काठमाडौं– गृहमन्त्री रामबहादुर थापा‘बादल’सँग युरोपियन संघ (ईयु)का राजदूत भिरोनिका कोडीले शिष्टाचार भेटवार्ता गरेका छन्।
गृहमन्त्रालयमा भएको भेटमा नेपालमा विपद् व्यवस्थापनको क्षेत्रमा युरोपियन संघको सहयोग र सहकार्यको विषयमा केन्द्रीत रहेको थियो।
भेटमा गृहमन्त्री थापाले भूकम्प लगायत नेपालमा विभिन्न समयमा भएका विपद्का घटनामा संघले गरेको सहयोगका लागि धन्यवाद व्यक्त गर्दै आगामी दिनमा समेत सहयोगले निरन्तरता पाउने आशा व्यक्त गरे।
विपद् व्यवस्थापनका लागि अवाश्यक सामाग्री र दक्ष जनशक्तिको अभाव रहेको भन्दै त्यस्तो सामाग्री र तालिम संघबाट सहयोगको आफूहरुले अपेक्षा गरेको गृहमन्त्री थापाले बताए।
नेपाल विभिन्न किसिमका विपद्को जोखिममा रहेको विपद्को समयमा युवा, विद्यार्थी, नागरिक समाज, रेडक्रस लगायतका संघसंस्थालाई सहयोगमा काम गर्ने गरेको उनले बताए।
भेटमा राजदूत कोडीले सीमित स्रोत र साधनका वावजुद नेपालले विपद् व्यवस्थापनमा खेलेको भूमिका सराहनीय रहेको बताए।
उनले विपद् व्यवस्थापनका लागि संघले नेपाललाई विभिन्न किसिमका सहयोग गरिरहेको भन्दै थप सहयोग गर्न समेत आफूहरु तयार रहेको बताए।
भेटमा नेपाल र युरोपियन संघ आवद्ध मुलुकहरुबीचको सम्बन्ध, आपसी सहकार्य र आगामी दिनमा सहयोगका विषयमा समेत छलफल भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
