनले नै बढी पढेका होलान्।'
युवाले कम पढ्ने गरेको अनुभव छ देवा उपाध्यायको पनि छ। अध्ययन संस्कृति नभएकै कारण पार्टीमा भद्रगोल देखिएको उनको अनुमान छ। 'अध्ययन गरेपछि मात्रै सफल भइन्छ। भाषण गर्दा पनि आफ्नो कुरा राम्रोसँग राख्न सकिन्छ', उनले थपिन्, 'पैसाले सबैथोक पाइन्छ भन्ने सोच अहिले बढेको छ। पैसाले टिकट सम्म पाइएला।'
उनले आफूबाट कांग्रेस नेताहरु शेखर कोइराला, शोभाकर पराजुली, प्रदीप पौडेल जस्ता नेताहरुले पुस्तक किन्ने गरेको सुनाइन्।
ठीकैको बिक्री
महासमिति बैठकमा ठीकैको बिक्री हुने गरेको बिक्रेताहरु बताउँछन्। कांग्रेसकै अरु कार्यक्रमको तुलनामा महासमिति बैठकमा बढी पुस्तक बिक्री भएको बताउँछन्, बागबजारमा आफ्नो बुक सर्भिस समेत चलाइरहेका दीपक श्रेष्ठ। 'दैनिक १०/१२ हजारको पुस्तक बिक्री भइरहेको छ', उनले भने, 'पहिले पहिलेको कार्यक्रम हेरी यतिको बिक्री हुनु ठीकै हो।'
अधिकारीलाई पनि पुस्तक बिक्री सन्तोषजनक नै लागेको छ। 'दैनिक १२/१५ हजारका पुस्तक बिकिरहेको छ', उनले अनुभव सुनाए, 'बिपीको पुस्तकहरु बढी बिकेको छ।'
बिपीका पुस्तकका अतिरिक्त सिंगापुर कसरी बन्यो, मलेसिया कसरी बन्यो भन्ने शैलीका किताबहरु बढी बिकेको उनी बताउँछन्। विशेषगरी काठमाडौं बाहिरबाट आएका नेताहरुले किताब किनेको उनी बताउँछन्। 'कांग्रेस केन्द्रीय समितिका धेरैजसो नेताहरु चिन्छु', उनले भने, 'उनीहरुले भने यहाँबाट पुस्तक खासै किनेका छैनन्।'
कांग्रेस नेताः आफ्नै पुस्तक, आफैं बिक्रेता
काठमाडौं जिल्ला कार्य समिति सदस्य रामचन्द्र घिमिरे आफ्नो पुस्तक 'नेपालमा नेपाली कांग्रेस' फिँजाएर उभिइरहेका थिए। आफैं पुस्तक बेच्न बस्नुको कारण भने अनुभव गर्न भएको उनले बताए। दिउँसो १२/१ बजेदेखि बेलुका ६ बजेसम्म उनी त्यहीँ उभिन्छन्। र पुस्तक बेच्छन्। उनीबाट विश्वप्रकाश शर्मादेखि प्रदीप पौडेलले पुस्तक किनिसकेका छन्। केही शीर्ष नेतालाई भने उनले निशुल्क रुपमै पुस्तक हस्तान्तरण गरेका छन्।
'कांग्रेसीहरु किताब नै पढ्दैनन्, कम्युनिस्टहरु राता किताब मात्रै पढ्छन् भनिन्छ। त्यस्तै हो', उनलाई प्रश्न गरियो।
'यो मान्छेको स्वभाव अनुसार हुने कुरा हो। कांग्रेस भन्दैमा पढ्ने वा नपढ्ने भन्ने हुँदैन', उनले भने, 'मेरै किताब लिएर म यहाँ बसिरहेको छु। मेरै किताब लैजानेहरुको समूह हेर्दा पनि पढ्छन् भन्ने नै देखिन्छ।'
तर समग्रमा भन्दा कांग्रेसीहरुमा पढ्ने संस्कृति कम छ भन्ने उनलाई पनि लाग्छ।
प्रति पुस्तक दुई सयमा बेचिरहेको आफ्नो पुस्तक पहिलो दिन ६ हजार, दोस्रो दिन ८ हजार र ९ दिन नौ हजारको बेचेको उनले बताए। उनले पहिलो दिन ३०, दोस्रो दिन ४० र तेस्रो दिन ४५ किताब बेचेको उनको तथ्यांकले देखाउँछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
