काठमाडाैं– नेपाली कांग्रेसकाे महासमिति बैठक आजदेखि काठमाडौंमा सुरु हुँदैछ।
पुस ३ सम्म चल्ने बैठकमा करिब १६ सय महासमिति प्रतिनिधि सहभागी हुनेछन्।
बैठकमा संघीयता कार्यान्वयन भन्दाअघि कायम रहेका निर्वाचन क्षेत्रअनुसार सदस्यहरु सहभागी हुनेछन्।
त्यसअनुरुप १२ सय प्रतिनिधि हुनेछन्। भ्रातृ–शुभेच्छुक र जनसम्पर्क समितिबाट ९७–९७ जना सहभागी हुनेछन्।
जिल्ला सभापति रहेर महासमिति सदस्य नभएका २९ जना जिल्ला सभापति पर्यवेक्षकको हैसियतमा सहभागी हुने जनाइएको छ।
साथै, बैठकमा सहभागी गराउनका लागि सभापतिले १० जना मनोनित गर्ने व्यवस्था छ।
बैठकमा उपस्थित हुने महासमिति सदस्यहरुलाई दस्तावेज वितरण र रजिष्ट्रेसन आज हुनेछ। ११ बजे उद्घाटन हुने बैठकमा आज दस्तावेजहरु पनि वितरण हुने बताइएको छ। पाँच प्रतिवेदन पेस भएपछि आइतबार बिहानदेखि सामूहिक छलफल हुने बताइएको छ।
आइतबारदेखि पाँच प्रदेशअनुसार समूह विभाजन गरी त्यसको निर्क्योल तीन बजे एकत्रित गरी सोही दिन बैठक सकिने प्रवक्ता विश्वप्रकाश शर्माले जानकारी गराए। महासमितिका लागि अनुमानित एक करोड खर्च हुने उनले बताए।
कांग्रेसको महासमिति बैठकको लागत सहभागी र पार्टीको जगेडा कोषबाट हुने उनले बताए। उनले भने, ‘विगतमा देखिएका विसंगति हटाइएको छ। महासमिति नमुनाका रुपमा सकिन्छ।’महासमिति सदस्यले एक हजार रुपियाँ प्रवेश शुल्क बुझाउनु पर्नेछ।
व्यवस्थापनका लागि उपत्यकाका तीन जिल्लाले ठाँउ–ठाँउमा प्रवेशद्वार बनाउने काठमाडौंका सभापति सबुज बानियाँले बताए।
केन्द्रीय समितिमा सहमति हुन नसकेका विषयहरु फरक मतकै रुपमा बैठकमा प्रवेश हुने शर्माले जानकारी गराए। बैठकमा पदााधिकारीहरुले विभिन्न पाँच प्रतिवेदन प्रस्तुत गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
