ओखलढुङ्गा- ओखलढुङ्गामा पुस १ गतेदेखि बिहान र दिउँसो टिपर सञ्चालनमा प्रतिबन्ध लगाइएको छ।
सवारी दुर्घटना न्यूनीकरण र सवारी आवागमनलाई व्यवस्थित गर्न सवारीको चाप बढी हुने समयमा टिपर सञ्चालनमा रोक लगाइएको हो। प्रमुख जिल्ला अधिकारी मुनका न्यौपानेका अनुसार जिल्ला सदरमुकामसहितका मुख्य तथा सहायक व्यापारिक केन्द्रबाट छुट्ने र भित्रने लामो, छोटा दूरीका सवारीको चाप हुने समयमा टिपर सञ्चालन गर्न रोक लगाइएको हाे।
उनका अनुसार जिल्लाका मुख्य राजमार्ग, सहायक मार्ग, बजार, विद्यालय र स्वास्थ्य संस्था रहेका क्षेत्रमा टिपर सञ्चालन गर्न रोक लगाइएको छ। 'हाम्रो अनुरोधलाई अवज्ञा गरे कारबाही हुन्छ', प्रजिअ न्यौपानेले भने।
निर्णय कार्यान्वयन गर्न व्यवसायी, चालक र सरोकारवाला सबैको भूमिका महत्वपूर्ण हुने भन्दै न्यौपानेले सवारी व्यवस्थापन र दुर्घटना न्यूनीकरण अभियानमा साथ दिन सबैलाई आग्रह गरे।
प्रदेश सरकारको विशेष नीतिअनुसार प्रदेशका १४ वटै जिल्लामा आजदेखि दिउँसोको समयमा टिपर सञ्चालनमा रोक लगाइएको प्रहरीले जनाएको छ। रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।