विराटनगर– अखिल जनतान्त्रिक तराई मुक्तिमोर्चा विवेक समूहका चार जनाले हतियारसहित सरकारी वर्ता टोलीसमक्ष यहाँ आज आत्मसमर्पण गरेका छन्।
नेपालको संविधानको मूलधारमा रही काम गर्ने र समान्य जीवनयापन गर्ने उद्देश्यका साथ रामु कामैत भन्ने रामनन्दनकुमार कामैत, विनायककुमार यादव, विनोदकुमार यादव र जयप्रकाश लिचपुरिया छन्।
उनीहरूले तीन थान पेस्तोल वार्ता टोलीका संयोजक सोमनाथ पाण्डेललाई बुझाएका हुन्।
अन्य बाँकी हतियार पुसको पहिलो सातामा बुझाउने भनिएको छ।
गएको भदौ ८ गते सरकारले गठन गरेको वार्ता टोलीको संयोजक पाण्डेसहित सदस्य सुरेश आलेमगर, ताराकान्त चौधरी र गृह मन्त्रालयका उपसचिव विश्वराज न्यौपाने छोटो अवधिमै २४ वटा समूहसँग कुराकानी गरिसकेको जनाएको छ।
'कतिपय समूहको अस्तित्व पनि नरहेको र अस्तित्वमा रहेका समूहका केही मानिस जेल छन्', संयोजक पाण्डेले बताए।
वार्ता टोलीका संयोजक पाण्डेले राजनीतिक प्रकृतिको सीके राउतको समूह नभएको र विप्लब समूह राजनीतिक प्रकृतिका भए पनि वार्ताका लागि प्रयास भइरहेको जानकारी दिँदै आज आत्मसमर्पण गर्ने विगतमा गोइत समूहका भएको स्पष्ट पारे।
मोरङका प्रमुख जिल्ला अधिकारी रमेशकुमार केसीले संविधान कार्यान्वयनको दिशातर्फ बढिरहेको समयमा यस्ता समूहका मानिस मुुलुकको मूल धारमा आउनु शान्ति र समृद्धिका लागि आधार बनेको चर्चा गरे।
आत्मसमर्पण गर्ने विनायककुमार यादवले 'नेपालमा अब विकास गर्नुपर्छ, हत्या हिंसाको राजनीतिले मुलुकको चौतर्फी विकास हुँदैन' भन्दै अाफूहरू संविधानको मूल धारमा आएको धारणा राखे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
